ក្រោយល្បីផ្អើលកាលពីយប់ថ្ងៃទី ១១ ខែកក្កដា ឆ្នាំ ២០២៤ នេះ ថាទីងមោង ទូទាំងខេត្តកណ្ដាល ត្រូវបានបិទ មិនអនុញ្ញាតឱ្យមានការហែនោះ ពេលនេះ អភិបាលខេត្តទើបផ្ទេរមកថ្មីថ្មោង បានបញ្ជាក់ច្បាស់ហើយថា ទីងមោងនៅខេត្តកណ្ដាល ពុំមានការបិទនោះទេ។ យោងតាមសំណេររបស់ឯកឧត្ដម គួច ចំរើន បានបញ្ជាក់នៅព្រឹកថ្ងៃទី ១២ ខែកក្កដា នេះថា៖ «ខ្ញុំបានឃើញការផ្សព្វផ្សាយ អំពី ទីងមោង ថាត្រូវបានបិទ ។ ខ្ញុំសូមបញ្ជាក់ថា ពុំមានការបិទទេ ហើយស្នើសុំ ឱ្យរៀបចំ ដោយមានសណ្តាប់ធ្នាប់ល្អ រក្សាបាន គុណតម្លៃសិល្បៈវប្បធម៌ខ្មែរយើង ។ ខ្ញុំនឹងជួប ជាមួយបងប្អូនផ្ទាល់ នៅពេលខាងមុខ» ។

ការបញ្ជាក់របស់លោកអភិបាលខេត្តកណ្ដាលធ្វើឡើងក្រោយមានគណនីហ្វេសប៊ុកមួយចំនួន មកពីវត្តអារាមនានាក្នុងខេត្តកណ្ដាល បានបង្ហោះសារថា ទីងមោង ត្រូវបានបិទនៅទូទាំងខេត្តកណ្ដាល ហើយថែមទាំងបានផ្លាស់ប្ដូរ Profile ពណ៌សខ្មៅ កាន់ទុក្ខ បង្ហាញការសោកស្ដាយ។ ក្រោយពីបានឃើញការបង្ហោះទាំងនេះ អ្នកប្រើប្រាស់បណ្ដាញសង្គមនាំគ្នាចែករំលែកព្រោងព្រាត និងបង្ហាញការសោកស្ដាយ ប្រសិនបើទីងមោង ត្រូវបានបិទពិតមែននោះ។ យ៉ាងណាយើងក៏មិនបានដឹងដើមហេតុដំបូងបែបណាដែរ ទើបនាំឱ្យមានការបង្ហោះសារទាំងនេះ ធ្វើឱ្យភ្ញាក់ផ្អើលទាំងយប់។ ក្នុងនោះក៏មានមតិជាច្រើនបានលើកឡើងថា ប្រសិនបើបិទមែននោះ កូនខ្មែរជំនាន់ក្រោយលែងបានស្គាល់ទីងមោងហើយ។


គួរឱ្យដឹងដែរដា ទីងមោង ប្រចាំខេត្តកណ្ដាល មកពីបណ្ដាវត្តអារាមនានា តែងត្រូវបានអ្នកប្រើប្រាស់បណ្ដាញសង្គមផ្ទុះការចាប់អារម្មណ៍ តាមរយៈការដង្ហែយ៉ាងសប្បាយអឺងកង ហើយពិសេសនោះ មានរូបទីងមោងប្លែកៗ ច្នៃប្រឌិតថ្មី ដូចជារូបទីងមោង វណ្ណដា លោក ជី ដេវីត ជាដើម។ ទីងមោង ជាទម្រង់សិល្បៈប្រពៃណីខ្មែរយើងតាំងពីបរមបុរាណមក តែងលេចវត្តមានជាមួយក្រុមឆៃយ៉ាំ ពេលហែទៀនវស្សា បុណ្យកឋិន បុណ្យផ្កា ជាដើម។ ពេលហែម្ដងៗផ្អើលអស់អ្នកផង ក្មេងចាស់ ខ្លះក៏សើចសប្បាយ តាមទីងមោង ឯក្មេងៗខ្លះ ឃើញហើយរត់បាតជើងសព្រាត៕





























Account
Security
Favourite Content