តារាសម្ដែងអាមេរិក Brad Pitt នឹងវិលត្រលប់បង្ហាញមុខក្នុងខ្សែភាពយន្តខ្នាតធំម្ដងទៀតតាមរយៈភាពយន្តបែបប្រណាំងរថយន្ត Formula One មានចំណងជើងថា “F1”។

វីដេអូ Trailer ផ្លូវការដំបូងសម្រាប់ភាពយន្តនេះទើបតែត្រូវបានចេញផ្សាយប៉ុន្មានថ្ងៃមុន ដោយបង្ហាញនូវឈុតឆាកគួរឱ្យរំជើបរំជួលជាច្រើន នាំឱ្យមានការរំពឹងទុកកាន់តែខ្ពស់ក្នុងចំណោមទស្សនិកជន។
ជាស្នាដៃដឹកនាំដោយផលិតករភាពយន្ត “Top Gun: Maverick” លោក Joseph Kosinski ភាពយន្តនេះមានសាច់រឿងនិយាយពីតួអង្គដែល Brad Pitt សម្ដែងមានឈ្មោះថា Sonny Hayes ជាអ្នកបើកឡាន Formula One ដ៏ជោគជ័យក្នុងទសវត្សរ៍ឆ្នាំ ១៩៩០ ប៉ុន្តែបានបង្ខំចិត្តចូលនិវត្តបន្ទាប់ពីហេតុការណ៍គ្រោះថ្នាក់គួរឱ្យរន្ធត់។ បន្ទាប់ពីឃ្លាតឆ្ងាយពីអាជីពនេះជាច្រើនឆ្នាំ លោកក៏ត្រូវបានទាក់ទងឱ្យធ្វើជាអ្នកបណ្ដុះបណ្ដាលអ្នកបើកឡានជំនាន់ថ្មីសម្ដែងដោយ Damson Idris។

មិនត្រឹមតែជាតារាសម្ដែងសំខាន់ក្នុងរឿង ប៉ុន្តែតារាវ័យ ៦១ឆ្នាំ Brad Pitt ក៏មានតួនាទីជាផលិតករមួយរូបដែរសម្រាប់ភាពយន្តថ្មីនេះ ដោយមានការសហការជាមួយម្ចាស់ជើងឯកពិភពលោក Formula One លោក Lewis Hamilton និង Jerry Bruckheimer ដែលបានចូលរួមជាសហផលិតករជាមួយគ្នា។ ខ្សែភាពយន្តនេះត្រូវបានផលិតឡើងដោយមានកិច្ចសហការពីក្រុមការងារ និងអ្នកបើកបរ Formula One ពិតៗ និងបានថតនៅទីលានប្រណាំងជុំវិញពិភពលោក។
ភាពយន្ត “F1” ដែលផលិតនិងចែកចាយដោយក្រុមហ៊ុន The Warner Bros. និង Apple Original Films នឹងត្រូវចាក់បញ្ចាំងតាមរោងភាពយន្តចាប់ពីថ្ងៃទី២៥ ខែមិថុនាខាងមុខ ៕


























Account
Security
Favourite Content