ស្របពេលដែលរឿង Lilo & Stitch បាន និងត្រៀមចាក់បញ្ចាំងនៅជុំវិញពិភពលោក Stitch បានទាក់ទាញចំណាប់អារម្មណ៍របស់អ្នកគាំទ្រចម្រៀងខេប៉ុប ជាពិសេស Army ដោយបានបញ្ជាក់ថា ខ្លួនក៏ជា Army ម្នាក់ដែរ និងមាន J-hope ជាតារាក្នុងដួងចិត្ត។

នៅក្នុងថ្ងៃទី១៩ ខែឧសភានេះ The Nerds of Pop បានចែករំលែកវីដេអូខ្លីនៃកិច្ចសម្ភាសជាមួយនឹង Stich ដោយទស្សនាវដ្ដីអាមេរិកមួយនេះ បានសាកសួរតួអង្គសត្វក្រៅភពនេះ ថា គេចូលចិត្តចម្រៀងខេប៉ុបដែរ ឬក៏យ៉ាងណា?
ជាក់ស្ដែង Stich បានឆ្លើយតបវិញថា៖ “ខ្ញុំគឺជាអ្នកគាំទ្រផ្កាប់មុខក្នុងវិស័យខេប៉ុបតែម្ដង ហើយប្រាកដណាស់ ក្រុមដែលខ្ញុំចូលចិត្តគឺ BTS។ ខ្ញុំស្រឡាញ់សមាជិកទាំងអស់ តែខ្ញុំស្រឡាញ់ J-Hope ជាពិសេស”។
ក្រោយពីវីដេអូនេះ បានចែករំលែកនៅលើគណនី X មានអ្នកគាំទ្រជាច្រើនបានគិតថា នេះអាចជាសញ្ញាដែលបញ្ជាក់ថា BTS ឬ J-hope អាចនឹងចូលរួមផលិតចម្រៀងសម្រាប់រឿងនេះ។ ក៏ប៉ុន្តែនៅមួយថ្ងៃបន្ទាប់ The Nerds of Pop បានចេញមកបកស្រាយវិញថា ការដាក់ចម្រៀងរបស់ BTS ចូលទៅក្នុងវីដេអូនេះគឺដើម្បីឱ្យត្រូវគ្នានឹងចម្លើយរបស់ Stitch តែប៉ុណ្ណោះ និងមានការសហការអ្វីលើសពីនេះឡើយ។
យ៉ាងណាមិញ សារព័ត៌មាន Kbizoom បានយល់ឃើញថា នេះគឺជាយុទ្ធសាស្រ្តទីផ្សារដ៏ឈ្លាសវៃមួយរបស់ Disney ព្រោះបច្ចុប្បន្ននេះវិស័យខេប៉ុបកំពុងតែទទួលបានការពេញនិយមនៅជុំវិញពិភពលោក ហើយការដែល Stitch ចេញមកប្រកាសថា ខ្លួនឯងជា Army នេះ គឺជាវិធីសាស្រ្តមួយដើម្បីចូលទៅកាន់អ្នកគាំទ្រ BTS នៅជុំវិញពិភពលោកផងដែរ។

ខណៈពេលដែលតុក្កតារោមខៀវនេះ ស្ថិតនៅក្នុងរូបភាពគួរឱ្យស្រឡាញ់ និងចូលចិត្តលេងច្រើនស្រាប់ ការផ្ដោតទៅលើ J-Hope តែម្ដង គឺជាការចាប់គូគ្នាដ៏ល្អ ព្រោះអ្នកគាំទ្រក៏ស្គាល់ តារាប្រុសរូបនេះក្នុងរូបភាពជា បុគ្គលដែលមានការគិតល្អ និងមានថាមពលច្រើនពូកែរាំដូចគ្នា។
គួរឱ្យដឹងផងដែរថា ភាពយន្ត Live Action ដែលផ្អែកទៅតាមរឿងគំនូរជីវចលកាលពីឆ្នាំ ២០០២នេះ និយាយពីជីវិតរបស់ក្មេងស្រី Lilo និងសត្វអេលៀន Stitch នៅលើកោះហាវ៉ៃ។ ខណៈដែលរឿងនេះមានភាពកំប្លុកកំប្លែងច្រើន សាច់រឿងក៏បានបង្កប់អត្ថន័យស៊ីជម្រៅពីទំនាក់ទំនងក្នុងគ្រួសារផងដែរ ជាពិសេសគឺគម្លាតរវាងក្មេងៗ និងមនុស្សពេញវ័យ។

ដ្បិតទើបតែបានចាក់បញ្ចាំងត្រឹម ១សប្ដាហ៍ក្ដី តែ Lilo & Stitch ទទួលបានការគាំទ្រយ៉ាងក្រាស់ក្រែលពីទស្សនិកជនពីជុំវិញពិភពលោក។ គិតត្រឹមថ្ងៃអាទិត្យនេះ ភាពយន្តរបស់ Disney ចំណងជើងខាងលើ ទទួលបានចំណូល ៣០៤ លានដុល្លារអាមេរិករួចទៅហើយ៕























Account
Security
Favourite Content