ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ជឿជាក់ថានៅលើលោកនេះគ្មានឪពុកម្ដាយណាម្នាក់ដែលមិនស្រឡាញ់កូននោះទេ ដូច្នេះបើទោះជាមានកំហុសតូច ឬធំខ្លាំងយ៉ាងណាក៏លោកទាំងពីរមិនដែលមានចិត្តប្រកាន់ទោសអ្វីចំពោះកូនឡើយ។ ប៉ុន្តែក្នុងនាមជាកូនមិនត្រូវអាងថាពួកគាត់មិនប្រកាន់ ហើយអាចនិយាយស្ដីពាក្យសម្ដីតាមចិត្តចង់ដោយមិនគិតច្រើនឡើយ ព្រោះពេលខ្លះអាចជាទង្វើអចេតនាមែន តែក៏អាចធ្វើឱ្យគាត់ខូចចិត្តបានដែរ ជាពិសេសនៅពេលដែលគាត់មានវ័យកាន់តែចាស់។ ដូច្នេះមុននឹងនិយាយអ្វីមួយទៅកាន់ពួកគាត់ គួរតែប្រយ័ត្នឱ្យមែនទែនជាពិសេសពាក្យទាំង ៥ នេះ៖
១. តេមកមានការអ្វី?
មិនថានៅក្នុងសង្គមយើងមានឋានៈធំប៉ុណ្ណា ហើយអាយុច្រើនប៉ុណ្ណានោះទេ នៅក្នុងភ្នែកក្រសែភ្នែករបស់អ្នកមានគុណ យើងនៅតែជាកូនក្មេងសម្រាប់គាត់ជានិច្ច។ ជារឿយៗគាត់ច្បាស់ជាដឹងណាស់ហើយថាពេលកូនធំកូនរវល់ច្រើន ប៉ុន្តែហោចណាស់ក៏គាត់អាចមានឱកាសស្ដាប់ឮសំឡេងរបស់កូនទោះតាមរយៈទូរសព្ទក៏ដោយ។ ដូច្នេះកុំឱ្យភាពរវល់វឹកវរក្នុងជីវិត ធ្វើឱ្យយើងមានភាពស្ដាយក្រោយដែលមិនបានចំណាយពេលជាមួយឪពុកម្ដាយ បើទោះបីជាវាត្រឹមជាពាក្យសួរសុខទុក្ខតែប៉ុន្មាននាទីក៏ដោយ។ ហេតុនេះត្រូវបែងចែកឱ្យដាច់រវាងពេលវេលាធ្វើការ និងពេលវេលាសម្រាប់អ្នកមានគុណទាន់នៅមានឱកាសបានប៉ះលោក បានស្ដាប់ឮសំឡេងលោក។
២. កុំចេះ
មនុស្សភាគច្រើនគិតថាពេលខ្លួនឯងធំហើយអាចធ្វើអ្វីបានគ្រប់យ៉ាងដោយមិនចាំបាច់ត្រូវការការណែនាំពីឪពុកម្ដាយទៀតនោះទេ។ តាមពិតទៅ ទោះបីជាពេលនេះយើងធំពេញវ័យពិតមែនក៏ដោយ ក៏ការគិតរបស់យើងមិនទាន់បានវែងឆ្ងាយ ឬម៉ត់ចត់គ្រប់គ្រាន់នៅឡើយទេ។
ហេតុនេះហើយទើបអ្នកទាំងពីរតែងតែចាំសង្កេត និងយកចិត្តទុកដាក់លើយើង ដើម្បីប្រាកដចិត្តថាកូនរបស់គាត់មិនលំបាក ហើយជ្រើសរើសជម្រើសមួយដ៏ត្រឹមត្រូវព្រោះគាត់ចាស់ជាងអាចមើលផ្លូវបានឆ្ងាយជាង។ ដោយសារតែការមើលថែរបស់លោកបានធ្វើឱ្យគំនិតមួយលេចឡើងថាគាត់មិនយល់ពីយើង ឬមិនទុកឱកាសឱ្យយើងអាចស្វែងរកអ្វីដោយខ្លួនឯង។ ដូច្នេះហើយគួរតែកែតម្រូវភាពអាត្មានិយមរបស់ខ្លួនឯងបន្ដិច ហើយផ្ដល់ទំនុកចិត្តលើអ្នកមានគុណដើម្បីឱ្យគាត់ជួយផ្ដល់ពន្លឺស្វែងរកផ្លូវល្អទៅមុនបន្ដទៀតសម្រាប់ជីវិតយើង។
៣. គំនិតចាស់គម្រិលពេកហើយ
ចំណុចដែលគួរចងចាំគឺឪពុកម្ដាយយើង និងយើងគឺស្ថិតនៅក្នុងពីរជំនាន់ផ្សេងគ្នា។ ដូច្នេះពេលខ្លះដំបូន្មានរបស់ពួកគាត់លែងសក្ដិសមជាមួយនឹងជីវិតរបស់យើងទៀតហើយ។ ប៉ុន្តែទោះសម ឬមិនសមក៏ដោយ ក៏យើងមិនគួរនិយាយភាសា
គំរោះគំរើយបំបាក់ទឹកចិត្តនោះទេ។
ជារឿយៗពួកគាត់អាចនឹងមិនពេញចិត្តជាមួយរបៀបរស់នៅរបស់យើងក្នុងពេលបច្ចុប្បន្ន ដូច្នេះទើបភាគច្រើនយើងចូលចិត្តគិតថាពួកគាត់ពិតជាហួសសម័យពិតមែន។ ចំណុចដែលគួរចងចាំមួយទៀតគឺមិនថាយើងធ្វើខុស និយាយខុសឆ្គងប៉ុន្មានដងក៏ដោយ ក៏គាត់នៅតែអភ័យទោសឱ្យយើង បង្រៀនយើង និងស្រឡាញ់យើងដោយគ្មានលក្ខខណ្ឌជារៀងរហូត។ ហេតុនេះកុំនិយាយអ្វីដែលធ្វើឱ្យពួកគាត់ឈឺចាប់ ប៉ុន្ដែព្យាយាមពន្យល់គាត់ ដើម្បីឱ្យយល់កាន់ច្បាស់ពីរបៀបរស់នៅរបស់យើង ដូច្នេះគាត់នឹងមានអារម្មណ៍រីករាយឡើងវិញ ជាពិសេសពេលឃើញកូនចេះគិតបែបនេះ។
៤. កុំបារម្ភច្រើនពេក
ដូចគំនិតមនុស្សពេញវ័យជាច្រើនតែងតែគិតថាខ្លួនធំហើយ មានការងារធ្វើគឺអាចមើលថែខ្លួនឯងបានហើយ។ ប៉ុន្តែសម្រាប់ឪពុកម្ដាយយើងនៅតែជាក្មេងតូចត្រូវការឱ្យពួកគាត់ថែទាំ និងយកចិត្តទុកដាក់ជានិច្ច។ ដូច្នេះបើគាត់ថែទាំយើងបានល្អខ្លាំងដោយគ្មានកាលកំណត់ គ្មានការរអ៊ូរទាំអ្វីទៅហើយ ក្នុងនាមជាកូនទោះមិនបានជួយអ្វីច្រើនក៏មិនគួរនិយាយពាក្យសម្ដីដែលធ្វើឱ្យគាត់ខកចិត្តឡើយ។ ប្រសិនបើមិនចង់ឱ្យពួកគាត់ព្រួយបារម្ភច្រើន ត្រូវបង្ហាញឱ្យគាត់ឃើញថាយើងធំហើយ ជាមនុស្សមានកំណើត មានគំនិតចាស់ទុំ និងអាចមើលថែខ្លួនឯងបានពិតមែន។
៥. កុំសួរច្រើនពេក
ជឿជាក់ថាឪពុកម្ដាយទាំងអស់សុទ្ធតែចំណាយពេលមួយជីវិតរបស់គាត់សន្សំសំចៃ និងតស៊ូជាមួយឧបសគ្គគ្រប់បែបយ៉ាងដោយគ្រាន់តែសង្ឃឹមថាកូនគាត់នឹងក្លាយជាមនុស្សល្អហើយរស់នៅសុខស្រួលប៉ុណ្ណោះ។ ហេតុនេះមិនថាក្នុងកាលៈទេសៈណាទេ គាត់តែងតែសួរនាំយើងគ្រប់ពេលខ្លាចកូនឈឺ ឬមានបញ្ហាលំបាក។
ជាងនេះទៅទៀត នៅលើលោកនេះមិនថានៅក្បែរខ្លួនយើងមានមនុស្សល្អច្រើនប៉ុណ្ណានោះទេ ក៏គ្មានអ្នកណាដែលមានក្ដីស្រឡាញ់ខ្លាំងជាងឪពុកម្ដាយយើងដែរ។ ដូច្នេះជំនួសឱ្យចម្លើយបដិសេធ ឬគំរោះគំរើយ យើងគ្រាន់តែធ្វើចិត្តរីករាយជាមួយនឹងសំណួរដែលពោរពេញដោយការព្រួយបារម្ភ និងក្ដីស្រឡាញ់មិនថាក្នុងវ័យ ឬស្ថានភាពតានតឹងខ្លាំងប៉ុណ្ណានោះទេ៕
Account
Security
Favourite Content