ទីបំផុតអ្វីដែលមហាជនទន្ទឹងរង់ចាំអស់រយៈពេលជាយូរពេលនេះបានក្លាយជាការពិតហើយ ដែលពេលនេះចម្រៀងមានអត្ថន័យផ្សាភ្ជាប់នឹងប្រវត្តិសាស្ត្រខ្មែរ «ទេវរាជ» របស់កំពូលតារាចម្រៀង ទេព បូព្រឹក ត្រូវបានអនុញ្ញាតឱ្យថតលើទឹកដីប្រវត្តិសាស្ត្រខ្មែរ «យសោធបុរៈ» ដែលជាអតីតរាជធានីទីពីរនៃអាណាចក្រខ្មែរ ត្រូវបានកសាងដោយ ព្រះបាទយសោវរ្ម័នទី១ នៅចុងសតវត្សទី៩ ឆ្នាំ៨៩៣ និងមានភ្នំបាខែងនៅចំកណ្ដាល។


បើតាមទំព័រហ្វេសប៊ុកផេករបស់អ្នកនាង ទេព បូព្រឹក្ស បានឱ្យដឹងថា ៖ «ថ្ងៃនេះយើងខ្ញុំរៀបចំពិធីប្រុងពលីដើម្បីរៀបចំថត M/V ‘ ទេវរាជ ‘ នៅលើដែនដីយសោធរដោយចាប់ផ្តើមពីថ្ងៃទី ១៦ រហូត ដល់ថ្ងៃទី ១៩ ។ ដំណើរការនេះអាចរលូនទៅបានដោយមានការសហការសម្រួលការងារពី ក្រសួងវប្បធម៌ និងវិចិត្រសិល្ប: ក៏ដូចជាអាជ្ញាធរអប្សរា អាជ្ងាធរជាតិសំបូរព្រៃគុក និង អាជ្ញាធរជាតិព្រះវិហារ»។


ពិធីក្រុងពាលី ត្រូវបានធ្វើឡើងយ៉ាងអធឹមអធម មានជាការថ្វាយភ្លេង ដង្វាយគ្រប់សព្វមានផ្លែឈើ គ្រឿងធូបទៀន ដែលធ្វើឡើងទៅតាមប្រពៃណីតាំងពីបុរមបុរាណ ដឹកនាំឱ្យដោយអាចារ្យមានជំនាញច្បាស់លាស់។ ការធ្វើពិធីក្រុងពាលីនេះ គឺដើម្បីសុំសេចក្ដីសុខ សូមឱ្យដំណើរការថតប្រព្រឹត្តិទៅដោយរលូន ហើយពិធីនេះគឺជាការសុំអនុញ្ញាតពីម្ចាស់ទឹកម្ចាស់ដីដែលនៅគង់ថែរក្សា។


បទ «ទេវរាជ» គឺជាចម្រៀងមួយដែលមានអត្ថន័យជ្រាលជ្រៅ រៀបរាប់ពីភាពរុងរឿងនៃអាណាចក្រខ្មែរ តាំងពីសម័យនគរភ្នំ រហូតដល់សម័យអង្គរ មានរៀបរាប់តាំងពីក្បួនទ័ព ការធ្វើសឹកចម្បាំង អក្សរសាស្ត្រ អក្សរសិល្បិ៍ កេរ្តិ៍ដំណែលរបស់បុព្វបុរសខ្មែរជាច្រើនទៀត។ ការថតចម្រៀងមួយបទនេះ លើទឹកដីអង្គរ គឺពិតជាស័ក្ដិសមទៅនឹងអត្ថន័យ និងក្លាយជាចំណែកមួយជួយផ្សព្វផ្សាយពីប្រទេសកម្ពុជា ទៅកាន់ពិភពលោកផងដែរ៕
























Account
Security
Favourite Content