សមាជិកក្រុម BTS ៣ រូបរួមមាន V, Jimin និង Jungkook បានបង្កើតកំណត់ត្រាថ្មីមួយទៀតហើយដោយបានក្លាយជាតារាចម្រៀងខេប៉ុបដំបូងដែលទទួលបានការចូលស្ដាប់ចម្រៀងលើស ១០០លានដងលើ Spotify សម្រាប់អាល់ប៊ុមទោលរបស់ពួកគេក្នុងសប្តាហ៍ដំបូង។
សម្រាប់សមិទ្ធិផលដ៏អស្ចារ្យនេះ អាល់ប៊ុម GOLDEN របស់ Jungkook បាននាំមុខគេជាមួយនឹងការចូលស្ដាប់ចំនួន ២១៤ លានដង តាមពីក្រោយដោយអាល់ប៊ុម MUSE របស់ Jimin បានទទួលការចូលស្ដាប់ចំនួន ១៤០ លាន និងអាល់ប៊ុម LAYOVER របស់ V មានការចូលស្ដាប់សរុប ១០១ លានដង។ សមិទ្ធិផលរបស់អ្នកទាំងបីបានឆ្លុះបញ្ចាំងពីប្រជាប្រិយភាពមិនធម្មតារបស់ពួកគេ និងការកើនឡើងខ្លាំងនៃសន្ទុះមកកាន់វិស័យចម្រៀង K-pop នៅលើឆាកតន្ត្រីពិភពលោក។

គួររំឭកថា អាល់ប៊ុម GOLDEN របស់ Jungkook បានចេញកាលពីថ្ងៃទី៣ ខែវិច្ឆិកា ឆ្នាំ២០២៣ ដែលមានបទល្បីៗដូចជា SEVEN និង 3D និងមានការសហការជាមួយតារាចម្រៀងអន្តរជាតិជាច្រើនដូចជា Jack Harlow, Major Lazer, Latto និង DJ Snake ។ អាល់ប៊ុមនេះបានបំបែកកំណត់ត្រាការលក់បានរហូតដល់ ២,៤ លានបន្ទះជុំវិញពិភពលោក។
ចំណែកអាល់ប៊ុម MUSE របស់ Jimin គឺទើបតែចេញផ្សាយកាលពីថ្ងៃទី១៩ ខែកក្កដានេះប៉ុណ្ណោះ និងបានទទួលការគាំទ្រជាខ្លាំង បើទោះជា Jimin មិនបានចេញមុខផ្សព្វផ្សាយដោយសារកំពុងជាប់ភារកិច្ចយោធាក៏ដោយ។ អាល់ប៊ុមនេះមានបទចម្រៀងលេចធ្លោដូចជាបទ “Who” ជាបទនាំមុខ, បទ “Smeraldo Garden Marching Band” ដែលមានការសហការជាមួយតារារ៉េប Loco, បទ “Closer Than This” ដែល Jimin ច្រៀងផ្ញើជូន ARMYs និងបទ “Slow Dance” ដែលមានការសហការជាមួយ Sofia Carson ជាដើម។
ចំណែកអាល់ប៊ុម LAYOVER របស់ V បានចេញកាលពីថ្ងៃទី៨ ខែកញ្ញា ឆ្នាំ២០២៣ និងអាចបំបែកកំណត់ត្រាការលក់ក្នុងថ្ងៃដំបូងបានដល់ ១,៦៧ លានបន្ទះ។ អាល់ប៊ុមដែលមានបទចម្រៀងសរុបចំនួន ៦បទនេះបានបង្ហាញនូវរសជាតិតន្ត្រីថ្មីពី V ដែលគ្រប់គ្នាមិនធ្លាប់បានឃើញពេលគេច្រៀងជាមួយក្រុម BTS ដូចជាបទ “Love Me Again”, “Rainy Days” និង “Slow Dancing” ជាដើម ៕























Account
Security
Favourite Content