អាចនិយាយបានថាជាដំណឹងល្អមួយដែល Swifties ឬអ្នកគាំទ្រ Taylor Swift ជុំវិញពិភពលោកបានរង់ចាំអស់ជាច្រើនឆ្នាំបន្ទាប់ពី តារាចម្រៀងស្រីរូបនេះបានបញ្ជាក់ថានាងបានទិញសិទ្ធិគ្រប់គ្រងលើអាល់ប៊ុមដំបូងៗរបស់នាងទាំង ៦ ពីក្រុមហ៊ុន Shamrock Holdings ហើយ។

តាមរយៈសំបុត្រសរសេរដោយដៃដែលបង្ហោះនៅលើគេហទំព័រផ្ទាល់ខ្លួន Taylor Swift បានបង្ហាញឱ្យដឹងថា បន្ថែមពីលើការក្លាយជាម្ចាស់កម្មសិទ្ធិសម្រាប់អាល់ប៊ុមចាស់ៗទាំង ៦ រួមមានអាល់ប៊ុម Taylor Swift, Fearless, Speak Now, Red, 1989 និង Reputation នាងក៏ទទួលបានសិទ្ធិលើវីដេអូចម្រៀង ភាពយន្តប្រគំតន្ត្រី និងរូបថតទាំងអស់ដែលទាក់ទងនឹងអាល់ប៊ុមទាំង ៦ នេះផងដែរ។
តារាចម្រៀងស្រីវ័យ ៣៥ ឆ្នាំរូបនេះមិនបានបញ្ជាក់នោះឡើយថានាងបានចំណាយប្រាក់ប៉ុន្មានដើម្បីទិញសិទ្ធិគ្រប់គ្រងស្នាដៃរបស់ខ្លួនមកវិញ ប៉ុន្តែប្រព័ន្ធផ្សព្វផ្សាយធំៗរបស់អាមេរិកដូចជា Billboard បានរាយការណ៍ថាកិច្ចសន្យាទិញលក់នេះគឺមិនក្រោម ៣៦០ លានដុល្លារនោះទេ។
ត្រលប់ទៅឆ្នាំ ២០១៩ រឿងរ៉ាវជម្លោះលើសិទ្ធិគ្រប់គ្រងស្នាដៃចាស់ៗរបស់ Taylor Swift បានកើតឡើងបន្ទាប់ពីក្រុមហ៊ុន Big Machine Records ដែលជាផលិតកម្មចាស់របស់តារាចម្រៀងស្រីរូបនេះបានលក់សិទ្ធិលើអាល់ប៊ុមចំនួនប្រាំមួយដំបូងរបស់នាងទៅឱ្យក្រុមហ៊ុនរបស់ផលិតករ Scooter Braun គឺ Ithaca Holdings LLC ដោយមិនពិគ្រោះជាមួយនាង ឬផ្តល់ឱកាសឱ្យនាងទិញសិទ្ធិលើការងាររបស់នាងនោះឡើយ។
ក្រោយមកទៀតក្រុមហ៊ុន Ithaca Holdings LLC ក៏បានលក់សិទ្ធិទាំងអស់ទៅឱ្យក្រុមហ៊ុន Shamrock Holdings ដែលធ្វើឱ្យ Taylor Swift សម្រេចចិត្តថតអាល់ប៊ុមចំនួន៦នោះឡើងវិញនិងបន្ថែមឈ្មោះ Taylor’s Version ដើម្បីក្លាយជាម្ចាស់កម្មសិទ្ធិខ្លួនឯង។
ផ្អែកតាមសេចក្ដីរាយការណ៍របស់ទស្សនាវដ្ដី Forbes ទ្រព្យសម្បត្តិសុទ្ធរបស់ Taylor Swift គឺមានប្រហែល ១៦០០ លានដុល្លារគិតត្រឹមខែឧសភា។ ទោះបីជាបានចំណាយប្រាក់រាប់រយលានដុល្លារដើម្បីទិញសិទ្ធិគ្រប់គ្រងស្នាដៃចាស់របស់ខ្លួនមកវិញ ក៏មិនបានធ្វើឱ្យនាងរបូតតំណែងមហាសេដ្ឋី Billionaire ដែរ ប៉ុន្តែតាមរយៈការទទួលបានសិទ្ធិលើស្នាដៃចាស់ៗរបស់ខ្លួនឡើងវិញនេះ គេរំពឹងថាទ្រព្យសម្បត្តិរបស់នាងនឹងកើនឡើងកាន់តែច្រើនតាមរយៈចំណូលពីកម្មសិទ្ធិបញ្ញាលើស្នាដៃចាស់ៗទាំងអស់នេះ ៕






























Account
Security
Favourite Content