ដំណឹងភ្ជាប់ពាក្យរវាងតារាសម្ដែងប្រុសអង់គ្លេស Tom Holland និងតារាស្រីអាមេរិក Zendaya ដែលជាតួឯកក្នុងរឿង Spider-Man បានផ្ទុះព្រោងព្រាតលើបណ្ដាញព័ត៌មានពិភពលោក បន្ទាប់ពីZendaya បានបង្ហាញខ្លួនជាមួយចិញ្ចៀនភ្ជាប់ពាក្យដ៏ធំក្នុងកម្មវិធីពានរង្វាន់ Golden Globes កាលពីពេលថ្មីៗកន្លងទៅ។
ក្រោយបង្ហាញខ្លួនជាមួយរ៉ូបពណ៌ទឹកក្រូចយ៉ាងស្រស់ស្អាតលើកម្រាលព្រំក្រហមនៃកម្មវិធីពានរង្វាន់ Golden Globes កាលពីថ្ងៃទី៥ ខែមករា Zendayaបានទាក់ទាញការចាប់អារម្មណ៍ទស្សនិកជនគ្រប់គ្នាជាពិសេសសម្រាប់ចិញ្ចៀនពេជ្រលើដៃនាងខាងឆ្វេង ដែលត្រូវបានគេជឿថាជាចិញ្ចៀនភ្ជាប់ពាក្យរបស់នាងជាមួយគូស្នេហ៍ គឺតារាសម្ដែង Tom Holland។
ផ្អែកតាមសារព័ត៌មាន TMZ ដែលចុះផ្សាយកាលពីថ្ងៃទី៧ ខែមករា ដោយដកស្រង់សម្ដីប្រភពជិតស្និទ្ធនឹងតារាទាំងពីរដួងបង្ហើបថា អ្នកទាំងពីរពិតជាបានភ្ជាប់ពាក្យនឹងគ្នារួចហើយមែន ដោយ Tom Holland បានសុំ Zendaya រៀបការក្នុងពិធីជួបជុំបែបឯកជនសម្រាប់បុណ្យគ្រិស្តម៉ាសនិងចូលឆ្នាំសកលកន្លងទៅ នៅផ្ទះសាច់ញាតិរបស់ Zendaya ឯសហរដ្ឋអាមេរិក។
ប្រភពព័ត៌មានបានឱ្យដឹងទៀតថា បើទោះជាបានភ្ជាប់ពាក្យហើយក៏ពិតមែន ប៉ុន្តែតារាប្រុសស្រីវ័យ ២៨ឆ្នាំទាំងពីររូបមិនទាន់មានគម្រោងរៀបមង្គលការជាមួយគ្នាក្នុងពេលឆាប់ៗនេះនោះទេ ដោយទាំងពីររូបសុទ្ធតែកំពុងផ្ដោតលើការងារដ៏មមាញឹករៀងៗខ្លួន។
មែនទែនទៅចំណងស្នេហ៍រវាង Zendaya និង Holland បានចាប់ផ្ដើមតាំងពីឆ្នាំ២០២១ ពោលគឺរយៈពេលប្រមាណបីឆ្នាំបន្ទាប់ពីបានសម្ដែងភាពយន្ត “Spider-Man” ជាមួយគ្នា។ តារាទាំងពីររូបបានក្លាយជាគូស្នេហ៍ដែលមានអ្នកគាំទ្រច្រើនបំផុតមួយគូក្នុងពិភពហូលីវូដ ទោះបីជាពួកគេមិនសូវនិយាយបើកចំហអំពីជីវិតស្នេហារបស់ខ្លួនក្ដី ៕