ជាង ១០ ឆ្នាំមកហើយដែលតារាស្រីកូរ៉េខាងត្បូង Bae Suzy បានឈរជើងនៅក្នុងវិស័យសិល្បៈទាំងជាតារាចម្រៀង និងតារាសម្ដែង។ ថ្មីៗនេះនាងក៏ទើបតែបានទទួលពានរង្វាន់ជាតួឯកស្រីឆ្នើមបំផុតក្នុងកម្មវិធី Blue Dragon 2023 ផងដែរ។
ការធ្វើដំណើរលើវិថីដ៏វែងឆ្ងាយមួយនេះវាមិនបានរលូនគ្រប់ពេលនោះទេ។ ជាក់ស្ដែងនៅពេលបង្ហាញខ្លួនដំបូង នាងត្រូវបានគេរិះគន់ថានាងធាត់ដែលធ្វើឱ្យប៉ះពាល់ផ្លូវចិត្តនាងមែនទែន។ ក្រោយមកនាងក៏ធ្វើការសម្រកទម្ងន់រហូតបានសម្រេចព្រមទាំងចែករំលែកទៅដល់អ្នកគាំទ្រផងដែរ។ ខាងក្រោមនេះគឺគន្លឺះងាយៗក្នុងការសម្រកទម្ងន់ពីតារាស្រី Bae Suzy៖
១. ញ៉ាំអាហារក្រោម ១០០០ កាឡូរី
ការញ៉ាំអាហារក្រោម ១០០០ កាឡូរីក្នុងមួយនឹងជួយឱ្យតារាស្រីរូបនេះស្រកគីឡូបានយ៉ាងលឿន។ នាងបាននិយាយថាវាអាចត្រូវបានរាប់ចូលជាវិធីមួយក្នុងចំណោមវិធីសម្រកទម្ងន់ដ៏ពិបាក។ ដូច្នេះប្រសិនអ្នកគាំទ្រចង់អនុវត្តវាគឺចាំបាច់ត្រូវមានការតាំងចិត្ត ឬពិភាក្សាជាមួយអ្នកជំនាញជាមុនសិន។
២. ញ៉ាំអាហារសុខភាព
សម្រាប់អាហារពេលព្រឹក តារាស្រី Bae Suzy បានញ៉ាំដំឡូងជ្វាជាមួយសាច់ទ្រូងមាន់ និងភេសជ្ជៈដែលសម្បូរសារធាតុចិញ្ចឹមមួយកែវផងដែរ។ រហូតដល់ថ្ងៃត្រង់នាងបានញ៉ាំបាយសម្រូបមួយចាន និងសាឡាដ។ ចំពោះពេលល្ងាចនាងបានញ៉ាំត្រឹមដំឡូងជ្វា ២ ដុំប៉ុណ្ណោះ។
៣. មិនញ៉ាំអ្វីទាំងអស់ក្រោយម៉ោង ៦ ល្ងាច
និយាយដល់អាហារពេលល្ងាច សម្រាប់តារាស្រីរូបនេះបានដាក់កំណត់លើខ្លួនឯងយ៉ាងតឹងរឹងដោយមិនឱ្យញ៉ាំអ្វីទាំងអស់ក្រោយម៉ោង ៦ ល្ងាច។ នាងបានបន្តថាការជ្រើសរើសធ្វើបែបនេះគឺដោយសារតែពេលល្ងាចជាពេលដែលការរំលាយអាហារយឺត។ គ្មានការស្រាវជ្រាវលើអ៊ីនធឺណេតណាមួយបង្ហាញពីពេលវេលាដ៏ល្អបំផុតដើម្បីឈប់ញ៉ាំនោះទេ មានតែការបង្ហាញពីផលប៉ះពាល់ក្រោយញ៉ាំអាហារពេលល្ងាចប៉ុណ្ណោះ។
៤. ហាត់ប្រាណដូចសត្វភេនឃ្វីន
ចំពោះទម្លាប់ហាត់ប្រាណរបស់នាងមិនមែនជាការរត់ ក៏មិនមែនជាហែលទឹកអ្វីនោះទេ ប៉ុន្តែជាការធ្វើលំហាត់ប្រាណដូចសត្វភេនឃ្វីនទៅវិញ។ នាងបានឈរ និងដាក់ដៃដូចសត្វភេនឃ្វីនហើយគ្រវីដៃដូចសត្វនោះ។ ការធ្វើបែបនេះនឹងអាចជួយដុតខ្លាញ់ដើមដៃបានយ៉ាងល្អ៕