“Mantra” បទទោលដំបូងក្រោយចូលរួមជាមួយនឹង Columbia Records ដែលបានចេញផ្សាយកាលពីថ្ងៃទី១១ ខែតុលានេះ បាននាំយកប្រជាប្រិយភាពមកឱ្យ JENNIE ម្ដងទៀត ខណៈបានជាប់ចំណាត់ថ្នាក់ក្នុងតារាង Billboard Global Excl. U.S., Billboard Hot 100 និង Billboard Global 200។

តារាចម្រៀងខេប៉ុបរូបនេះធ្លាប់និយាយថា៖ «ខ្ញុំបានយកចិត្តទុកដាក់ទៅលើវាខ្លាំងណាស់ ព្រោះវាដូចជាកូនដំបូងរបស់ខ្ញុំ ដែលត្រូវបានចេញផ្សាយទៅកាន់ពិភពលោក” ហើយលទ្ធផលពិតជាស័ក្តិសមទៅនឹងការតាំងចិត្តរបស់នាងពិតមែន ដោយកាលពីថ្ងៃទី២២ ខែតុលានេះ បទ Mantra បានទទួលចំណាត់ថ្នាក់លេខ ២ នៅលើតារាង Billboard Global Excl. U.S. ជាមួយការលក់ចេញចំនួន ១២០០០ និងការចូលស្ដាប់នៅលើអ៊ីនធឺណិតចំនួន ៦៩លានដង គិតចាប់ពីថ្ងៃដែលបទនេះចេញផ្សាយជាលើកដំបូង រហូតដល់ថ្ងៃទី ១៧ ខែតុលានេះ។
គួររំឭកដែរថា Billboard Global Excl. U.S. ជាចំណាត់ថ្នាក់ប្រចាំសប្ដាហ៍ដែលបានចាត់ចែងឡើងដោយទស្សនាវដ្តី Billboard ដោយយោងទៅលើប្រជាប្រិយភាពរបស់ចម្រៀងនីមួយៗនៅក្នុងទីតាំងចំនួន ២០០ផ្សេងគ្នាទូទាំងពិភពលោក លើកលែងតែនៅក្នុងសហរដ្ឋអាមេរិកមួយទេ។ ដោយឡែក សម្រាប់ប្រជាប្រិយភាពនៅក្នុងសហរដ្ឋអាមេរិកវិញ Mantra បានក្លាយជាបទដែលមានស្ដាប់ច្រើនបំផុតលំដាប់ទី ៩៨ នៅលើ Billboard Hot 100។
ដោយឡែក ក្រោយរួមលទ្ធផលទាំងនៅជុំវិញពិភពលោក និងនៅក្នុងប្រទេសមហាអំណាចមួយនេះរួច បទចម្រៀងដែលជាសម្ធិផលនៃការចាប់ដៃគ្នារវាងផលិតកម្ម ODD ATELIER និង Columbia Records ជាបទលំដាប់លេខ ៣ នៅលើតារាង Billboard Global 200។

សូមបញ្ជាក់ផងដែរថា ចំណាត់ថ្នាក់ទាំង ៥នៅលើតារាង Billboard Global Excl. U.S. បានទៅលើបទ Die With A Smile ដែលជាស្នាដៃរួមគ្នារវាង Lady Gaga និង Bruno Mars ជាមួយនិងចំណាត់ថ្នាក់លេខ១ បន្តដោយបទ Mantra របស់ Jennie បទ Birds of A Feather របស់ Billie Eillish បទ Espresso របស់ Sabrina Carpenter និងបទ Si Antes Te Hubiera Conocido របស់ Karol G ៕























Account
Security
Favourite Content