តំបន់លម្ហែមួយកន្លែងដែលមានព្រៃធម្មជាតិស្រស់បំព្រង និងខៀវស្រងាត់ ថែមទាំងមានទឹកហូរមិនដាច់ថ្លាឆ្លុះឃើញដល់បាតដែលត្រូវបានអ្នកស្រុកហៅតៗគ្នាថា ទឹកតេអាលច ឬទឹកស្ពានព្រែកតេអាលច កំពុងលាក់ខ្លួនពួនអាត្មាក្នុងខេត្តមួយរបស់ប្រទេសកម្ពុជា។
ប្រសិនបើអ្នកធ្វើដំណើរចេញពីទីរួមខេត្តក្រចេះប្រមាណជា ៣០ គីឡូម៉ែត្រ លើកំណាត់ផ្លូវលេខ៧ អ្នកនឹងបានឃើញស្ពានមួយដែលមានឈ្មោះថាស្ពាន ព្រែកតេអាលច។ ស្ថិតនៅចំណុចខាងក្រោមនៃស្ពានថ្មមួយនេះឃើញមានទីសម្រាកលម្ហែបែបធម្មជាតិមួយ មានទឹកហូរថ្លាឈ្វេងមើលឆ្លុះដល់បាត និងមានកូនថ្មតូចៗជាច្រើន មិនតែប៉ុណ្ណោះឃើញមានកូនកញ្ចុះប្រក់ស្បូវតូចៗដាក់តម្រៀបជួរ ហាក់កំពុងរង់ចាំភ្ញៀវទេសចរទៅអង្គុយលេង អមជាមួយទេសភាពព្រៃព្រឹក្សាខៀវស្រងាត់ ដែលអាចចាប់ចិត្តឱ្យអ្នកបានទៅដល់ធូរស្បើយពីភាពហត់នឿយ និងបានស្រូបខ្យល់អាកាសបែបធម្មជាតិ ស្ដាប់សំឡេងទឹកហូរទទួលអារម្មណ៍នៃខ្យល់ធម្មជាតិបែបព្រៃភ្នំ។
តាមរយៈរូបភាពច្រើនសន្លឹកដែលបង្ហោះដោយមន្ទីរព័ត៌មានខេត្តក្រចេះតំបន់ ទឹកតេអាលច មួយនេះហាក់មិនទាន់ត្រូវបានអភិរក្សអ្វីច្រើននោះទេ ខណៈទីនោះនៅប្រមូលផ្ដុំដោយធម្មជាតិខៀវស្រងាត់ដែលជាចំណីភ្នែកនៃភ្ញៀវទេសចរដែលបានទៅដល់នៅឡើយ។
គួរឱ្យដឹងដែរថា ទឹកតេអាលច ឬទឹកស្ពានព្រែកអាលចមានទីតាំងស្ថិតនៅចំណុចកំណាត់ផ្លូវលេខ៧ ចម្ងាយ ៣០ គីឡូម៉ែត្រ ពីទីរួមខេត្ត ភូមិអាលច ឃុំកន្ទួត ស្រុកចិត្របុរី ខេត្តក្រចេះ៕
ប្រភពរូបភាព ៖ មន្ទីរព័ត៌មានខេត្តក្រចេះ ទទក