ជាធម្មតាមនុស្សទាំងអស់តែងតែចង់បានជីវិតមួយដែលពោរពេញដោយភាពរីករាយ សុភមង្គល និងអត្ថន័យ។ ប៉ុន្តែភាពរីករាយក៏អាស្រ័យទៅលើយើងខ្លួនឯងថាចេះបង្កើត និងរក្សាដោយរបៀបណាផងដែរ។ ក្នុងនោះការគិតប្រចាំថ្ងៃរបស់យើងក៏ជាចំណែកសំខាន់មួយដែលអាចធ្វើឱ្យជីវិតយើងប្រែប្រួលដែរ។ ដូច្នេះថ្ងៃនេះ AMS នឹងចែករំលែកនូវរឿង ៤ យ៉ាងដែលមិនមានន័យឡើយនៅពេលយើងព្យាយាមគិតពីវាច្រើនពេក៖
១. ប្រជែងជាមួយអ្នកដទៃ

ក្នុងជីវិតរបស់យើងអ្វីដែលជារបស់យើង ទោះជាយូរ ឬឆាប់ក៏វាគង់នឹងក្លាយជារបស់យើងដដែល។ ជាមួយគ្នាបំណងក្នុងការឈោងយកអ្វីដែលជារបស់យើងនេះផងដែរគឺមានច្រើនវិធីដោយមិនចាំបាច់ទៅប្រកួតប្រជែងជ្រុលខ្លាំងហួសហេតុជាមួយអ្នកដទៃឡើយ។ ពេលខ្លះការប្រជែងជាមួយអ្នកដទៃនឹងធ្វើឱ្យគេឈឺចាប់ ថែមទាំងធ្វើឱ្យយើងអាចបាត់បង់បុគ្គលិកលក្ខណៈដោយមិនដឹងខ្លួនទៀតផង។ ដូច្នេះជំនួសឱ្យការខ្ជះខ្ជាយពេលវេលាទៅប្រជែងជាមួយអ្នកដទៃ យើងគួរតែផ្ដោតទៅលើការខិតខំដោយខ្លួនទើបមានន័យជាង។
២. បារម្ភពីអតីតកាល
យើងទាំងអស់គ្នាជាមនុស្សធម្មតា វាជៀសមិនផុតនោះទេដែលយើងមិនងាយអាចបំភ្លេចរឿងអតីតកាល។ ប៉ុន្តែអតីតកាលជាអតីតកាល ពេលខ្លះវាជារឿងល្អមែនទែនដែលយើងអាចទម្លាក់វាចោល ហើយចាប់ផ្ដើមថ្ងៃថ្មីដោយភាពរីករាយ និងជាមួយរឿងរ៉ាវថ្មីៗ។ លើសពីនេះ ប្រសិនបើយើងដាក់អារម្មណ៍ឱ្យដក់ជាប់ជាមួយនឹងអតីតកាលខ្លាំងពេក នោះជីវិតនឹងមិនមានន័យថែមទាំងមិនអាចស្វែងរកសុភមង្គលរកខ្លួនងបានឡើយ។
៣. ចូលចិត្តត្អូញត្អែរ

ជាធម្មតាមនុស្សតែងតែមានហេតុផលរៀងៗខ្លួនដើម្បីត្អូញត្អែរអំពីជីវិតរបស់ខ្លួន ប៉ុន្តែភាពត្អូញត្អែរទាំងនោះមិនអាចដោះស្រាយអ្វីបានឡើយ។ ដូច្នេះជំនួសឱ្យភាពត្អូញត្អែរដែលនាំឱ្យខាតពេលទាំងនេះដោយការព្យាយាមស្វែងរកដំណោះស្រាយណាមួយដែលធ្វើឱ្យស្ថានការណ៍ប្រសើរជាងមុន និងមិនខ្ជះខ្ជាយពេលវេលា។
៤. ធ្វើការងារមិនគិតនៅក្នុងជីវិតរបស់មនុស្សម្នាក់ៗតែងតែឮពាក្យទាំងនេះជាញឹកញាប់មានដូចជារាល់ថ្ងៃធ្វើការងារលំបាកខ្លាំង ខិតខំធ្វើការហើយតែមិនត្រូវបានអ្នកណាម្នាក់មើលឃើញ ឬមិនមានអត្ថប្រយោជន៍ណាមួយសម្រាប់ខ្លួនងជាដើម។ ពាក្យទាំងនេះគឺកើតឡើងដោយសារតែយើងមិនបានគិតថ្លឹងថ្លែងឱ្យបានច្បាស់ពីទំហំទំនួលខុសត្រូវការងារ ការបែងចែកពេលវេលា និងអត្ថប្រយោជន៍ដែលយើងគួរទទួលបាន។ ដូច្នេះមុនធ្វើការងារអ្វីមួយ ចាំបាច់ត្រូវតែគិតតុល្យភាពរវាងការងារ និងអត្ថប្រយោជន៍ជាមុនសិន ទើបយើងនឹងខ្ជះខ្ជាយពេលវេលា ហើយយកពេលវេលានោះទៅធ្វើអ្វីផ្សេងទៀតមានប្រយោជន៍សម្រាប់ខ្លួនឯងបន្ថែមទៀតបាន៕

























Account
Security
Favourite Content