អត្តពលិកកម្ពុជាទទួលបានមេដាយ ១៨ គ្រឿងពីព្រឹត្តិការណ៍ប្រកួតកីឡារាំជើងឯកអាស៊ី និងជើងឯកអាស៊ីអាគ្នេយ៍ ឆ្នាំ ២០២៥ (WDSF Asian-South East Asian Championship 2025) នៅប្រទេសវៀតណាមកាលពីពេលថ្មីៗ។ នេះបើយោងតាមការបញ្ជាក់ពីសំណាក់សហព័ន្ធកីឡារាំកម្ពុជា លើបណ្ដាញសង្គម។

ព្រឹត្តិការណ៍ប្រកួតកីឡារាំជើងឯកអាស៊ី និងជើងឯកអាស៊ីអាគ្នេយ៍ ឆ្នាំ ២០២៥ (WDSF Asian-South East Asian Championship 2025) នៅវៀតណាម ដែរប្រព្រឹត្តទៅចាប់ពីថ្ងៃទី៩ ដល់ថ្ងៃទី១៣ ខែកក្កដា ឆ្នាំ ២០២៥ ដោយមានអត្តពលិកចូលរួមប្រកួតប្រហែល ៣០០០ នាក់ មកពី ៣៧ ប្រទេស ក្នុងនោះកម្ពុជាបានបញ្ជូនប្រតិភូ គ្រូបង្វឹក និងអត្តពលិកសរុប ២១នាក់។ នេះជាការលើកឡើងលោកស្រី ហង់ ស៊ីមន អគ្គលេខាធិការសហព័ន្ធកីឡារាំកម្ពុជា។
លោកស្រីអគ្គលេខាធិការបានបញ្ជាក់ថា លទ្ធផលនៃការប្រកួតកីឡារាំជើងឯកអាស៊ី និងជើងឯកអាស៊ីអាគ្នេយ៍ ឆ្នាំ២០២៥ (WDSF Asian-South East Asian Championship 2025) នៅទីក្រុងហូជីមិញ ប្រទេសវៀតណាម ក្រុមកីឡារាំជម្រើសជាតិកម្ពុជា ទទួលបានមេដាយសរុប ១៨ គ្រឿងរួមមាន មេដាយមាស ៣ គ្រឿង, ប្រាក់ ៤ គ្រឿង និងសំរឹទ្ធ ១១ គ្រឿង។

ក្រោយបញ្ចប់បេសកកម្មជិត ១សប្ដាហ៍ ប្រតិភូ គ្រូបង្វឹក និងកីឡាករ-កីឡាការិនីទាំងអស់ បានត្រឡប់មកដល់មាតុភូមិវិញ ដោយសុវត្ថិភាព កាលពីល្ងាចថ្ងៃ១៤ ខែកក្កដាកន្លងទៅ ដោយទទួលបានការស្វាគមន៍ពីសំណាក់លោកស្រី ញ៉ែម មរកត រដ្ឋលេខាធិការក្រសួងកិច្ចការនារី និងជាប្រធានសហព័ន្ធកីឡារាំកម្ពុជា ព្រមទាំងថ្នាក់ដឹកនាំសហព័ន្ធផ្សេងទៀត៕






រូបភាព៖ Cambodia DanceSport Federation























Account
Security
Favourite Content