តារាសម្ដែងចិន Zhao Lusi បានបង្ហាញមុខជួបអ្នកគាំទ្រលើកដំបូងកាលពីចុងសប្ដាហ៍កន្លងទៅនេះ ក្រោយមានព័ត៌មានថានាងមានជំងឺធ្លាក់ទឹកចិត្តធ្ងន់ធ្ងរ និងរងសម្ពាធគំរាមកំហែងពីសំណាក់អ្នកចាត់ការ។


កាលពីថ្ងៃសៅរ៍ ទី២៥ ខែមករាកន្លងទៅ តារាសម្ដែងស្រីរូបនេះបានចូលរួមកម្មវិធីជួបជុំអ្នកគាំទ្ររៀបចំដោយក្រុមហ៊ុនភេសជ្ជៈមួយនៅទីក្រុងឆឹងទូ ប្រទេសចិន ដែលជាការបង្ហាញខ្លួនជាសាធារណៈលើកដំបូងរបស់នាងចាប់តាំងពីការបង្ហាញពីការប្រយុទ្ធនឹងជំងឺធ្លាក់ទឹកចិត្តកាលពីចុងឆ្នាំ២០២៤។





ក្នុងព្រឹត្តិការណ៍នេះដែរ តារាស្រីត្រកូល Zhao បាននិយាយអំពីបញ្ហាសុខភាពរបស់នាងថានាងបានជួបប្រទះរោគសញ្ញានៃការខ្វិននិងការបាត់បង់សមត្ថភាពនិយាយ។ វាពិតជាពិបាកខ្លាំង ប៉ុន្តែឥឡូវនេះ នាងសប្បាយចិត្តដែលអាចឆ្លងផុតគ្រោះថ្នាក់។ នាងបន្ថែមថា មុនចូលឆ្នាំចិន នាងចង់បង្ហាញគ្រប់គ្នាថានាងកំពុងប្រសើរឡើងហើយ និងបានលួងចិត្តអ្នកគ្រប់គ្នាដែលបានយំដោយសារនាង។
ក្រោយបង្ហាញខ្លួនក្នុងកម្មវិធីនេះ ក្រុមហ៊ុនគ្រប់គ្រងរបស់ Zhao Lusi ក៏បានចេញផ្សាយវីដេអូដ៏រំជួលចិត្តដែលចងក្រងពីដំណើរតស៊ូរបស់តារាស្រីវ័យ ២៦ ឆ្នាំរូបនេះ ដើម្បីជាសះស្បើយពីជំងឺធ្លាក់ទឹកចិត្តធ្ងន់ធ្ងរ។ ខ្សែវីដេអូបានបង្ហាញតាំងពីគ្រាដែលនាងអាការធ្ងន់ធ្ងរ ទាំងពេលដែលនាងយំ និងមិនអាចកម្រើករាងកាយបានធម្មតាបាន ដោយស្ទើរតែមិនអាចញ៉ាំ និយាយ ឬដើរបានដោយខ្លួនឯង រហូតដល់ស្ថានភាពរបស់នាងចាប់ផ្ដើមប្រសើរឡើងក្រោមការមើលថែយ៉ាងជិតស្និទ្ធពីមនុស្សជុំវិញខ្លួន។
ការបញ្ចេញវីដេអូយ៉ាងលម្អិតអំពីអាការរបស់ Zhao Lusi បានបង្កឱ្យមានប្រតិកម្មចម្រុះតាមអ៊ីនធឺណិត ដោយអ្នកគាំទ្រខ្លះសាទរចំពោះភាពក្លាហានរបស់នាង ខណៈអ្នកខ្លះទៀតរិះគន់ក្រុមហ៊ុនដោយចោទសួរថា តើសមស្របឬទេដែលត្រូវចែករំលែករូបភាពឯកជនរបស់នាងបែបនេះ។ ទន្ទឹមនឹងនេះដែរ មានមនុស្សជាច្រើនបានសរសេរពាក្យជូនពរយ៉ាងអស់ពីចិត្តឱ្យតួឯកស្រីរឿង “ប្រវត្តិស្នេហ៍ឈិនឈានឈាន” បានជាសះស្បើយពេញលេញផងដែរ ៕


























Account
Security
Favourite Content