បន្ទាប់ពីក្រុមហ៊ុន HYBE បានលក់ភាគហ៊ុនរបស់ខ្លួននៅ SM ទាំងអស់ទៅឱ្យក្រុមហ៊ុនចិន Tencent Music នៅថ្ងៃទី ២៩ ខែឧសភានេះ អ្នកវិភាគវប្បធម៌ម្នាក់បានចែករំលែកជាមួយនឹងសារព័ត៌មាន Ten Asia ថា វត្តមានរបស់ក្រុមហ៊ុនចិននៅក្នុងវិស័យកម្សាន្តកូរ៉េខាងត្បូងអាចនឹងផ្ដោតលើកម្រៃក្នុងរយៈពេលខ្លី តែប៉ះពាល់ដល់វិស័យនេះក្នុងរយៈពេលវែង។

យោងតាមរបាយការណ៍របស់ Financial Supervisory Service ក្រុមហ៊ុនតន្ត្រីដ៏ធំរបស់កូរ៉េខាងត្បូង HYBE បានសម្រេចលក់ភាគហ៊ុននៅ SM Entertainment ទាំងអស់ចំនួន ២.២១ លានហ៊ុនទៅឱ្យក្រុមហ៊ុនសញ្ជាតិចិន Tencent Music Entertainment ក្នុងតម្លៃ ២៤៣.៣ ពាន់លានវ៉ុន ឬប្រមាណ ១៧០លានដុល្លារអាមេរិក។
កិច្ចព្រមព្រៀងនេះ បានធ្វើឱ្យ Tencent Music ក្លាយជាម្ចាស់ភាគហ៊ុនធំទីបីក្នុងផលិតកម្ម SM Entertainment ជាមួយនឹងភាគហ៊ុនចំនួន ៩.៣៨ ភាគរយ ដោយអ្នកក្នុងវិស័យហិរញ្ញវត្ថុបានចាត់ទុកថា ក្រុមហ៊ុននេះគឺជាម្ចាស់ភាគហ៊ុនដែលមានអំណាចលំដាប់លេខ ២ បន្ទាប់ពី Kakao និង Kakao Entertainment។

នៅក្នុងរយៈពេលចុងក្រោយនេះ Tencent Music Entertainment មានកេរ្តិ៍ឈ្មោះល្បីល្បាញ ក្នុងនាមជាអ្នកវិយោគចិននៅក្នុងឧស្សាហកម្មកម្សាន្តកូរ៉េខាងត្បូងដ៏សំខាន់មួយរូប ដោយអ្នកជំនាញក្នុងឧស្សាហកម្មនេះ បានប៉ាន់ស្មានថា ការបន្តវិយោគរបស់ក្រុមហ៊ុនចិនអាចនឹងជាសញ្ញានៃការលុបចោលការហាមឃាត់ មាតិកាកម្សាន្តរបស់កូរ៉េពីរដ្ឋាភិបាលចិន តាំងតែពីឆ្នាំ ២០១៦។ ជាក់ស្ដែង ក្រៅពី SM ក្រុមហ៊ុននេះក៏ជាម្ចាស់ភាគហ៊ុននៅក្នុងក្រុមហ៊ុនដូចជា Kakao, Kaoko Entertainment និង YG Entertainment ផងដែរ។
ផ្អែកតាមហេតុនេះ អ្នកជំនាញបានយល់ឃើញថា វត្តមានរបស់ក្រុមហ៊ុនចិនខាងលើ អាចនឹងមកផលប៉ះពាល់ដល់ការប្រកួតប្រជែងក្នុងស្រុក។ លើសពីនេះ ក៏អាចប៉ះពាល់ដល់អត្តសញ្ញាណនៃវិស័យខេប៉ុប ឥទ្ធិពលនៃយីហោ K-branding និងផលអវិជ្ជមានទៅលើរូបភាពរបស់វិស័យកម្សាន្តរបស់កូរ៉េទាំងមូលផងដែរ។

ជាក់ស្ដែងលោក Kim Heon-sik ដែលជាអ្នកវិភាគខាងវប្បធម៌បានរៀបរាប់ថា៖ “ហេតុការណ៍នេះ យើងអាចនឹងមិនទទួលបានផលប្រយោជន៍នោះទេ ហើយថែមទាំងត្រូវចែកប្រាក់ចំណេញជាមួយនឹង Tencent Music ទៀតផង”។
លោកបានបង្ហាញការព្រួយបារម្ភថា៖ “នៅក្នុងប្រទេសចិន មាតិកាដែលទាក់ទងនឹងរឿងនយោបាយ គឺត្រូវបានប្រើប្រាស់ជាគោល អ៊ីចឹង តើ K-pop និង K-content នឹងទទួលបានជោគជ័យក្នុងទីផ្សារបែបនេះទេ? ចិន គឺខុសពីទីផ្សារដទៃ រឿងនយោបាយគឺសំខាន់ណាស់”។
លោក Kim Heon-sik បានបន្ថែមថា វត្តមានរបស់ Tencent Music អាចនឹងប៉ះពាល់ដល់ទស្សនៈរបស់ថ្នាក់គ្រប់គ្រងទាំងមូល។ លោកបន្តទៀតថា ក្រុមហ៊ុនចិន ក៏មានកេរ្តិ៍ឈ្មោះអវិជ្ជមាននៅក្នុងទីផ្សារក្នុងស្រុក និងសហរដ្ឋអាមេរិកដែរ ឯរឿងបញ្ហាហានិភ័យទិន្នន័យផ្ទាល់ខ្លួនរបស់ក្រុមហ៊ុន ក៏ជារឿងដែលគួរឱ្យគិតដែរ៕

























Account
Security
Favourite Content