Taylor Swift កំពូលតារាចម្រៀង POP ដ៏ល្បីល្បាញមានដើមកំណើតមកពីសហរដ្ឋអាមេរិក បច្ចុប្បន្នកំពុងតែមានកេរ្តិ៍ឈ្មោះកាន់តែល្បីរន្ទឺខ្លាំងឡើងៗ មិនស្រកស្រុក ហើយឥទ្ធិពលរបស់នាង គឺសាយភាយពេញសកលលោក។ ជាពិសេសការប្រគុំតន្ត្រីទេសចរណ៍ The Eras Tour របស់ Taylor Swift បានក្លាយជាការប្រគុំតន្ត្រីដែលអាចលក់សំបុត្របានច្រើនបំផុត ទាក់ទាញមនុស្សមកពីជុំវិញពិភពលោកដើម្បីទស្សនាការសម្ដែងផ្ទាំងទស្សនីយភាពដ៏អស្ចារ្យរបស់នាង។


ដោយឡែកបើយើងរំលឹកទៅកាល ៣ឆ្នាំមុនកំពូលតារាចម្រៀងស្រីដ៏ស្រស់ស្អាតរូបនេះ ក៏ធ្លាប់បានផ្សព្វផ្សាយតំបន់ប្រាសាទអង្ករ នៃព្រះរាជាណាចក្រកម្ពុជា ទៅកាន់ពិភពលោកតាមរយៈ Album ចម្រៀងមួយរបស់នាង។ នៅក្នុងអាល់ប៊ុមមួយរបស់ Taylor Swift ដែលមានឈ្មោះថា “Evermore” មានចម្រៀងមួយមានចំណងជើងថា «marjorie» បានដាក់បញ្ចូលប្លង់មួយចំនួនដែលថតនៅតំបន់ប្រាសាទអង្គរនៃប្រទសកម្ពុជា។ ចម្រៀងមួយបទនេះ ក៏ជាចម្រៀងមួយដ៏មានអត្ថន័យសម្រាប់ Taylor Swift ដោយនាងសរសេរ និងច្រៀងដើម្បីឧទ្ទិសដល់វិញ្ញាណក្ខន្ធរបស់លោកយាយនាង គឺ លោកស្រី Marjorie Finlay ជាអ្នកចម្រៀងអូប៉េរ៉ាម្នាក់ដែលបានទទួលមរណភាពក្នុងឆ្នាំ 2003 ។ អត្ថន័យចម្រៀងមួយនេះទៀតសោត Taylor Swift ចង់រំលឹកដឹងគុណដល់លោកយាយ ដែលជាអ្នកគាំទ្រដ៏សំខាន់ម្នាក់ក្នុងដំណើរជីវិតរបស់នាង ដែលនាំឱ្យនាងមានភាពល្បីល្បាញមកដល់សព្វថ្ងៃនេះ។


វីដេអូចម្រៀងដែលមានថ្លង់មួយចំនួន ផ្ដិតយកទិដ្ឋភាពនៅតំបន់ប្រាសាទអង្គរនោះ ត្រូវបានគេសន្មត់ថា ជាសកម្មភាពជីដូនរបស់ Taylor Swift ដែលត្រូវបានថតនៅដើមទសវត្សរ៍ឆ្នាំ ១៩៦០។ តាមរយៈបទចម្រៀងដ៏មានអត្ថន័យមួយនេះ និងការដាក់បញ្ចូលនូវប្លង់មួយចំនួននៅតំបន់ប្រាសាទអង្គរ គឺជាការចូលរួមចំណែកដ៏ធំមួយរបស់កំពូលតារាចម្រៀងស្រីដ៏ល្បីល្បាញរូបនេះ ក្នុងការបង្ហាញសម្បត្តិវប្បធម៌រូបិយមានតម្លៃមិនអាចកាត់ថ្លៃបានរបស់កម្ពុជា ទៅកាន់ពិភពលោក។

ប្រជាជនកម្ពុជា សូមអរគុណចំពោះក្ដីស្រឡាញ់របស់ Taylor Swift មកកាន់ប្រទេសកម្ពុជា និងបានជួយផ្សព្វផ្សាយឱ្យពិភពលោកបានស្គាល់ ទឹកដីដ៏អច្ឆរិយមួយនេះ ហើយសង្ឃឹមថា នាងនឹងមកទស្សនាប្រាសាទអង្គរ និងប្រាសាទបុរាណជាច្រើនទៀតរបស់កម្ពុជាដោយផ្ទាល់នៅថ្ងៃណាមួយ៕
ទស្សនាវីដេអូចម្រៀង៖

























Account
Security
Favourite Content