តារាចម្រៀង Hwasa (Ahn Hye-jin) ទើបតែបានរៀបចំការប្រគំតន្ត្រីទោលលើកដំបូងក្នុងរយៈពេល ១២ ឆ្នាំបន្ទាប់ពីការបង្ហាញខ្លួនលើកដំបូង ខណៈកំពុងទទួលបានជោគជ័យខ្លាំងតាមរយៈបទចម្រៀង Viral “Good Goodbye” ដែលអាចប្រមូលបានពានរង្វាន់សរុប ៥ ពីកម្មវិធីតន្ត្រីប្រចាំសប្ដាហ៍។

នៅថ្ងៃទី ១៩ ខែមករា ភ្នាក់ងាររបស់នាង P Nation បានប្រកាសថា Hwasa បានជួបអ្នកគាំទ្រនៅក្នុងការប្រគំតន្ត្រីទោល *MI CASA* ដែលបានធ្វើឡើងរយៈពេលពីរថ្ងៃ គឺថ្ងៃទី ១៧ និងទី ១៨ នៅសាលសន្តិភាពនៃសាកលវិទ្យាល័យ Kyung Hee ទីក្រុងសេអ៊ូល។
តារាស្រីវ័យ ៣០ ឆ្នាំបានចាប់ផ្តើមការសម្តែងជាមួយនឹងបទចម្រៀងដំបូងរបស់នាង “HWASA” បន្ទាប់មកដោយការសម្តែងដ៏រំភើបនៃបទ “I Love My Body” និង “Chili” ដែលទទួលបានការអបអរសាទរយ៉ាងខ្លាំងពីទស្សនិកជន។ ក្រៅពីនោះ នាងក៏បានសហការជាមួយវង់ភ្លេង Orchestra សម្រាប់ការសម្ដែងបទ “LMM,” “Maria,” និង “Good Goodbye” ដោយផ្តល់នូវភាពអស្ចារ្យ និងអារម្មណ៍កាន់តែរំភើបចំពោះការប្រគំតន្ត្រី។
Hwasa បានសម្តែងការដឹងគុណចំពោះទស្សនិកជន ដោយនិយាយថា “នេះគឺជាការប្រគំតន្ត្រីទោលលើកដំបូងរបស់ខ្ញុំចាប់តាំងពី Debut។ ខ្ញុំមិនដឹងថាខ្ញុំបានជម្នះរឿងប៉ុន្មានទេដើម្បីឈរនៅទីនេះ។ នោះហើយជាមូលហេតុដែលជំហាននីមួយៗដែលអ្នករាល់គ្នាបានដើរដើម្បីចូលរួមការប្រគំតន្ត្រីនេះមានតម្លៃណាស់”។


ទន្ទឹមនឹងការប្រគំតន្ត្រីនេះ Hwasa បានឡើងដល់ចំណាត់ថ្នាក់កំពូលម្ដងទៀតលើតារាងកម្មវិធី SBS Inkigayo ថ្ងៃទី ១៨ តាមរយៈបទ “Good Goodbye”។ នេះគឺជាជ័យជម្នះជាប់ៗគ្នាលើកទីបីរបស់នាង (Triple Crown) និងជាជ័យជម្នះលើកទីប្រាំរបស់នាងជារួម បន្ទាប់ពីបានឈ្នះលើកដំបូងនៅថ្ងៃទី ៧ ខែមុន បន្ទាប់មកនៅថ្ងៃទី ១១ និង ១៨ នៃខែនេះ។
មិនតែប៉ុណ្ណោះ សមាជិកក្រុម Mamamoo រូបនេះក៏បន្តបង្កើតកំណត់ត្រាសម្រាប់ការជាប់ចំណាត់ថ្នាក់ “Perfect All-Kill (PAK)” ដែលជាការជាប់ចំណាត់ថ្នាក់លើតារាងតន្ត្រីក្នុងស្រុកសំខាន់ៗទាំងអស់ព្រមៗគ្នាផងដែរ។
យោងតាម iChart ដែលប្រមូលផ្តុំចំណាត់ថ្នាក់ប្រចាំថ្ងៃ ប្រចាំសប្តាហ៍ និងពេលវេលាជាក់ស្តែងពីវេទិកាតន្ត្រីសំខាន់ៗចំនួនប្រាំមួយគឺ Melon, Genie, Bugs, YouTube Music, Flo និង Vibe—“Good Goodbye” សម្រេចបាន Perfect All-Kill សរុបចំនួន ៧១៥ លើកគិតត្រឹមរសៀលថ្ងៃទី ១៨ មករា ចាប់តាំងពីអាចសម្រេចបាន Perfect All-Kill លើកដំបូងរបស់ខ្លួននៅថ្ងៃទី ៣០ ខែវិច្ឆិកា ឆ្នាំមុន។
ជោគជ័យនេះ បានធ្វើឱ្យបទ “Good Goodbye” គឺជាបទចម្រៀងទី២ ក្នុងប្រវត្តិសាស្ត្រដែលអាចទទួលបានចំណាត់ថ្នាក់ Perfect All-Kill ច្រើនបំផុត បន្ទាប់ពីបទ “Golden” ដែលកាន់កាប់កំណត់ត្រាលេខ១ ជាមួយការជាប់ ១៤៨៤ ដង។ ចំណាត់ថ្នាក់លេខ៣ គឺបទ “Ditto” របស់ NewJeans បានជាប់ ៦៥៥ ដង ស្របពេលចំណាត់ថ្នាក់លេខ ៤ គឺបទ “Dynamite” របស់ BTS បានជាប់ ៦១០ ដង និងចំណាត់ថ្នាក់លេខ ៥ គឺបទ “Celebrity” របស់ IU បានជាប់ ៤៦២ ដង ៕


























Account
Security
Favourite Content