ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
១. សួរបេះដូងខ្លួនឯងឱ្យច្បាស់៖ វិធីទីមួយនេះប្រហែលជាមិនសូវស្រួលប៉ុន្មានទេ ប៉ុន្តែត្រូវតែចាប់ផ្តើមឱ្យបាន។ បើអ្នកកំពុងធ្លាក់ក្នុងសម្ព័ន្ធភាពដែលឃ្លីងឃ្លោងរកត្រើយមិនឃើញនោះ ត្រូវដឹងពីវិធីដើម្បីផ្ទាត់អារម្មណ៍ទាំងនោះចេញឱ្យអស់។ រឿងដំបូងគឺត្រូវសួរខ្លួនឯងថា អ្នកមានអារម្មណ៍បែបណាឱ្យប្រាកដ។
រួចរកមូលហេតុដែលធ្វើឱ្យយើងមានអារម្មណ៍ថាគេមិនមានភាពច្បាស់លាស់ជាមុនសិន។ ប្រសិនបើអ្នកអាចរកចម្លើយបានហើយ អ្នកនឹងដឹងច្បាស់ថាតើខ្លួនគួរតែទ្រាំតទៅទៀត ឬគួរតែដើរចេញ? តែត្រូវចាំថា ចម្លើយទាំងអស់ត្រូវតែស្ថិតនៅលើការពិត ហាមចូលខ្សែខ្លួនឯង។ បើមិនដូច្នេះទេ អ្នកនឹងធ្លាក់ក្នុងវដ្តដដែលៗបែបនេះតទៅទៀត។
២. ព្យាយាមបង្ហើបដោយការសួរនាំគេជាមុន៖ ប្រសិនបើអ្នកនៅតែស្មុគម្នាក់ឯង វាក៏មិនបានអ្វីមកវិញដែរ។ ដូច្នេះប្រសិនបើមានឱកាសហើយអ្នកគួរតែសួរគាត់ទៅ។ ប្រាកដណាស់ថាវាជារឿងលំបាក ប៉ុន្តែបើមិនចង់ធ្លាក់នៅក្នុងស្ថានភាពមិនច្បាស់លាស់នេះទេ អ្នកគួរបង្ខំចិត្តធ្វើវាឱ្យបាន។
តែបើសិនជាអ្នកមិនមានភាពក្លាហានសួរត្រង់ៗទេ សាកធ្វើជាសួរបង្ហើរលមើល៍ក៏បាន វិធីនេះក៏អាចជួយឱ្យអ្នកដឹងថាត្រូវធ្វើខ្លួនបែបណាជាមួយគេ។ ប៉ុន្តែយ៉ាងណាក៏ដោយ គួរកាត់បន្ថយភាពអៀនខ្មាសរួចរកចម្លើយដែលជាការពិតវិញទៅ ដើម្បីរកស្នេហាដែលច្បាស់លាស់ទើបប្រសើរជាង។ ស្រីៗសម័យនេះត្រូវតែក្លាហាន។ អ្នកសាកគិតទៅមើល៍គ្រាន់តែសួរមិនមានខាតអ្វីទេ ប្រសិនបើគេបង្ហាញពីភាពច្បាស់លាស់យើងនឹងបានដើរក្នុងផ្លូវជាមួយគ្នាដោយសេចក្តីសុខ។ តែបើសិនជាគេបដិសេធឬមិនបង្ហាញភាពច្បាស់លាស់ អ្នកក៏នឹងមិនខាតពេលទៀតជាមួយគេដែរ។
៣. មើលឱ្យច្បាស់ថាជា “មិត្ត“ ឬ“ស្នេហា“៖ ពេលខ្លះយើងក៏មើលមិនដឹងមែន ថាទង្វើដែលគេធ្វើមកលើយើងក្នុងនាមជាមិត្តភក្តិឬជាស្នេហាឱ្យប្រាកដ។ មនុស្សប្រុសខ្លះធ្វើល្អជាមួយយើងពេក រហូតដល់ប្លែកចិត្តថា យើងជាមនុស្សពិសេសរបស់គេ ប៉ុន្តែដល់ពេលយើងចាប់ផ្តើមដាក់ចិត្តគេបែរជាមិនបានគិតអ្វីទៅវិញ។
ដូច្នេះមុននឹងជ្រុលខ្លួនក្នុងភាពស្រពេចស្រពិល ត្រូវចេះមើលពីសកម្មភាពដែលគេបានធ្វើមកលើអ្នក។ កុំអាលធ្លាក់ក្នុងអន្លង់ស្នេហ៍គេ ប្រើខួរក្បាលនិងបេះដូងដើម្បីពិចារណា។ ប្រសិនបើយើងបានដឹងតាំងពីដំបូង វាក៏មិនមានអ្វីនៅរាំងស្ទះក្នុងចិត្តទៀត។ កុំប្រញាប់គិតចូលខាងខ្លួនឯងពេក រង់ចាំឃើញភាពច្បាស់លាស់ហើយចាំសម្រេចចិត្តក៏មិនយឺតពេលដែរ។
៤. ធ្វើចិត្តឱ្យរឹងមាំ ហើយព្យាយាមរក្សាគម្លាតខ្លះ៖ សម្រាប់អ្នកដែលដឹងខ្លួនថាវាមិនច្បាស់លាស់ នឹងមានអាការៈមិនសប្បាយចិត្ត គ្មានសេចក្តីសុខក្នុងការធ្វើអ្វីឡើយ។ ដូច្នេះប្រសិនបើចង់អារម្មណ៍ដែលឆ្កួតៗបែបនេះ អ្នកត្រូវធ្វើចិត្តឱ្យរឹងមាំ ហើយរក្សាគម្លាតពីគេ។ មិនចាំបាច់ដល់ថ្នាក់មិនមើលមុខគ្នាឬព្យាយាមគេចឱ្យបាត់ស្រមោលនោះទេ គ្រាន់តែថយចេញពីគេម្តងបន្តិចៗ ដូចជា កាត់បន្ថយការជួបគ្នា និយាយគ្នា ទៅណាមកណាជាមួយគ្នា បន្ថយតាមដានគេជាពិសេសឆាតជាមួយគ្នា ឱ្យបានច្រើនបំផុតតាមដែលអាចធ្វើទៅបាន ឬកុំយកចិត្តទុកដាក់ពីគេក៏បាន។ វាអាចនឹងពិបាកបន្តិច តែបើអត់ធ្មត់បានតែមួយរយៈគ្រប់យ៉ាងនឹងល្អប្រសើរឡើងវិញ ហើយនឹងមានអារម្មណ៍ថាខ្លួនពូកែជាងមុន។
៥. បើដឹងថាគេមិនស្រឡាញ់ កុំនៅតែផ្តល់ក្តីសង្ឃឹមដល់ខ្លួនឯងទៀត៖ យើងជឿថាមានមិត្តនារីច្រើននាក់ណាស់ព្យាយាមតស៊ូក្នុងទំនាក់ទំនងរវាងអ្នកនិងគេតាមដែលអាចធ្វើទៅបាន ទាំងដែលដឹងថាគេមិនបានគិតអ្វីលើខ្លួនហើយក៏ដោយ។ ធ្វើបែបនេះមិនខុសទេ តែបានតែឈឺខ្លួនឯងមកវិញដោយសារត្រូវទ្រាំនឹងការស្រឡាញ់គេតែម្ខាង។
អ្នកអាចនឹងគិតថាទ្រាំបានឱ្យតែមានគេនៅក្បែរទៅគ្រប់គ្រាន់ហើយ ចុះបើអ្នកស្រឡាញ់គេមួយរយភាគរយ ហើយគេស្រឡាញ់អ្នកវិញតែហាសិបភាគរយតើអ្នកនៅទ្រាំបានទេ? ចុះបើថ្ងៃណាមួយអ្នកដឹងថាគេមានមនុស្សច្បាស់លាស់របស់គេរួចទៅហើយ អ្នកទ្រាំទៀតបានទេ? បើដឹងថាទ្រាំមិនបានហើយ គួរដកខ្លួនឱ្យបានលឿនទៅបើមិនចង់ស្តាយក្រោយនៅថ្ងៃមុខ អ្នកមានឱកាសបានជួបមនុស្សជាច្រើនទៀត ដូច្នេះកុំបណ្តោយខ្លួនឱ្យធ្លាក់ក្នុងរណ្តៅមិនច្បាស់លាស់បែបនេះទៀត។
៦. ព្យាយាមផ្លាស់ប្តូរការផ្តោតអារម្មណ៍៖ វិធីនេះសមស្របសម្រាប់អ្នកដែលចង់ចាប់ផ្តើមជាថ្មី បន្ទាប់ពីដកខ្លួនចេញពីគេបានខ្លះហើយតែនៅសល់អារម្មណ៍ស្រណោះស្រណោក មានអារម្មណ៍ថាស្តាយដែលមិនបានគេជារបស់ខ្លួន។ វាជារឿងធម្មតាសម្រាប់អ្នកដែលខកបំណងក្នុងរឿងស្នេហា តែបើសិនជានៅតែដដែលទៀតអ្នកក៏មិនអាចទៅណាឆ្ងាយពីគេបាន។
សាកប្តូរការផ្តោតអារម្មណ៍ រកអ្វីដែលខ្លួនចាប់អារម្មណ៍ថ្មី ឬសាកល្បងធ្វើអ្វីដែលថ្មីជាដើម។ ពេលខ្លះការដែលបានចំណាយពេលវេលានៅជាមួយខ្លួនឯងក៏ជាវិធីម្យ៉ាងក្នុងការបំភ្លេចគេដែរ ហើយមានតែធ្វើឱ្យជីវិតយើងកាន់តែប្រសើរឡើងទោះបីបន្តិចបន្តួចក៏ដោយ។
៧. បើកឱកាសឱ្យខ្លួនឯងបានចាប់ផ្តើមសាជាថ្មី៖ គេមិនខ្វល់ពីយើង គេមិនច្បាស់លាស់ជាមួយយើងក៏ជារឿងរបស់គេ ហើយហេតុអ្វីយើងចាំបាច់បារម្ភពីគេតែម្ខាងដែរ? ដូច្នេះ ត្រូវព្រលែងគេទៅ ហើយយើងមកបើកឱកាសឱ្យខ្លួនឯងបានជួបអ្នកថ្មីៗទៀតហើយយើងក៏មិនខុសដែរដែលធ្វើបែបនេះ។ កុំខ្លាចនឹងចាប់ផ្តើមជាថ្មី ឱ្យខ្លួនឯងបានឈានជើងទៅមុខមួយជំហានទៀត។ ថ្ងៃនេះអាចនឹងរើសខុសតែក៏មិនប្រាកដថាថ្ងៃមុខខុសទៀតដែរ អ្នកអាចនឹងជួបមនុស្សដែលល្អជាងនេះទៅទៀត។ ដូច្នេះឈប់ស្តីបន្ទោសខ្លួនឯងទៀត ឈប់សោកសៅ ឈប់ស្តាយក្រោយ រួចក្រោកឡើងថែរក្សាខ្លួនឱ្យស្រស់ស្អាត។ ទោះគ្មានគេក៏យើងអាចរស់បាន។
សម្រាប់អ្នកដែលកំពុងស្ថិតក្នុងដំណាក់កាលទំនាក់ទំនងដែលមិនច្បាស់លាស់មួយនេះ គួរតែដឹងពីដំណោះស្រាយក្នុងការចាត់ការជាមួយបញ្ហាទាំងនេះបានហើយ ដើម្បីដឹងថាខ្លួនគួរតែនៅកន្លែងណាដែលមានតម្លៃ។ ដូច្នេះអាចយកវិធីទាំង ៧ ដែលយើងបានណែនាំទៅប្រើបាន គ្រាន់នឹងបានជួយឱ្យល្អប្រសើរខ្លះដែរ។ សូមជូនពរអ្នកទាំងអស់គ្នាឱ្យមានសំណាងល្អក្នុងរឿងស្នេហា ៕
Account
Security
Favourite Content