ក្រោយពី Liam Payne សមាជិករបស់ One Direction បានបាត់បង់ជីវិតកាលពីថ្ងៃទី១៦ ខែតុលានេះ អ្នកគាំទ្រនាំគ្នាត្រលប់ទៅស្ដាប់ចម្រៀងរបស់ពួកគេម្ដងទៀតរហូតដល់អាល់អ៊ុមទាំង ៥បានជាប់ចំណាត់ថ្នាក់នៅលើ Billboard 200 សាជាថ្មី។

តាមរយៈ Variety បានឱ្យដឹងថា អាល់ប៊ុម Four ដែលបានចេញផ្សាយតាំងតែពីឆ្នាំ ២០១៤ បានជាប់នៅក្នុងលំដាប់លេខ ៣១ បន្តដោយចំណាត់ថ្នាក់លេខ ៣៨ ដែលបានធ្លាក់ទៅលើអាល់ប៊ុម Midnight Memories ដែលបានចេញជាផ្លូវការក្នុងឆ្នាំ ២០១៣។
ដោយឡែកសម្រាប់អាល់ប៊ុមចុងក្រោយបង្អស់របស់ក្រុមចម្រៀងសញ្ជាតិអង់គ្លេស-អៀរឡង់ Made in the A.M. ដែលបានចេញផ្សាយកាលពី ២០១៥ បានទទួលការពេញនិយមលំដាប់លេខ ៦២ បន្តដោយអាល់ប៊ុមដំបូងបង្អស់ Up All Night ដែលបានចេញផ្សាយកាលពីឆ្នាំ ២០១១ បានជាប់ចំណាត់ថ្នាក់លេខ ៨៨។ សម្រាប់អាល់ប៊ុមដែលបានចេញផ្សាយកាលពីឆ្នាំ ២០១២ ដូចជា Take Me Home វិញ បានទទួលចំណាត់ថ្នាក់លេខ ១០៣ នៅលើ Billboard 2០០។

បើត្រលប់ទៅកាន់គ្រាដំបូងដែលអាល់ប៊ុមនីមួយៗចេញលក់វិញ អាល់ប៊ុម ៤ ក្នុងចំណោមអាល់អាល់ប៊ុមទាំង ៥សុទ្ធតែបានជាប់ចំណាត់ថ្នាក់លេខ ១ នៅលើតារាងតែមួយនេះ លើកលែងតែអាល់ប៊ុម Up All Night តែប៉ុណ្ណោះ ដែលទទួលបានចំណាត់ថ្នាក់លេខ ២។ នេះបើយោងតាមរយៈប្រភពដដែល។
គួរបញ្ជាក់ផងដែរថា Billboard 2០០ គឺជាចំណាត់ថ្នាក់នៃប្រជាប្រិយភាពរបស់អាល់ប៊ុមចម្រៀង និង Eps សរុបចំនួន ២០០ នៅក្នុងសហរដ្ឋអាមេរិកតាមសប្ដាហ៍នីមួយៗ ដែលចាត់ចែងដោយទស្សនាវដ្ដី Billboard។
សូមរំឭកផងដែរថា Liam Payne បានបាត់បង់ជីវិតនៅក្នុងវ័យ ៣១ឆ្នាំ ក្នុងឧបទ្ទវហេតុធ្លាក់ពីរានហាលជាន់ទី ៣ នៅក្នុងសណ្ឋាគារមួយនាទីក្រុង Buenos Aires ប្រទេសអាហ្សង់ទីន៕



























Account
Security
Favourite Content