ក្រោយអាចកើបចំណូលបានជាង ៣០ លានដុល្លារនៅអាស៊ី នៅពេលនេះភាពយន្តដ៏ល្បីបំផុតប្រចាំឆ្នាំ២០២៤ របស់ប្រទេសថៃ រឿង “ចៅយាយ” ឬ “How to Make Millions before Grandma Dies” កំពុងប៉ុនប៉ងបំបែកកំណត់ត្រាភាពយន្តថៃរកចំណូលច្រើនបំផុតក្នុងប្រវត្តិសាស្ត្រ តាមរយៈការចេញបញ្ចាំងទូទាំងពិភពលោក។
ផលិតដោយស្ទូឌីយោល្បីឈ្មោះ GDH ភាពយន្ត “How to Make Millions before Grandma Dies” បានចាក់ដោតអារម្មណ៍ទស្សនិកជនជាមួយនឹងរឿងរ៉ាវរបស់ចៅប្រុសដែលលាឈប់ពីការងារមកមើលថែលោកយាយកំពុងជិតស្លាប់ក្នុងបំណងចង់បានកេរ្តិ៍មរតករបស់គាត់។ ភាពយន្តនេះដែរគឺជាស្នាដៃដឹកនាំកុនដំបូងរបស់លោក Pat Boonnitipat ហើយក៏ជាស្នាដៃសម្ដែងភាពយន្តលើកដំបូងដូចគ្នាសម្រាប់តួអង្គលោកយាយ គឺតារាវ័យ ៧៨ ឆ្នាំ Usha Seamkhum ខណៈសម្រាប់តារាចម្រៀងនិងសម្ដែងយុវវ័យ Billkin Putthipong ដែលជាតួអង្គចៅប្រុស នេះគឺជាការសម្ដែងភាពយន្តខ្នាតធំទី២ បន្ទាប់ពីរឿង “Brother of the Year” កាលពីឆ្នាំ២០១៩។
បន្ទាប់ពីអាចរកចំណូលបាន ៣៤ លានដុល្លារពីការបញ្ចាំងក្នុងតំបន់អាស៊ីអាគ្នេយ៍ អូស្ត្រាលី និងនូវែលសេឡង់ និងបានក្លាយជាភាពយន្តថៃដែលរកចំណូលបានច្រើនជាងគេមិនធ្លាប់មាននៅក្នុងប្រទេសឥណ្ឌូនេស៊ី ម៉ាឡេស៊ី សិង្ហបុរី ហ្វីលីពីន មីយ៉ាន់ម៉ា អូស្ត្រាលី និងនូវែលសេឡង់ ចុងក្រោយនេះ ក្រុមហ៊ុន GDH បានប្រកាសថាខ្សែភាពយន្តនេះនឹងត្រូវចេញបញ្ចាំងនៅចិន នៅថ្ងៃទី ២៣ ខែសីហា នៅអាមេរិកខាងជើងក្នុងខែកញ្ញា នៅកូរ៉េខាងត្បូង និងហូឡង់ក្នុងខែតុលា នៅប្រទេសបែលហ្សិក ក្នុងខែវិច្ឆិកា នៅចក្រភពអង់គ្លេស ឥណ្ឌា និងនៅអៀរឡង់ ក្នុងខែធ្នូ។
សម្រាប់បច្ចុប្បន្ននេះ ភាពយន្តថៃដែលអាចរកចំណូលទូទាំងពិភពលោកបានច្រើនជាងគេគឺភាពយន្តសិស្សឆ្នើមកំពូលល្បិច “Bad Genius” ដែលផលិតដោយ GDH ដូចគ្នា ដោយអាចរកចំណូលសរុបបាន ៤១ លានដុល្លារ បន្ទាប់ពីទទួលបានជោគជ័យខ្លាំងក្នុងប្រទេសចិន៕