ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
អាជ្ញាធរជាតិអប្សរា បានរៀបចំហេដ្ឋារចនាសម្ពន្ធជាបន្តបន្ទាប់ ហើយថ្មីៗនេះផ្លូវបេតុងថ្មី ២ ខ្សែ ដែលទើបនឹងស្ថាបនាហើយថ្មីនេះ ក្រៅពីផ្តល់នូវសុខសុវត្ថិភាពបន្ថែមជូនអ្នកធ្វើដំណើរ ក៏រួមចំណែកកាត់បន្ថយការកកស្ទះក្នុងតំបន់អង្គរ។
ក្រៅពីនោះក៏ជួយលើកកម្ពស់ជីវភាពរស់នៅរបស់សហគមន៍មូលដ្ឋានកាន់តែប្រសើរ។ ផ្លូវចាក់បេតុង ២ ខ្សែ នៅក្នុងរមណីយដ្ឋានអង្គរ ប្រវែងសរុប ៣ ០១០ម៉ែត្រ បានបើកឲ្យទេសចរ និងប្រជាពលរដ្ឋទូទៅអាចប្រើប្រាស់ជាផ្លូវការចាប់ពីថ្ងៃ ១ ខែមេសា ឆ្នាំ ២០២៦ តទៅ។
ផ្លូវបេតុងដែលមានទទឹង ៦ម៉ែត្រ និងកម្រាស់ ២០ សង់ទីម៉ែត្រ មួយខ្សែប្រវែង ២ ១៨០ ម៉ែត្រ ចេញពីមុខខ្លោងទ្វារដីឆ្នាំងនៃអតីតក្រុងអង្គរធំ កែងផ្លូវទិសខាងជើងប្រាសាទព្រះខ័ន ស្ថិតនៅក្នុងភូមិនគរក្រៅ សង្កាត់គោកចក ក្រុងសៀមរាប ឆ្ពោះទៅដល់ផ្លូវបំបែកទៅឃុំពាក់ស្នែងនៃស្រុកអង្គរធំ។ មួយខ្សែទៀតប្រវែង ៨៣០ ម៉ែត្រ ចេញពីស្ពានក្រាំងក្រូច ឆ្ពោះទៅភូមិថ្នល់បណ្ដោយ នៃឃុំព្រះដាក់ស្រុកបន្ទាយស្រី។
អគ្គនាយករង និងជាអ្នកនាំពាក្យនៃអាជ្ញាធរជាតិអប្សរា លោក ជុំ សុភមករា បានផ្ដល់កិច្ចសម្ភាសន៍ជាមួយអ្នកសារព័ត៌មាន កាលពីម្សិលមិញថា ការប្រកាសដាក់ឲ្យប្រើប្រាស់ផ្លូវបេតុងទាំង ២ ខ្សែនេះ គឺមានប្រយោជន៍ជាច្រើន ដូចជា ការជួយបញ្ចៀសការកកស្ទះចរាចរណ៍នៅមុខប្រាសាទព្រះខ័នខាងលិច ផ្ដល់ជម្រើសបន្ថែមក្នុងការធ្វើដំណើរ ប្រកបដោយសុវត្ថិភាព ចំណេញទាំងពេលវេលា និងថវិការបស់ពលរដ្ឋ។
ផ្លូវបេតុងទាំង ២ ខ្សែនេះក៏នឹងរួមចំណែកផ្ដល់បទពិសោធន៍ថ្មីដល់ដំណើរទស្សនារមណីយដ្ឋានអង្គរ កាន់តែប្រសើរមួយកម្រិតទៀត ស្របតាមផែនការយុទ្ធសាស្ត្រ និងផែនការសកម្មភាពរបស់អាជ្ញាធរជាតិអប្សរា លើការរៀបចំហេដ្ឋារចនាសម្ពន្ធពាក់ព័ន្ធ ក្នុងគោលដៅត្រៀមខ្លួនបានរួចរាល់ ដើម្បីទទួលទេសចរក្នុងបរិមាណច្រើនលាននាក់។
រៀងរាល់រដូវបុណ្យទាន អាជ្ញាធរជាតិអប្សរា តែងសម្គាល់ឃើញផ្លូវចន្លោះពីមុខខ្លោងទ្វារដីឆ្នាំងរហូតផ្លូវខាងលិចប្រាសាទព្រះខ័ន តែងស្ទះចរាចរណ៍។ បែបនេះហើយទើបថ្នាក់ដឹកនាំអាជ្ញាធរជាតិអប្សរា រៀបចំកែលម្អជាផ្លូវថ្មីនេះឡើង ដើម្បីសម្រួលក្នុងការធ្វើដំណើររបស់ទេសចរ និងពលរដ្ឋក្នុងតំបន់ត្រូវធ្វើដំណើរចាំបាច់ទៅមន្ទីរពេទ្យ ក្នុងករណីមានអ្នកជំងឺ ឬស្ត្រីមានផ្ទៃពោះសង្គ្រោះទាន់វេលា៕
រូបភាព៖ អាជ្ញាធរជាតិអប្សរា
Account
Security
Favourite Content