ប្រទេសចិនដាក់អនុវត្តច្បាប់ថ្មី ទាមទារឱ្យបុគ្គលមានឥទ្ធិពល ឬ Influencer ដែលធ្វើមាតិកាទៅលើប្រធានបទដូចជា វេជ្ជសាស្ត្រ ហិរញ្ញវត្ថុ ច្បាប់ និងការអប់រំ ត្រូវតែមានសញ្ញាបត្រ ឬលិខិតបញ្ជាក់ថា បុគ្គលនោះបានឆ្លងកាត់ការបណ្ដុះបណ្ដាល និងមានជំនាញត្រឹមត្រូវ ដើម្បីទប់ស្កាត់ការចែករំលែកព័ត៌មានក្លែងក្លាយ។

នៅថ្ងៃទី២៨ តែតុលានេះ សារព័ត៌មាន Daily Express បានចុះផ្សាយថា រដ្ឋបាលវិទ្យុ និងទូរទស្សន៍ជាតិ (NRTA) រួមជាមួយក្រសួងវប្បធម៌ និងទេសចរណ៍របស់ប្រទេសចិន បានចេញមកបញ្ជាក់ថា បុគ្គលមានឥទ្ធិពល ឬ Influencer ដែលធ្វើមាតិកាទៅលើប្រធានបទដូចជា វេជ្ជសាស្ត្រ ហិរញ្ញវត្ថុ ច្បាប់ និងការអប់រំ ត្រូវតែមានលក្ខណៈសម្បត្តិគ្រប់គ្រាន់ក្នុងការចែកចាយព័ត៌មានពីប្រធានបទសំខាន់ និងរសើប មិនពឹងផ្អែកទៅលើប្រជាប្រិយភាពតែមួយមុខនោះទេ។
ជាក់ស្ដែង លក្ខខណ្ឌនៃ “លក្ខណៈសម្បត្តិសមស្រប” នេះ មិនតម្រូវឱ្យបុគ្គលមានឥទ្ធិពលត្រូវតែមានសញ្ញាបត្របញ្ជាក់ការសិក្សាលើជំនាញខាងលើពីសាកលវិទ្យាល័យនោះទេ តែត្រូវមានអាជ្ញាប័ណ្ណ វិញ្ញាបនបត្រ ឬឯកសារដែលអាចធ្វើការផ្ទៀងផ្ទាត់បាន បញ្ជាក់ថា បុគ្គលរូបនោះពិតជាបានឆ្លងកាត់ការហ្វឹកហាត់ពិតមែន។
គួរឱ្យដឹងផងដែរថា ច្បាប់មួយនេះត្រូវបានលើកឡើងជាលើកដំបូងកាលពីឆ្នាំ ២០២២ ដោយបានផ្ដោតទៅលើក្រុមបុគ្គលដែលមានឈ្មោះហៅថា “ពិធីករតាមអ៊ីនធឺណិត” មុននឹងសមាគមឧស្សាហកម្មសម្តែងប្រទេសចិន បានធ្វើបច្ចុប្បន្នភាពដើម្បីពង្រឹងគុណភាព និងស្ដង់ដាវិជ្ជាជីវៈ នៅក្នុងឆ្នាំ២០២៥។

មន្ត្រីជំនាញបានឱ្យដឹងថា ការដាក់អនុវត្តច្បាប់នេះ គឺធ្វើឡើងក្នុងគោលបំណងចង់ឱ្យវិស័យខាងលើមានវិជ្ជាជីវៈត្រឹមត្រូវ និងការពារទស្សនិកជនកុំឱ្យទទួលបានព័ត៌មានមិនពិត សមស្របទៅនឹងក្របខ័ណ្ឌអភិបាលកិច្ចឌីជីថល។
យ៉ាងណាមិញ សារព័ត៌មាន Morocco World News បានរាយការណ៍មតិរះគន់មួយចំនួនថា ច្បាប់នេះអាចប៉ះពាល់ដល់គំនិតច្នៃប្រតិដ្ឋ និងរិតត្បិតសេរីភាពនៃការបញ្ចេញមតិ ដោយបុគ្គលទាំងនោះជឿជាក់ថា ការអនុវត្តច្បាប់នេះ ចិនមានសិទ្ធិក្នុងការរឹតត្បិតសំឡេងឯករាជ្យ ការជជែកវែកញែក និងការរិះគន់នានាផងដែរ៕


























Account
Security
Favourite Content