ភាពយន្ត Anora បានបំបែកកំណត់ត្រាម្ដងទៀត ក្នុងនាមជាភាពយន្តដែលមានចំណូលកើនឡើងខ្លាំង បន្ទាប់ពីភាពជោគជ័យនៅក្នុងកម្មវិធីប្រគល់ពានរង្វាន់លំដាប់ពិភពលោក Academy Awards លើកទី ៩៧។

គេហទំព័រ The Numbers បានឱ្យដឹងថា ក្រោយពីទទួលបានពានរង្វាន់ពីកម្មវិធីខាងលើនេះ ចំនួនរោងភាពយន្តដែលចាក់បញ្ចាំងរឿង Anora មានការកើនឡើងលើសពីទ្វេរដង ពី ៨០៨រោង ទៅ ១៩៣៨រោងជុំវិញសហរដ្ធអាមេរិក នាំឱ្យចំណូលនៃភាពយន្តមួយចំណងជើងនេះ ក៏មានការឡើងដូចគ្នាដែរ ក្នុងទំហំ ៥៩៥ភាគរយ បើធៀបនឹងចំណូលក្នុងមួយសប្ដាហ៍ មុនពេលដែលកម្មវិធីអូស្ការមកដល់។
ជាក់ស្ដែង តួលេខក្នុងមួយសប្ដាហ៍ចុងក្រោយនោះបានបង្ហាញថា ភាពយន្តខាងលើអាចរកចំណូលបាន ១.៨៦លានដុល្លារអាមេរិក ជាចំនួនដែលហក់ឡើងខ្លាំងបើធៀបនឹងពីសប្ដាហ៍មុន ដែលអាចរកបានត្រឹមតែ ២៦៧ ៦២៥ដុល្លារអាមេរិកតែប៉ុណ្ណោះ។ បូករួមទាំងចំណូលពីការចាក់បញ្ចាំងពីជុំវិញពិភពលោក បច្ចុប្បន្នភាពយន្តមួយនេះអាចរកបានរហូតដល់ទៅ ៤៦.២លាន ចាត់ទុកជាភាពយន្ដដែលជោគជ័យបំផុតមួយ ព្រោះផលិតកម្ម Neon បានចំណាយទុនផលិតត្រឹមតែ ៦លានដុល្លារអាមេរិកតែប៉ុណ្ណោះ។

បន្ថែមពីនេះ បើប្រៀបធៀបនឹងភាពយន្តដែលបានចាក់ផ្សាយ ក្រោយពីឈ្នះពានរង្វាន់ភាពយន្តឆ្នើមប្រចាំឆ្នាំ ពីអូស្ការ Anora ជារឿងដែលមានចំណូលកើនឡើងច្រើនបំផុត។ តួយ៉ាង ក្រោយពីទទួលបានពានតែមួយនេះ ចំណូលរឿង Oppenheimer អាចកើនបាន ១៧១.២ភាគរយ ស្របពេលដែលរឿង Everything Everywhere All at Once អាចកើនបាន ២៧២.៩ភាគរយ រឿង Parasite អាចកើនបាន ២៤៥.៣ភាគរយ រឿង Green Book អាចកើនបាន ១១៤.៩ ភាគរយ ឯរឿង The Shape of Water អាចកើនបានត្រឹម ៥៨.៧ភាគរយតែប៉ុណ្ណោះ។
គួរបញ្ជាក់ផងដែរថា ភាពយន្តពីជីវិតរបស់នារីរកស៊ីផ្លូវភេទ និងកូនប្រុសមហាសេដ្ឋីរុស្សីមួយនេះ អាចដណ្ដើមបានពាន ៥ ពីកម្មវិធី Academy Awards លើកទី ៩៧ រួមមានពានរង្វាន់ ភាពយន្តឆ្នើមប្រចាំឆ្នាំ, តួឯកស្រីឆ្នើមសម្រាប់តារាស្រី Mikey Madison, អ្នកដឹកនាំរឿងឆ្នើម សម្រាប់លោក Sean Baker, ការកាត់តឆ្នើម និងពានរង្វាន់ អត្ថបទភាពយន្តដើមឆ្នើម៕


























Account
Security
Favourite Content