តាមប្រភពពីទំព័រហ្វេសប៊ុកផេក Amazing Cambodia បានឱ្យដឹងថា ដំរីទេសចរណ៍ឈ្មោះ សំបូរ ដែលយើងស្គាល់ជាទូទៅថា “ដំរីវត្តភ្នំ” នោះបានស្លាប់កាលពីយប់ថ្ងៃទី ១៩ ខែតុលា ឆ្នាំ ២០២៣ ហើយនៅខេត្តមណ្ឌលគិរីដែលជាកន្លែងចូលនិវត្តន៍ចុងក្រោយរបស់គាត់។ ដំណឹងនេះបានធ្វើឱ្យប្រជាជនខ្មែរ និងភ្ញៀវទេសចរជាតិ អន្តរជាតិ ដែលធ្លាប់ទទួលបានការផ្ដល់សេវាកម្មជិះលើខ្នងដំរីសំបូរ មានក្ដីក្ដុកក្ដួល និងសោកស្ដាយជាពន់ពេក។
តាមប្រភពខាងលើ មូលហេតុនៃការស្លាប់ គឺដោយសារឆ្លងជំងឺធ្មេញ បណ្តាលឱ្យសុខភាពចុះទ្រុឌទ្រោមខ្លាំងរយៈពេលមួយខែចុងក្រោយនេះ។ សំបូរបានបម្រើវិស័យទេសចរណ៍ក្នុងស្រុកជាយូរឆ្នាំរហូតដល់វ័យចូលនិវត្តន៍ក្នុងឆ្នាំ២០១៤ ហើយវាក៏ជាដំរីដ៏ចំណាស់នៃកម្ពុជា (អាយុ ៦៣ឆ្នាំ) ដែលបានរស់រួចផុតពីរបបខ្មែរក្រហម។3
តទៅនេះ AMS សូមរំឮកពីប្រវត្តិរបស់សំបូរដូចខាងក្រោម៖
សំបូរ ដែលជាដំរីមេមួយក្បាលបានវិលទៅរកជីវភាពក្នុងព្រៃដូចធម្មជាតិវិញ ក្រោយពីបានផ្ដល់សេវាកម្មបម្រើទេសចរណ៍អស់រយៈពេលជាង៣០ឆ្នាំ។ សំបូរបានចូលនិវត្តនិ៍ នៅអាយុ ៥៤ឆ្នាំ ក្នុងអំឡុងឆ្នាំ ២០១៤។ សំបូរត្រូវបាន យកទៅថែរក្សាទុកក្នុងតំបន់ព្រៃការពារក្នុងស្រុកកែវសីមា ក្នុងជ្រលងភ្នំមួយនៃខេត្តមណ្ឌលគីរី កាលពីថ្ងៃ ទី២៩ ខែវិច្ឆិកា ឆ្នាំ ២០១៤។ នៅទីនោះ សំបូរត្រូវស្ថិតក្រោមការថែទាំរបស់អង្គការការពារសត្វដំរី និងរដ្ឋបាលព្រៃឈើ។
តាមប្រភពពី VOA ដំរីឈ្មោះសំបូរនេះត្រូវគេស្គាល់ទាំងលក្ខណៈជាតិ និងអន្តរជាតិ។ វាតែងតែបង្ហាញវត្តមាននៅរមណីយដ្ឋានវត្តភ្នំរៀងរាល់ថ្ងៃដើម្បីរង់ចាំដឹកភ្ញៀវទេសចរដែលទៅកម្សាន្តនៅទីនោះ។ ដើមឡើយ សំបូរ បានរស់នៅជាមួយ លោកស៊ិន ស៊ន ក្នុងអំឡុងសម័យសង្គមរាស្ដ្រនិយមរហូតដល់សម័យកម្ពុជាប្រជាធិបតេយ្យរបស់ពួកខ្មែរក្រហម។ នៅសម័យនោះពួកខ្មែរក្រហមបានដកហូតសត្វចតុបាតនេះទុក។ លុះដល់របបខ្មែរក្រហមបានដួលរលំ លោកស៊ន ដែលអាយុបងសត្វដំរីនេះត្រឹមបីឆ្នាំ បានស្វែងរកដំរីនេះឡើងវិញហើយបានយកមកចិញ្ចឹមនិងបានប្រើវាក្នុងការដឹកជញ្ជូនភ្ញៀវទេសចរកម្សាន្តនៅជុំវិញវត្តភ្នំ ចាប់តាំងពីទសវត្សរ៍១៩៨០មកម្ល៉េះ។
ជារៀងរាល់ថ្ងៃដំរីនេះបានរកចំណូលជាមធ្យមចំនួន២០ដុល្លារអាមេរិកសម្រាប់លោក ស៊ិន ស៊ន។ មុនចូលនិវត្តន៍សំបូរ បានសម្រាកនៅផ្ទះរបស់លោកអស់រយៈពេលជិតពីរឆ្នាំមកហើយដោយសារសំបូរឈឺជើងមុខខាងស្តាំ។
ការវិលទៅរកជីវិតក្នុងធម្មជាតិវិញរបស់សំបូរ កើតឡើងក្រោមការជួយគាំពាររបស់ទីភ្នាក់ងារសហរដ្ឋអាមេរិកដើម្បីកិច្ចអភិវឌ្ឍន៍អន្តរជាតិ (USAID)។ ពេលនេះសំបូរបានស្លាប់ហើយ តែបានបន្សល់ទុកនូវអនុស្សាវរីយ៍ មិនអាចបំភ្លេចបានចំពោះភ្ញៀវទេសចរគ្រប់រូប និងសូមចងចាំឈ្មោះសំបូរជារៀងរហូតតទៅ។ ប្រជាជនកម្ពុជាគ្រប់រូប សូមបួងសួងឱ្យវិញ្ញាណក្ខន្ធរបស់សំបូរបានទីកាន់ឋានសុគតិភព ពួកយើងសូមអរគុណ ចំពោះការលះបង់ដ៏ធំធេងរបស់សំបូរ ជួយលើកស្ទួយវិស័យទេសចររបស់ប្រទេសកម្ពុជាអស់រយៈពេល ៣០ឆ្នាំ៕