ជឿជាក់ថាប្រិយមិត្តប្រហែលជាធ្លាប់បានឃើញរូបភាពស្អាតៗ អំពីប្រាង្គប្រាសាទនានា នៅខេត្តសៀមរាប ខេត្តព្រះវិហារ កំពង់ធំ និងរូបភាពទាក់ទងនឹងទេសចរណ៍ជាច្រើនទៀត ដោយមានឈ្មោះ ROMA នៅលើរូបភាពទាំងនោះ។ ថ្ងៃនេះ AMS-Infotainment នឹងនាំអ្នកទាំងអស់គ្នា បានមកស្គាល់ម្ចាស់ស្នាដៃនៅក្រោយរូបភាពទេសចរណ៍ស្អាតៗ ដែលចូលរួមចំណែកដ៏សំខាន់ជួយផ្សព្វផ្សាយ អំពីប្រទេសកម្ពុជា ឱ្យពិភពលោកបានស្គាល់កាន់តែច្រើន។

លឹម រ៉ូម៉ា គឺជាយុវជនរូបសង្ហាមួយរូប ដែលមានឆន្ទះដ៏មុតមាំក្នុងការចូលរួមចំណែកលើកស្ទួយវិស័យទេសចរណ៍ក្នុងប្រទេសកម្ពុជា តាមរយៈការផលិតមាតិការូបភាព និងវីដេអូដ៏មានគុណភាពផ្សព្វផ្សាយនៅលើបណ្ដាញសង្គម។ មានស្រុកកំណើតនៅប្រទេស អ៊ុយ ក្រែន លឹម រ៉ូម៉ា គឺជាកូនខ្មែរ កាត់អ៊ុយក្រែន ដោយមានឪពុកជាជនជាតិខ្មែរ និងម្ដាយជាជនជាតិអ៊ុយក្រែន។ កាលពីជាង ៣០ឆ្នាំមុនឪពុករបស់ខ្លួនដែលជាជនជាតិខ្មែរ មានស្រុកកំណើតនៅខេត្តសៀមរាប បានបន្តការសិក្សានៅសកលវិទ្យាល័យ ក្នុងប្រទេសអ៊ុយក្រែនក៏បានជួបម្ដាយជាជនជាតិអ៊ុយក្រែន និងបានរៀបការសាងគ្រួសារនៅទីនោះ។

ដើមហេតុនាំឱ្យ រ៉ូម៉ា បានមករស់នៅកម្ពុជា ស្ដាប់ហើយពិតជារំភើបខ្លាំង។ រ៉ូម៉ា បានប្រាប់ថា នៅអាយុ ១១ឆ្នាំ អំឡុងឆ្នាំ ២០០៥ រូបគេបានមកលេងប្រទេសកម្ពុជាជាលើកដំបូងជាមួយឪពុក ដោយសារពេលនោះឪពុកចង់ឱ្យខ្លួនបានស្គាល់បងប្អូននៅខ្មែរ។ មកលេងប្រទេសកម្ពុជាលើកដំបូង រ៉ូម៉ា ហាក់មានចិត្តស្រឡាញ់ទឹកដីកម្ពុជា ក៏បានសុំលោកឪពុកផ្លាស់មករស់នៅទីនេះតែម្ដង។ មុនពេលមកនៅកម្ពុជា រ៉ូម៉ា កំពុងរៀនថ្នាក់ទី៣ នៅប្រទេសអ៊ុយក្រែន ពេលមកនៅខ្មែរខ្លួនក៏បានចូលរៀនភាសាខ្មែរពីថ្នាក់ទី១ ឡើងវិញ នៅសាលាបឋមសិក្សាដូនពេញ លុះរៀនដល់ថ្នាក់ទី៤ ក៏បានផ្លោះថ្នាក់ចូលរៀនថ្នាក់ទី៧ នៅវិទ្យាល័យព្រះស៊ីសុវត្ថិ។

រស់នៅទីក្រុងភ្នំពេញបាន ៥ឆ្នាំ លឹម រ៉ូម៉ា បានផ្លាស់ប្ដូរទៅរស់នៅខេត្តសៀមរាបវិញ ក្នុងអំឡុងឆ្នាំ ២០១០ ដោយសារខ្លួនស្រឡាញ់ទឹកដីខេត្តនេះខ្លាំង ក្រោយពីបានធ្វើដំណើរមកលេងកម្សាន្តសៀមរាបជាញឹកញាប់។ រ៉ូម៉ា យល់ថា សៀមរាប ជាទឹកដីស្ងប់ស្ងាត់ មានសុវត្ថិភាព ពេលធ្វើដំណើរទៅណាមកណា បងប្អូនមិនសូវបារម្ភពីរូបគេ។ រ៉ូម៉ា បានមករស់នៅសៀមរាបជាមួយអ៊ំស្រី ត្រូវជាបងបង្កើតរបស់លោកឪពុក។ រ៉ូម៉ា បានសិក្សានៅសៀមរាប រហូតបញ្ចប់ថ្នាក់បរិញ្ញាបត្រអក្សរសាស្ត្រអង់គ្លេស ជំនាញគ្រូបង្រៀន ពីសាកលវិទ្យាល័យ University of Southeast Asia។ បច្ចុប្បន្ន រ៉ូម៉ា គឺជាគ្រូបង្រៀនភាសាអង់គ្លេសនៅសាលា ACE ខេត្តសៀមរាប រយៈពេល ៧ឆ្នាំមកហើយ។

ចុះហេតុអ្វីទើបបានជាកូនខ្មែរកាត់ អ៊ុយក្រែន រូបនេះក្លាយជាអ្នកជំនាញថតរូប? ទាក់ទងនឹងអាជីពថតរូបនេះ គឺក្រោយពេលដែលខ្លួនបានចាប់ជំនាញមួយច្បាស់លាស់ហើយ គឺ ជាគ្រូបង្រៀន ទើបក្រោយមក រ៉ូម៉ា បានបង្កើតទម្លាប់ថ្មីមួយទៀត គឺការថតរូប។ ពេលដែលចេញថតដំបូង រ៉ូម៉ា មិនសូវជាថតបានល្អអីដែរ ហើយក៏មិនទាន់ស្គាល់ពីខ្លួនឯងច្បាស់ដែរ។ រហូតដល់ឆ្នាំ ២០១៩ ពេលដែលពិភពលោកកំពុងជួបវិបត្តិការរាតត្បាតជំងឺកូវីដ១៩ ពេលនោះ រ៉ូម៉ា មានពេលវេលាច្រើន ដោយសារការបិទសាលា បិទផ្លូវ នាពេលនោះលោកក៏ឆ្លៀតរៀនដើរថតរូបតាមប្រាសាទ។ ពេលថតយូរៗទៅ រ៉ូម៉ា កាន់តែចូលចិត្តលើការថតប្រាសាទ ហើយការថតនេះហើយ នាំឱ្យរ៉ូម៉ា កាន់តែចាប់អារម្មណ៍អំពីប្រវត្តិសាស្ត្រខ្មែរតាមរយៈប្រាសាទទាំងនោះ។ រៀងរាល់ពេលថតរូបប្រាសាទម្ដងៗ រ៉ូម៉ា តែងតែធ្វើការស្រាវជ្រាវបន្ថែមអំពីប្រវត្តិសាស្ត្រខ្មែរ និងធ្វើឱ្យគេបានយល់ដឹងអំពីប្រវត្តិសាស្ត្រដ៏រុងរឿងរបស់អាណាចក្រខ្មែរនាសម័យមុន។

ក្រោយចាប់ផ្ដើមថតបាន ១ឆ្នាំ រ៉ូម៉ា ចាប់ផ្ដើមមានអ្នកស្គាល់បណ្ដើរៗតាមរយៈស្នាដៃថតរូបល្អៗជាច្រើន ដែលខ្លួនបានចែកចាយនៅលើបណ្ដាញសង្គមក្នុងគណនីហ្វេសប៊ុក និង IG ផ្ទាល់ខ្លួន។ រហូតមកដល់ឆ្នាំ ២០២២ លឹម រ៉ូម៉ា ក៏មានឱកាសបានធ្វើការជាមួយមន្ទីរទេសចរណ៍ខេត្តសៀមរាប ដើម្បីផ្សព្វផ្សាយអំពីតំបន់ទេសចរណ៍ថ្មីៗ ឬ កន្លែងណាដែលគេមិនសូវបានស្គាល់នៅក្នុងខេត្តសៀមរាប។ ក្រោយប្រឡូកនៅក្នុងវិស័យផលិតមាតិការូបភាពនេះ នាំឱ្យ រ៉ូម៉ា បានស្គាល់អ្នកផលិតរូបភាពជាច្រើន ទាំងនៅភ្នំពេញ សៀមរាប បាត់ដំបង ហើយក៏បានរៀនសូត្របន្ថែមលើជំនាញថតរូបនេះ ពីអ្នកដែលខ្លួនបានស្គាល់នោះផងដែរ។

ប្រាប់មកកាន់ AMS-Infotainment ទាំងអារម្មណ៍ពេញដោយមោទនភាព រ៉ូម៉ា បានប្រាប់ថា ចក្ខុវិស័យរបស់គេ គឺចង់ឱ្យពិភពលោកបានឃើញថា ប្រទេសកម្ពុជាស្រស់ស្អាតប៉ុនណា ព្រោះ ពេលដែលខ្លួនទៅលេងបារាំង អ៊ុយក្រែន និងជួបមិត្តភក្ដិនៅសហរដ្ឋអាមេរិក ជាដើម ពេលដែលលោកនិយាយអំពីប្រទេសកម្ពុជា គឺមិនសូវមានអ្នកណាស្គាល់ខ្មែរទេ។ បែបនេះហើយទើប រ៉ូម៉ា ខិតខំផលិតរូបថត វីដេអូ ឱ្យបានច្រើនផ្សព្វផ្សាយលើបណ្ដាញសង្គម ឱ្យគេស្គាល់ពីប្រទេសកម្ពុជាកាន់តែច្រើន ជាពិសេសនៅលើ Instagram របស់ខ្លួន ដែលភាគច្រើនអ្នក Follow លោកជាបរទេស។ ក្នុងនោះដែរ ទំព័រហ្វេសប៊ុកផេក Roma Lim មានអ្នកចុចតាមដានជាង ៣ម៉ឺននាក់ និងនៅលើ IG មានចំនួន ជាង ១ម៉ឺននាក់។

ថ្មីៗនេះ រ៉ូម៉ា ទើបតែបានចុះឈ្មោះជាផ្លូវការជាអ្នកផលិតមាតិកា ឱ្យមន្ទីរទេសចរណ៍ខេត្តសៀមរាប ដោយទទួលស្គាល់ពីក្រសួងទេសចរណ៍។ ក្រៅពីនេះ រ៉ូម៉ា ក៏នៅបន្តផលិតមាតិកាឱ្យបណ្ដាខេត្តផ្សេងៗទៀតដែរ ដូចជា ព្រះវិហារ កំពង់ធំ បន្ទាយមានជ័យ ឧត្ដរមានជ័យ ជាដើម ដើម្បីជួយផ្សព្វផ្សាយវិស័យទេសចរណ៍ឱ្យបណ្ដារខេត្តទាំងនេះ។ ទោះបីជាមានឈ្មោះល្បីគួរសមក្នុងវិស័យថតរូប តែ រ៉ូម៉ា នៅបន្តអាជីពជាគ្រូបង្រៀនដដែល ដោយឆ្លៀតពេលពីការងារ គឺលោកបានចំណាយពេលផលិតរូបភាព វីដេអូល្អៗ ផ្សព្វផ្សាយពីកម្ពុជា និងក្រៅពីនេះលោកក៏មានក្រុមការងារទទួល Project ផលិតរូបភាព និងវីដេអូផងដែរ។

លឹម រ៉ូម៉ា បច្ចុប្បន្នមានអាយុ២៩ឆ្នាំ មានបងប្អូន៣នាក់ ក្នុងនោះលោកជាកូនច្បងគេ បច្ចុប្បន្នឪពុកម្ដាយលោករស់នៅប្រទេសបារាំង ដោយសារគេចពីសង្គ្រាមរវាងអ៊ុយក្រែន និងរុស្ស៊ី។ រីឯ ប្អូនទី២នៅប្រទេសប៉ូឡូញ ជាអ្នកធ្វើការផ្នែក IT ឯប្អូនពៅកំពុងរៀនឆ្នាំទី៣ នៅប្រទេសអាល្លឺម៉ង់៕



























Account
Security
Favourite Content