ក្រុមចម្រៀងខេប៉ុប BTS នឹងធ្វើការវិលត្រឡប់មកឆាកតន្ត្រីវិញជាមួយអាល់ប៊ុមខ្នាតពេញ ទីប្រាំរបស់ខ្លួន នៅថ្ងៃទី ២០ ខែមីនា ដែលនឹងមានបទចម្រៀងថ្មីចំនួន ១៤ បទ ឆ្លុះបញ្ចាំងពីគំនិត និងបទពិសោធន៍ផ្ទាល់ខ្លួនរបស់សមាជិក។ នេះបើផ្អែកតាម BigHit Music ដែលជាផលិតកម្មរបស់ពួកគេបានឱ្យដឹងនៅថ្ងៃចន្ទនេះ។

អាល់ប៊ុមថ្មីនេះគឺជាអាល់ប៊ុមខ្នាតពេញដំបូងរបស់ក្រុមចម្រៀងមួយនេះក្នុងរយៈពេលជាងប្រាំមួយឆ្នាំ គិតចាប់តាំងពីអាល់ប៊ុម “Map of the Soul: 7” បានចេញក្នុងខែកុម្ភៈ ឆ្នាំ ២០២០ និងជាគម្រោងជាក្រុមដំបូងរបស់ពួកគេចាប់តាំងពីអាល់ប៊ុម “Proof” ក្នុងខែមិថុនា ឆ្នាំ ២០២២។
BigHit Music បានរៀបរាប់ថា៖ “ដោយមានភាពស្មោះត្រង់ចំពោះអត្តសញ្ញាណរបស់ពួកគេក្នុងនាមជាសិល្បករដែលបង្ហាញពីខ្លួនឯងតាមរយៈតន្ត្រី BTS បានខិតខំប្រឹងប្រែងដើម្បីចងក្រងខ្លឹមសារនៃទិដ្ឋភាពជីវិតពួកគេនាពេលបច្ចុប្បន្នសម្រាប់អាល់ប៊ុមនេះ” ដោយកត់សម្គាល់ផងដែរថាការផលិតអាល់ប៊ុមនេះគឺជាការផ្តោតសំខាន់របស់ក្រុមពេញមួយឆមាសទីពីរនៃឆ្នាំមុន។
ផលិតកម្មបានបន្ថែមថា បទចម្រៀងនីមួយៗ មានអារម្មណ៍ និងការឆ្លុះបញ្ចាំងដែលកើតចេញពីការធ្វើដំណើរ និងការដឹងគុណរបស់សមាជិកចំពោះអ្នកគាំទ្ររបស់ពួកគេ ដែលត្រូវបានគេស្គាល់ថាជា ARMY។
ទន្ទឹមនឹងការចេញអាល់ប៊ុមថ្មី ក្រុមចម្រៀង BTS ក៏ត្រូវបានគេរំពឹងថានឹងបង្ហាញព័ត៌មានលម្អិតនៃការប្រគំតន្ត្រីទេសចរណ៍ពិភពលោកនៅថ្ងៃទី ១៤ ខែមករាផងដែរ ដោយការប្រគំតន្ត្រីនេះនឹងជាការប្រគំតន្ត្រី World Tour លើកទីមួយរបស់ក្រុមចាប់តាំងពីការប្រគំតន្ត្រី “Permission to Dance on Stage” បានបញ្ចប់នៅ Las Vegas ក្នុងខែមេសា ឆ្នាំ ២០២២។
សម្រាប់ការផ្សព្វផ្សាយការវិលត្រឡប់មកវិញលើកនេះដែរ BTS ក៏បានបើកដំណើរការគេហទំព័រផ្លូវការថ្មីមួយគឺ 2026bts.com ដោយព័ត៌មានថ្មីៗអំពីអាល់ប៊ុម និងដំណើរប្រគំតន្ត្រីទេសចរណ៍នឹងត្រូវបានចេញផ្សាយនៅទីនោះ ៕
























Account
Security
Favourite Content