Selena Gomez និង Taylor Swift គឺជាមិត្តជិតស្និទ្ធនឹងគ្នាអស់រយៈពេលជាច្រើនឆ្នាំមកហើយ ហើយម្នាក់ៗសុទ្ធតែបានឆ្លងកាត់រឿងរ៉ាវផ្សេងៗជាច្រើននៅក្នុងជីវិត។ ឥឡូវនេះ តារាស្រីទាំងពីរបានរកឃើញមនុស្សដែលពួកគេចង់រស់នៅជាមួយមួយជីវិត និងបានភ្ជាប់ពាក្យរួចដូចគ្នាហើយថ្មីៗនេះ Selena Gomez ក៏បានចែករំលែករូបភាព Meme មួយដែលអ្នកគាំទ្រម្នាក់បានធ្វើឱ្យ ដោយមានសារដែល Taylor Swift បានសរសេរឱ្យនាងកាលពី ១៦ ឆ្នាំមុនក្នុងនោះដែរ។


រូបភាព Meme ដែលត្រូវបានចែករំលែកនៅលើបណ្ដាញសង្គម X បានបង្ហាញពីសារដែលTaylor Swift បានផ្ញើទៅ Selena Gomez ក្នុងឆ្នាំ ២០០៩ មានខ្លឹមសារថា៖ “ស្នេហាពិតនៅតែអាចកើតឡើងនៅពេលមួយ។ វាមិនមែនអ្វីដែលងាយស្រួលរក ដូចកាលដែលយើងគិតពេលអាយុ ៩ឆ្នាំទេ។ ខ្ញុំជឿបែបនេះ ហើយអ្នកក៏ត្រូវជឿបែបនេះដូចគ្នា”។ នៅផ្នែកខាងលើក៏មានរូបថតភ្ជាប់ពាក្យរបស់ Selene Gomez និង Benny Blanco ជាមួយរូបថតភ្ជាប់ពាក្យរបស់ Taylor Swift និង Travis Kelce ដោយមាន Caption ថា “១៦ ឆ្នាំក្រោយ” ។
គួររំឭកថា Selena Gomez បានចែករំលែកដំណឹងភ្ជាប់ពាក្យរបស់នាងជាមួយផលិតករ Benny Blanco កាលពីចុងឆ្នាំមុន។ អ្នកទាំងពីរគឺជាមិត្តរួមការងារ និងក្លាយជាមិត្តល្អនឹងគ្នា មុនពេលចាប់ផ្តើមទំនាក់ទំនងស្នេហានៅចុងឆ្នាំ ២០២៣ និងភ្ជាប់ពាក្យនៅខែធ្នូ ឆ្នាំ ២០២៤។ ខណៈពេលកាលបរិច្ឆេទរៀបការមិនទាន់ត្រូវបានប្រកាសជាសាធារណៈ ប៉ុន្តែមនុស្សជាច្រើនជឿថាពិធីមង្គលការពួកគេនឹងប្រព្រឹត្តទៅក្នុងពេលឆាប់ៗនេះ ខណៈដែលថ្មីៗនេះ Selena Gomez បានធ្វើដំណើរកម្សាន្តជាមួយក្រុមមិត្តរបស់នាង និងមានពាក្យចចាមអារ៉ាមថាជាដំណើរកម្សាន្តជប់លៀងលាភាពនៅលីវរបស់នាង។
ចំណែក Taylor Swift និងកីឡាករបាល់ឱប Travis Kelce បានប្រកាសពីការភ្ជាប់ពាក្យរបស់ពួកគេកាលពីប៉ុន្មានថ្ងៃមុន បន្ទាប់ពីទាក់ទងគ្នាបានប្រហែលពីរឆ្នាំ។ ការសុំរៀបការបានធ្វើឡើងនៅក្នុងបរិវេណសួនច្បារផ្ទះរបស់លោក ដែលតុបតែងយ៉ាងស្រស់ស្អាតជាមួយនឹងដើមឈើ និងផ្កា បង្កើតបរិយាកាសរ៉ូមែនទិក។ ប្រាកដណាស់ មិត្តភ័ក្តិនៅក្នុងសិល្បៈ ប្រព័ន្ធផ្សព្វផ្សាយ និងអ្នកគាំទ្រទូទាំងពិភពលោក សុទ្ធតែអបអរសាទរពួកគេជាខ្លាំង ៕





























Account
Security
Favourite Content