រូបថត ២ សន្លឹក មុន និងក្រោយការជួសជុលប្រាសាទបុរាណខ្មែរមួយ កំពុងធ្វើឱ្យអ្នកប្រើប្រាស់បណ្ដាញសង្គមហ្វេសប៊ុកនៅកម្ពុជា កោតស្ញប់ស្ញែងជាខ្លាំង និងកំពុងផ្ទុះការចែករំលែកបន្តគ្នាព្រោងព្រាត។

រូបមុនពេលជួសជុល
តាមប្រភពពីគណនីហ្វេសប៊ុក Chan Vai ទំនងជាអ្នកជំនាញជួសជុលប្រាសាទបុរាណ បានបង្ហោះរូបថតពីរសន្លឹក ដែលរូបភាពទីមួយ មុនការជួសជុល និងរូបភាពទី២ ក្រោយបញ្ចប់ការជួសជុល ផ្នែកមួយនៃប្រាសាទបន្ទាយឆ្មារ បានរៀបរាប់យ៉ាងដូច្នេះថា៖ «រូបថតមុនពេល និងក្រោយពេលជួសជុលរោងទងទី៣ ខាងជើង ផ្នែកស្លាបខាងលិចនៃប្រាសាទបន្ទាយឆ្មារ។ ថតពីខាងលិចទៅកើត»។

រូបក្រោយពេលជួសជុល
បន្ទាប់ពីបានឃើញនូវទឹកដៃដ៏ប៉ិនប្រសប់នៃអ្នកជំនាញជួសជុសជុលខាងលើ ប្រជាជនខ្មែរ មានការកោតសរសើរ មិនដាច់ពីមាត់ថា ពិតជាស្រស់ស្អាតខ្លាំងណាស់ មិននឹកស្មានថា ប្រាសាទថ្ម ដែលបែកបាក់ ដួលរាបដល់ដី អាចឈរយ៉ាងរឹងមាំម្ដងទៀត និងមានរូបរាងស្ទើរតែដូចដើមទៅហើយ។ បើតាមលោក Chan Vai ដែលជាម្ចាស់គណនីហ្វេសប៊ុកខាងលើបានឱ្យដឹងទៀតថា ការជួសជុលប្រាសាទខាងលើ គឺចំណាយពេលប្រមាណ ១៨ ខែ ទើបរួចរាល់។
ប្រាសាទបន្ទាយឆ្មារ ត្រូវបានកសាងឡើងពីចុងសតវត្សរ៍ទី ១២ ដល់ដើមសតវត្សរ៍ទី១៣ ក្នុងរជ្ជកាលព្រះបាទជ័យវរ្ម័នទី៧ ដើម្បីឧទ្ទិសដល់បុត្រា និងមេទ័ព៤នាក់របស់ព្រះអង្គដែលបានពលីនៅក្នុងសមរភូមិដេញចាមនៅឆ្នាំ១១៧៧។ ប្រាសាទបន្ទាយឆ្មារ មានទីតាំងស្ថិតនៅ ភូមិបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ និងមានចំងាយប្រមាណ៧០គីឡូម៉ែត្រពីទីប្រជុំជនខេត្តបន្ទាយមានជ័យខាងជើង៕























Account
Security
Favourite Content