បន្ទាប់ពីបានសហការជាមួយតារាអន្តរជាតិជាច្រើនដូចជា Doja Cat, Raye, Megan Thee Stallion, Future និង Tyla សម្រាប់អាល់ប៊ុមទោលដំបូងរបស់ខ្លួន “Alter Ego” នៅពេលនេះ Lisa បានបន្តពង្រីកឥទ្ធិពលសកលរបស់នាងថែមទៀតតាមរយៈការសហការជាមួយក្រុមចម្រៀងអាមេរិក Maroon 5។

នៅថ្ងៃសុក្រ ទី២ ខែឧសភានេះ ក្រុមចម្រៀង Maroon 5 រួមជាមួយសមាជិក BLACKPINK Lisa បានចាប់ដៃចេញបទចម្រៀងរួមគ្នាលើកដំបូងមានចំណងជើងថា “Priceless” ដែលជាការសហការដំបូងរបស់ក្រុមចម្រៀងអាមេរិកមួយនេះជាមួយនឹងសិល្បករ K-pop។
បទចម្រៀង “Priceless” គឺជាបទនាំមុខសម្រាប់អាល់ប៊ុមថ្មីរបស់ Maroon 5 ដែលត្រៀមចេញនាពេលខាងមុខ។ ក្រុមចម្រៀងអាមេរិកមួយនេះបាននិយាយថា បទចម្រៀងថ្មីនេះឆ្លុះបញ្ចាំងពីការវិលត្រឡប់ទៅរកឫសគល់នៃតន្ត្រីរបស់ពួកគេ ដោយរំលេចនូវការនិពន្ធបទចម្រៀងកាន់តែស៊ីជម្រៅ និងភាពពិតប្រាកដនៃអារម្មណ៍។
ការសហការគ្នានេះទទួលបានការចាប់អារម្មណ៍យ៉ាងខ្លាំងមិនត្រឹមតែពីសំណាក់អ្នកគាំទ្រក្នុងប្រទេសកូរ៉េប៉ុណ្ណោះទេ ប៉ុន្តែក៏សម្រាប់ទស្សនិកជនទូទាំងពិភពលោកផងដែរ ខណៈដែលការរួមចំណែករបស់ Lisa ត្រូវបានរំពឹងថានឹងធ្វើឱ្យបទចម្រៀងនេះក្លាយជាបទចម្រៀងដ៏លេចធ្លោរបស់ Maroon 5 នៅឆ្នាំនេះ។
ទន្ទឹមនឹងបទចម្រៀងទោលនេះ Maroon 5 ក៏បានប្រកាសពីគម្រោងជាច្រើនសម្រាប់អាល់ប៊ុមថ្មីនេះ ព្រមទាំងការប្រគំតន្ត្រីទេសចរណ៍ពិភពលោកក្នុងឆ្នាំ ២០២៥ ធ្វើឱ្យអ្នកគាំទ្រជុំវិញពិភពលោកកាន់តែអន្ទះសាសម្រាប់ការវិលត្រលប់របស់ពួកគេមកកាន់ពិភពតន្ត្រី បន្ទាប់ពីខកខានចេញអាល់ប៊ុមថ្មីប្រមាណ៤ឆ្នាំមកហើយ ៕


























Account
Security
Favourite Content