ព្រឹទ្ធាចារ្យ គង់ ណៃ មានគោរមងារជាកោសល្យវោហារ ជាសិល្បករចាប៉ីដងវែង មកពីខេត្តកំពត ជាមរតកមនុស្សរស់នៃប្រទេសកម្ពុជាផ្នែកវប្បធម៌ ដែលលោកមានស្នាដៃយ៉ាងធំធេងរក្សាកេរដំណែលដូនតាខ្មែរ គឺចាប៉ីដងវែង។ព្រឹទ្ធាចារ្យគឺជាបុគ្គលទី៣នៃកម្ពុជា ដែលទទួលបានពានហ្វ៊ុកុអូកាលើកទី២៨ ពីប្រទេសជប៉ុន។ ដោយឡែកពេលនេះស្ថានភាពសុខភាពព្រឹទ្ធាចារ្យកាន់តែយ៉ាប់យឺនទៅពីមួយថ្ងៃទៅមួយថ្ងៃ ស្របពេលស្ថានភាពសេដ្ឋកិច្ចក៏មិនសូវល្អប្រសើរ រកប្រាក់ឱ្យថ្លៃពេទ្យសឹងមិនបាន។
រៀបរាប់មកកាន់ AMS Infotainment លោក គង់ សម័យ ដែលជាកូនប្រុសបង្កើតរបស់លោកតា គង់ ណៃ បានរៀបរាប់ពីស្ថានភាពជំងឺលោកឪពុកថា ពេលនេះបានធូរស្បើយ ៣៥% ហើយ ដោយក្នុងនោះលោកតា មានជំងឺជាច្រើនមុខដូចជា ទឹកនោមផ្អែម សួត វង្វេង និងដើរមិនរួច។ លោក គង់ សម័យ បានឱ្យដឹងទៀតថា ការព្យាបាល គឺមានផលលំបាកច្រើន ដោយត្រូវចំណាយថវិកាក្នុងមួយខែខ្ទង់ ៥០០ដុល្លារ ហើយណាមួយត្រូវឡើងចុះភ្នំពេញ ទាំងលោកតាទ្រុឌទ្រោម និងជរាណាស់ទៅហើយ។
កូនប្រុសព្រឹទ្ធាចារ្យគង់ ណៃ បន្តថា ពេលនេះស្ថានភាពសេដ្ឋកិច្ចពិបាកខ្លាំង រកប្រាក់ដើម្បីទិញថ្នាំពេទ្យសឹងមិនបាន។ លោកថា ប្រាក់ដើម្បីផ្គត់ផ្គង់ព្យាបាលជំងឺឪពុក គឺមួយផ្នែកបានមកពីកូនៗ និងមួយផ្នែកទៀតបានមកពីប្រាក់បៀរវត្សរ៍របស់ឪពុក។ ជារៀងរាល់ខែត្រូវធ្វើដំណើរពីខេត្តកំពត មកភ្នំពេញ ដើម្បីតាមដានសុខភាព ត្រូវចំណាយពេលធ្វើដំណើរម្ដងៗ ៣ម៉ោង ទម្រាំដល់ ទាំងលោកតាស្ទើរគ្មានកម្លាំងកំហែងដើម្បីធ្វើដំណើរទេ។ កាន់តែពិបាកនោះគឺថ្លៃសោហ៊ុយចំណាយតែម្ដង។
បច្ចុប្បន្ននេះ ព្រឹទ្ធាចារ្យ គង់ ណៃ មានព្រះជន្ម ៧៨ វស្សា ទៅហើយ ខណៈការសម្ដែងលើវេទិកាផ្សេងៗ មិនអាចបន្តដូចមុនបានឡើយ ព្រោះសុខភាពហាក់មិនអំណោយផល។ ក្រោយព្យាបាលជាសះស្បើយលោកតានឹងបន្តអាជីពនេះជាបន្តទៀត ដើម្បីឱ្យកូនចៅជំនាន់ក្រោយបានស្គាល់ និងស្ដាប់តន្ត្រីដ៏ពីរោះរណ្ដំចេញពីដៃ និងថ្វីមាត់ព្រឹទ្ធាចារ្យ គង់ ណៃ ជាបន្តទៀត៕
លោក គង់ សម័យ