ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ជាការពិតមនុស្សម្នាក់ៗសុទ្ធតែចង់បានដៃគូជីវិតដែលច្បាស់លាស់អាចចាប់ដៃគ្នា រស់នៅជាមួយដល់ចាស់កោងខ្នង។ ជាមួយគ្នានេះដែរ ការសម្រេចចិត្តក្នុងការជ្រើសគូជីវិតរបស់យើងតែងតែមានច្រើនវិធី ច្រើនរបៀបផ្សេងៗគ្នា។ ដូច្នេះថ្ងៃនេះ AMS ក៏មានគន្លឹះខ្លីៗ ៥ ចំណុចដើម្បីចែករំលែកជូនប្រិយមិត្តដែលចង់សម្រេចច្បាស់ជាមួយមនុស្សជាទីស្រឡាញ់៖
១. តើស្រឡាញ់គេពិត ឬគ្រាន់ខ្លាចឯកា?
ពេលខ្លះការចាប់ផ្ដើមស្នេហារបស់មនុស្សម្នាក់ៗឡើងដោយអារម្មណ៍ខុសៗគ្នា ដូច្នេះហើយមុនពេលសម្រេចចិត្តថាចង់បាននរណាម្នាក់ជាដៃគូជីវិត យើងចាំបាច់សួរខ្លួនឯងសិនថាអារម្មណ៍នោះចេញពីចិត្តពិត ឬគ្រាន់តែជាអារម្មណ៍ដែលខ្លាចខ្លួនឯងរស់នៅក្នុងឯកា។ ដោយសារតែពួកគេជាមនុស្សដែលយើងត្រូវរស់នៅជាមួយអស់មួយជីវិត ជាមនុស្សម្នាក់ដែលនឹងផ្ញើវាសនាជាមួយគ្នា ដូច្នេះប្រសិនបើគិតមិនបានដិតដល់នោះទេ យើងនឹងក្លាយជាមនុស្សអាត្មានិយមម្នាក់ដែលបានចូលទៅបំផ្លាញជីវិត បំផ្លាញបេះដូងរបស់គេដោយមិនដឹងខ្លួន។
២. តើអាចទទួលយកការពិតគ្រប់បែបយ៉ាងរបស់គ្នាបាន ឬនៅ?
មនុស្សម្នាក់ៗសុទ្ធតែមានអតីតកាល និងភាពជាខ្លួនឯង ហើយចំណុចនេះផងដែរភាគច្រើនមនុស្សយើងអាចមិនសូវបានគិតដិតដល់នោះទេនៅពេលចាប់ផ្ដើមស្រឡាញ់គ្នាដំបូងៗ។ ប៉ុន្តែដល់ពេលមួយដែលមានចិត្តចង់ច្បាស់លាស់ហើយ ចំណុចមួយនេះនឹងក្លាយជាចំណុចសំខាន់បំផុត។ ដើម្បីទទួលយកភាពជាខ្លួនឯងរបស់ដៃគូ យើងត្រូវតែរៀនបើកចិត្តស្វែងយល់ពីពួកគេ និងទទួលស្គាល់នូវអ្វីដែលជាធម្មជាតិរបស់ពួកគេឱ្យច្រើន។
ជាពិសេសមិនត្រូវយកភាពអាត្មានិយមរបស់ខ្លួនឯងទៅព្យាយាមកែប្រែនរណាម្នាក់ឱ្យដូចចិត្តខ្លួនឯងចង់បានឡើយ។ ប្រសិនបើធ្វើដូច្នេះ វាមិនខុសពីខ្យល់ដែលគេបញ្ចូលក្នុងប៉េងប៉ោងនោះទេ ដល់ពេលដែលទទួលយកលែងបាន វានឹងបែកធ្លាយមិនសល់ទម្រង់ដើមសូម្បីបន្តិច។
៣. តើអាចប្រាស្រ័យទាក់ទងគ្នា និងយល់ពីគ្នាបានប៉ុណ្ណា?
កត្តាមួយដែលជាមូលហេតុនៃជម្លោះរវាងគូស្នេហ៍គឺការប្រាស្រ័យទាក់ទងគ្នាមិនបានស៊ីជម្រៅ។ មនុស្សម្នាក់ៗតែងតែមានអត្តចរិតខុសៗគ្នា ជាក់ស្ដែងមនុស្សខ្លះមានបញ្ហាចូលចិត្តនិយាយចេញមកក្រៅ ចំណែកឯអ្នកខ្លះវិញពេលមានបញ្ហាគឺមិននិយាយស្ដីអ្វីទាំងអស់ដោយសុខចិត្តបៀមបញ្ហានោះទុកម្នាក់ឯងរហូតដល់ពេលទ្រាំលែងបានដើរដល់ផ្លូវបំបែក។
ដូច្នេះពេលមានបញ្ហា ឬចម្ងល់ណាមួយត្រូវបើកចិត្តនិយាយគ្នា សួររកដំណោះស្រាយ ហើយចាំបាច់គួរជៀសវាងការស្ដីបន្ទោស ចោទប្រកាន់គ្នាឱ្យបានច្រើនតាមដែលអាចធ្វើបានព្រោះមិនមាននរណាម្នាក់ដែលអាចដឹងចិត្តយើងបានគ្រប់ពេលនោះទេ។ ជាពិសេសនៅពេលមានបញ្ហាព្យាយាមឱ្យមែនទែនគឺកុំនិយាយប្រាប់អ្នកដទៃញឹកញាប់ពេកព្រោះក្រោយនិយាយហើយ យើងមិនប្រាកដនោះទេថាពួកគេមានបំណងល្អជាមួយយើងទាំងអស់ឡើយ។
៤. មកដល់ពេលនេះ តើមានអារម្មណ៍ហត់ខ្លាំងដែរទេ?
ប្រសិនបើទាក់ទងគ្នាយូរទោះមានរឿងតិចតួចមែន ប៉ុន្តែមិនមានអារម្មណ៍ធុញថប់ ឬអារម្មណ៍នឿយហត់ នោះអាចត្រូវបានចាត់ទុកជាសញ្ញាល្អមួយក្នុងការចាប់ដៃគ្នាកសាងគ្រួសារហើយ។ ប៉ុន្តែបើទាក់ទងគ្នាយូរទៅ បែរជាមានអារម្មណ៍នឿយហត់ខុសពីពេលចាប់ផ្ដើមដំបូងដោយសារយើងចង់បានស្នេហាមួយមានភាពឥតខ្ចោះពេករហូតត្រូវសម្របតាមអ្នកម្ខាងទៀត បាត់បង់ភាពជាខ្លួនឯង ធ្វើអ្វីមិនមែនចំណូលចិត្តរបស់ខ្លួន និងមិនយល់ចិត្តគ្នាជាដើម នោះមិនមែនជាសញ្ញាល្អឡើយ។ ប្រសិនបើបន្ដរស់នៅគ្នាជាមួយទាំងមានអារម្មណ៍បែបនេះ នោះបើទោះបីជាអាចកសាងគ្រួសារក៏ដោយ ក៏មិនប្រាកដថាអាចមានសុភមង្គលដែរ។
៥. មិត្តភ័ក្ដិជុំវិញខ្លួនជាមនុស្សបែបណា?
ស្ដាប់មើលទៅហាក់ដូចជាកត្តាមួយនេះមិនមែនជារឿងធំដុំអ្វីនោះទេ ប៉ុន្តែរឿងហើយនេះក៏ជាចំណែកមួយដែលអាចធ្វើឱ្យទំនាក់ទំនងស្នេហាប្រេះឆាបានយ៉ាងងាយ។ ជារឿយៗមិនប្រាកដថាមនុស្សនៅជុំវិញខ្លួនទាំងអស់គ្នាសុទ្ធស្រឡាញ់រាប់អាន និងសាទរយើងចេញពីចិត្តនោះទេ។ មានន័យថាអ្នកខ្លះក៏ចាប់ផ្ដើមលួចមានចិត្តច្រណែន ឬចូលចិត្តញុះញង់ពន្លើសឱ្យឈ្លោះគ្នាជាដើម។
ប៉ុន្តែក៏នៅមានមិត្តខ្លះទៀតចាំជួយលើកទឹកចិត្ត ចាំជួយសម្រុះសម្រួល និងចាំផ្ដល់ដំបូន្មានល្អៗធ្វើយ៉ាងណាមិនឱ្យទំនាក់ទំនងរបស់មិត្តប្រេះស្រាំនោះទេ។ ដូច្នេះប្រសិនបើមានមនុស្សមិនល្អនៅជិត គប្បីព្យាយាមជៀសពីមនុស្សប្រភេទនោះឱ្យឆ្ងាយកាន់តែល្អ ៕
Account
Security
Favourite Content