យោងតាមរបាយការណ៍សវនកម្មរបស់ EDAM Entertainment ដែលបានចេញផ្សាយថ្ងៃទី ២៨ ខែមីនានេះ បានបើកបង្ហាញថា នៅក្នុងឆ្នាំ ២០២៤ កន្លងទៅ IU អាចរកប្រាក់ចំណូលបានរហូតដល់ទៅ ៣០ពាន់លានវ៉ុន ឬប្រមាណ ២០.៤ លានដុល្លារអាមេរិក។

របាយការណ៍ដែលគិតចាប់ពីថ្ងៃទី១ ខែមករា រហូតដល់ថ្ងៃទី ៣១ ខែធ្នូ ឆ្នាំ ២០២៤ បានឱ្យដឹងថា EDAM Entertainment ត្រូវទូទាត់ទឹកប្រាក់ឱ្យទៅសិល្បករសរុបចំនួន ៣៣.៦ ពាន់លានវ៉ុន ឬប្រមាណ ២២.៩ លានដុល្លារអាមេរិក ដោយបច្ចុប្បន្ននេះមានត្រឹម IU ម្នាក់ប៉ុណ្ណោះ ដែលជាសិល្បករនៅសកម្មភាពការងា ស្របពេលដែល WOODZ បានផ្អាកការងារជាបណ្ដោះអាសន្ន ព្រោះជាប់បំពេញភារកិច្ចក្នុងជួរទាហាន។
ខណៈការបែងចែកប្រាក់កម្រៃជាក់លាក់មិនបានបើកបង្ហាញជាសាធារណៈក្ដី តែអ្នកជំនាញបានសន្និដ្ឋានថា ប្រាក់កម្រៃមួយផ្នែកធំជារបស់ IU ដោយសារតែតារាស្រីវ័យ ៣១ឆ្នាំរូបនេះ មិនត្រឹមតែមានតំណែងជាសិល្បករនាំមុខប៉ុណ្ណោះទេ តែនាងក៏ជាម្ចាស់ភាគហ៊ុនរបស់ EDAM Entertainment ផងដែរ។ ដូច្នេះ នៅក្នុងឆ្នាំ ២០២៤ អ្នកជំនាញបានគិតថា តារាពហុជំនាញមួយនេះអាចរកចំណូលបានខ្ទង់ ៣០ពាន់លានវ៉ុន ឬប្រមាណ ២០.៤ លានវ៉ុនអាមេរិក។
ជាក់ស្ដែង IU គឺជាម្ចាស់ភាគហ៊ុនធំលំដាប់លេខ ៣ ដោយនាងមានភាគហ៊ុននៅ EDAM Entertainment សរុបចំនួន ២២.៥ភាគរយ ស្របពេលដែលម្ចាស់ភាគហ៊ុនធំបំផុតគឺ Kakao Entertainment បានកាន់ភាគហ៊ុនចំនួន ៥២.៥ភាគរយ។

គួរបញ្ចាក់ផងដែរថា នៅក្នុងឆ្នាំមុននេះ ទីភ្នាក់ងារខាងលើអាចរកចំណូលបានសរុបចំនួន ៧៤.៩ពាន់លានវ៉ុន ឬប្រហែល ៥១លានដុល្លារអាមេរិក និងទទួលបានប្រាក់ចំណេញសរុបចំនួនជាង ៤.១លានដុល្លារអាមេរិក។ ភាពជោគជ័យមួយនេះ គឺផ្អែកទៅលើសម្មភាពការងាររបស់ IU មិនថាពីកម្មវិធីប្រគំតន្ត្រី និងការងារភាពយន្តភាគ ដូចជារឿង When Life Gives You Tangerines ជាដើម៕























Account
Security
Favourite Content