ក្រុមការងារអាជ្ញាធរជាតិអប្សរា បានឱ្យដឹងកាលពីថ្ងៃទី ១៩ ខែវិច្ឆិកា ឆ្នាំ ២០២៤ កន្លងមកនេះថា ចម្លាក់សត្វមករដ៏ធំ និងកម្រដែលជាប្រព័ន្ធបង្ហូរទឹកបុរាណ បានវិលមករូបរាងដើមវិញ ក្រោយការសាងសង់ក្នុងរយៈពេល៧ខែមកនេះ។
ចម្លាក់សត្វមករ ជាប្រព័ន្ធបង្ហូរទឹកបុរាណបានចាប់ផ្ដើមជួសជុលដំណាក់កាលទី១ នាពាក់កណ្ដាលខែឧសភា ឆ្នាំ ២០២៤ ដោយបានបញ្ចប់ដោយជោគជ័យនៅខែវិច្ឆិកា ក្នុងឆ្នាំដដែល។ តាមរយៈវិស្វករនៃអាជ្ញាធរជាតិអប្សរាបានឱ្យដឹងថា ការងារជួសជុលប្រព័ន្ធបង្ហូរទឹកនៃចម្លាក់សត្វមករនេះក្រុមការងារបានសម្រង់ប្លង់ថ្ម ដែលរាយប៉ាយ ធ្វើកំណាយស្រាវជ្រាវ ចុះបញ្ជីថ្ម ជួសជុលពង្រឹងថ្មដែលខូចខាត និងរៀបចំដងខ្លួនសត្វមករតាមលំនាំដើមវិញ ព្រមទាំងបន្ថែមលើការសិក្សាទៅលើគ្រឹះនៃចម្លាក់សត្វមករនេះឱ្យរឹងមាំយូរអង្វែង ជាលទ្ធផលក្រោយបញ្ចប់ការសាងសង់ពេលនេះចម្លាក់សត្វមករដែលជាប្រព័ន្ធបង្ហូរទឹកបុរាណដ៏ធំ និងកម្របានលេចចេញនូវរូបរាងដើមវិញហើយ។
គួរឱ្យដឹងដែរថា ក្រោយបញ្ចប់ការសាងសង់ក្រុមការងារអាជ្ញាធរជាតិអប្សរាបានរៀបចំកែសម្រួលផ្លូវឱ្យមានភាពងាយស្រួល ដើម្បីអ្នកទេសចរអាចមកទស្សនា និងសិក្សាស្វែងយល់អំពីចម្លាក់មួយនេះ។ ក្រៅពីចម្លាក់សត្វមករនៅទីនេះក៏មានទំនប់ទឹកមុជ (ទំនប់បុរាណ) ព្រមទាំងការដ្ឋានយកថ្មទៅកសាងប្រាសាទនៅសម័យបុរាណផងដែរ។ ចម្លាក់សត្វមករបុរាណនេះ មានទីតាំងនៅទំនប់ទឹកមុជ ស្ថិតក្នុងភូមិទឹកលិច ឃុំបឹងមាលា ស្រុកស្វាយលើ ខេត្តសៀមរាប ប្រមាណ៣គ.មពីប្រាសាទបេងមាលា៕