សេចក្ដីរាយការណ៍ពីសារព័ត៌មាន Reuters បានបង្ហាញថា ក្រុមការងារថតរឿងភាគល្បីរបស់ Netflix “Emily in Paris” បានបន្តការថតនៅទីក្រុង Venice ប្រទេសអ៊ីតាលីឡើងវិញហើយ បន្ទាប់ពី Diego Borella ដែលជាជំនួយការអ្នកដឹកនាំរឿង បានទទួលមរណភាពយ៉ាងនឹកស្មានមិនដល់ កាលពីថ្ងៃទី ២១ ខែសីហា។

ជំនួយការដឹកនាំ លោក Diego Borella បានស្លាប់ក្នុងវ័យ ៤៧ ឆ្នាំខណៈពេលកំពុងថតរឿង “Emily in Paris” រដូវកាលទី ៥ នៅទីក្រុង Venice បន្ទាប់ពីសន្លប់បាត់ស្មារតី។ សេចក្តីរាយការណ៍បឋមបង្ហាញថា លោកបានស្លាប់ដោយសារគាំងបេះដូងភ្លាមៗ។ Paramount Television Studios បានចេញសេចក្តីថ្លែងការណ៍មួយតាមរយៈសារព័ត៌មាន PEOPLE ដោយនិយាយថា “យើងមានសេចក្តីសោកស្ដាយជាខ្លាំងដែលត្រូវបញ្ជាក់ពីការស្លាប់ភ្លាមៗរបស់សមាជិកគ្រួសារ Production នៃភាពយន្ត “Emily in Paris”។ ពួកយើងសូមចូលរួមរំលែកទុក្ខជាមួយគ្រួសារ និងមនុស្សជាទីស្រលាញ់របស់លោកក្នុងពេលវេលាដ៏លំបាកនេះ”។
ក្រោយមកនៅថ្ងៃទី ២៣ ខែសីហា តារាស្រី Lily Collins ដែលសម្ដែងជាតួឯកក្នុងរឿង “Emily in Paris” បានត្រលប់មកកន្លែងថតវិញ ហើយបានថតរឿងជាបន្ត។ Lily Collins ត្រូវបានគេប្រទះឃើញថតឈុតលើទូកជាមួយនឹងតារាសម្ដែងសំខាន់ផ្សេងទៀតដូចជា Eugenio Franceschini, Ashley Park និង Paul Forman។ Emily in Paris រដូវកាលទី ៥ គ្រោងនឹងចាក់បញ្ចាំងលើកដំបូងនៅលើ Netflix ខែធ្នូនេះ។
សូមបញ្ជាក់ថា Diego Borella គឺជាអ្នកដឹកនាំ និងនិពន្ធរឿងមកពីទីក្រុង Venice និងធ្លាប់បានធ្វើការនៅទីក្រុងរ៉ូម ទីក្រុងឡុងដ៍ និងញូវយ៉ក។ ក្រៅពីនេះ លោកក៏មានស្នាដៃផ្នែកសិល្បៈ និងអក្សរសាស្ត្រផងដែរ។ Diego Borella គឺជាអ្នករស់នៅក្នុងតំបន់ម្នាក់ដែលត្រូវបានជួលជាជំនួយការអ្នកដឹកនាំរឿង Emily in Paris ខណៈដែលពួកគេថតនៅទីក្រុង Venice ។ លោកបានស្លាប់ខណៈពេលកំពុងរៀបចំថតឈុតចុងក្រោយនៅក្នុងសណ្ឋាគារ Danieli បើទោះបីជាមានការខិតខំប្រឹងប្រែងជួយសង្រ្គោះពីសំណាក់បុគ្គលិកពេទ្យក៏ដោយ ៕


























Account
Security
Favourite Content