នៅក្នុងវគ្គថ្មីនៃកម្មវិធី The Tonight Show Starring Jimmy Fallon ចេញផ្សាយនៅថ្ងៃទី៧ ខែតុលានេះ Taylor Swift បានបង្ហើបពីមូលហេតុដែលនាងនៅមិនទាន់បានឡើងសម្ដែងនៅក្នុងវគ្គសម្រាកកណ្ដាលការប្រកួតរបស់កម្មវិធីប្រកួតកីឡាអាមេរិក Super Bowl។

ជាក់ស្ដែង ពិធីករ Jimmy Fallon គឺជាអ្នកដែលបានលើកប្រធានបទនេះឡើង ដើម្បីស្វែងរកការពិតថា ហេតុអ្វីបានជា Taylor Swift នៅមិនទាន់បានឡើងសម្ដែងនៅក្នុងកម្មវិធី Super Bowl Halftime Show។ តារាស្រីវ័យ ៣៥ ឆ្នាំរូបនេះបានឆ្លើយតបវិញថា តាមពិតទៅ នាងនៅមិនទាន់បានទទួលការអញ្ជើញពី Roc Nation ដែលជាក្រុមហ៊ុនគ្រប់គ្រងការផលិតកម្មវិធីរបស់ Jay-Z នោះទេ។ យ៉ាងណាមិញ បើទោះបីជានាងទទួលបានការអញ្ជើញឱ្យទៅសម្ដែងនៅក្នុងឆ្នាំនេះ នាងក៏នឹងបដិសេធដែរ ព្រោះមានគូដណ្ដឹង លោក Travis Kelce ជាដើមហេតុ។
Taylor Swift បាននិយាយថា៖ “Jay-Z គាត់ល្អជាមួយខ្ញុំមករហូត។ ក្រុមពួកយើងជិតស្និទ្ធគ្នាណាស់ដែរ។ ពេលខ្លះពួកគេតេមកសួរខ្ញុំថា តើខ្ញុំមានអារម្មណ៍បែបណាចំពោះការសម្ដែងក្នុងកម្មវិធីនេះ? តែនេះមិនមែនជាការអញ្ជើញផ្លូវការដែលកើតឡើងនៅក្នុងបន្ទប់ប្រជុំទេ”។

តារាស្រីទើបបញ្ចេញអាល់ប៊ុមទី ១២ The Life of a Showgirl បានរៀបរាប់ថា បើទោះបីជា Jay-Z ឱ្យទៅចូលរួមសម្ដែងក្នុងឆ្នាំនេះក្ដី នាងក៏មិនអាចទៅដែរ ព្រោះគូដណ្ដឹងរបស់នាង គឺមានឱកាសអាចនឹងចូលរួមប្រកួតបាល់ឱបក្នុងនាមជាសមាជិកក្រុម Kansas City ហើយការប្រកួតនេះវាគ្រោះថ្នាក់ ដែលមិនអាចធ្វើឱ្យនាងផ្ដោតអារម្មណ៍ទៅលើការសម្ដែងរបស់ខ្លួនបានទេ។
“ក្នុងរដូវកាលប្រកួតម្ដងៗ ខ្ញុំត្រូវផ្ដោតអារម្មណ៍ទៅលើអ្វីដែលបុរសនេះត្រូវធ្វើនៅទីលានប្រកួត។ អ្នកសាកគិតទៅមើលថា បើគាត់ត្រូវចេញទៅប្រកួតដោយប្រថុយជីវិត ព្រោះកីឡានេះវាគ្រោះថ្នាក់ទាំងរាងកាយ និងមានសម្ពោធច្រើនទៀត តែខ្ញុំបែរជាត្រូវគិតថា តើក្បាច់រាំនឹងចេញមកបែបណា? ឬគិតពីបទចម្រៀងថា ខ្ញុំប្រហែលត្រូវច្រៀងបទ Shake it off 2 វគ្គ តដោយបទ Blank Space និង Cruel Summer។ ខ្ញុំមិនអាចធ្វើបែបនេះបានទេ ព្រោះខ្ញុំរវល់តែគិតដល់គាត់” Taylor Swift បានបកស្រាយបន្ថែមដូច្នេះ ។

គួរឱ្យដឹងផងដែរថា Taylor Swift និង Travis Kelce បានទាក់ទងគ្នាជាលើកដំបូង នៅក្នុងរដូវក្ដៅ ឆ្នាំ២០២៣ មុននឹងគូស្នេហ៍តារាចម្រៀង និងកីឡាកររូបនេះ បានសម្រេចរំកិលទំនាក់ទំនងអ្នកទាំងពីរទៅមួយកម្រិតទៀត ក្នុងនាមជាគូដណ្ដឹងនៅខែសីហា ឆ្នាំនេះ៕
























Account
Security
Favourite Content