ចំណាយពេល ៦ ឆ្នាំ ពេលនេះប្រាសាទ ជម នៃក្រុមប្រាសាទព្រះពិធូរ ស្ថិតក្នុងក្រុងអង្គរធំ ខេត្តសៀមរាប ត្រូវបានជួសជុលរួចរាល់ជាស្ថាពរដោយអ្នកជំនាញកូរ៉េនិងកម្ពុជា។ នេះបើតាមការបង្ហោះជូនដំណឹងលើផេកផ្លូវការអាជ្ញាធរជាតិអប្សរា។

ប្រាសាទ ជម ដែលជាក្រុមប្រាសាទព្រះពិធូរ ដែលស្ថិតក្នុងខេត្តសៀមរាប ត្រូវបានជួសជុលរួចរាល់ជាស្ថាពរនៅក្នុងខែ ធ្នូ ឆ្នាំ ២០២៥ នេះ ដោយគិតចាប់ពីពេលចាប់ផ្ដើមការជួសជុលដំបូងក្នុងឆ្នាំ ២០១៩ ពោលមានរយៈពេល ៦ ឆ្នាំ។ លោក Eo Jinkyu ស្ថាបត្យករ និងជាប្រធានគម្រោង នៃការជួសជុលនិងអភិរក្សព្រះលានជល់ដំរី និងក្រុមប្រាសាទព្រះពិធូ នៃទីភ្នាក់ងារបេតិកភណ្ឌ និងវប្បធម៌កូរ៉េ បានឱ្យដឹងថា ប្រាសាទជមបានងើបឈររឹងមាំឡើងវិញ បន្ទាប់ពីក្រុមអ្នកជំនាញបានជួសជុលដោយយកចិត្តទុកដាក់។ លោកបន្តថា គម្រោងនេះបានរើថ្មប្រាសាទទាំងស្រុង និងរៀបដំឡើងឡើងវិញ ហើយការរៀបឡើងវិញនេះ គេបានបន្ថែមថ្មដែលបានរកឃើញនៅជុំវិញប្រាសាទសរុបចំនួន ១១៣ដុំ ដាក់នៅទីតាំងដើមវិញ។









ប្រធានគម្រោងដែលជាជនជាតិកូរ៉េរូបនេះបានបង្ហាញអារម្មណ៍រីករាយនិងរំភើបក្រោយប្រាសាទ ជម មានរូបរាងពេញលេញ និងរឹងមាំឡើងវិញ ដែលធៀបមុនជួសជុល ប្រាសាទនេះទ្រុឌទ្រោមបាក់បែកខ្លាំងគួរឱ្យកត់សម្គាល់។ លោក Eo Jinkyu រំពឹងថា ភ្ញៀវទេសចរ រួមនឹងសាធារណជន នឹងបានចូលទស្សនាប្រាសាទនេះ នាពេលឆាប់ៗខាងមុខ បន្ទាប់ពីអាជ្ញាធរជាតិអប្សរាបើកឱ្យចូលទស្សនាឡើងវិញ។
គួរបញ្ជាក់ឱ្យដឹងថា មុនការជួសជុល ប្រាសាទជមមានស្ថានភាពទ្រុឌទ្រោមខ្លាំង ដោយសារអាយុកាលនៃសំណង់ កត្តាធម្មជាតិ និងមានឫសឈើចាក់បំបែករចនាសម្ព័ន្ធរបស់ប្រាសាទ រហូតដល់គ្រឹះខាងក្រោម ការនេះធ្វើឱ្យដីគ្រឹះចុះខ្សោយ និងស្រុតចុះ។ ដើម្បីជួសជុលប្រាសាទនេះ ក្រុមការងារបានរើថ្មប្រាសាទនេះទាំងអស់ រួចរៀបផ្គុំឡើងវិញ និងបានស្វែងរកថ្មដែលបានបាត់ មកដាក់នៅទីតាំងដើមវិញ ដូចជាផ្តែរ សសរពេជ្រ និងស៊ុមទ្វារផ្នែកខាងក្រៅជាដើម៕
ប្រភព ៖ អាជ្ញាធរជាតិអប្សរា

























Account
Security
Favourite Content