បន្ទាប់ពីរៀបអាពាហ៍ពិពាហ៍ជាមួយនឹងស្វាមីជាដុកទ័រកាលពីថ្ងៃទី២៦ ខែកញ្ញា ឆ្នាំ២០២២ ហើយតារាសម្ដែងស្រីហុងកុង Alice Chan ហាក់ដូចជាដកឃ្លាពីការងារសម្ដែងបន្ដិចដើម្បីចំណាយផ្ទាល់ខ្លួនជាមួយគ្រួសារ។
បង្ហាញមុខនៅទីក្រុង Kowloon ទឹកដីហុងកុងក្នុងកម្មវិធីមួយតារាសម្ដែងស្រី Alice Chan បានបង្ហើបថាថ្មីៗនេះនាងកំពុងតែថតខ្សែភាពយន្ដ “Lady Justice of Themis” នៅប្រទេសចិន ភាគច្រើនម៉ោង ៦ ព្រឹកដែលធ្វើឱ្យនាងមិនបានគេងច្រើនឡើយ។ ប៉ុន្តែទោះបីជាប់រវល់ខ្លាំងយ៉ាងណាក៏នាងឆ្លៀតមកហុងកុងដើម្បីចូលរួមកម្មវិធីជាសាធារណៈ បន្ទាប់មកនឹងវិលត្រលប់ទៅប្រទេសចិនដើម្បីបន្ដការងារ។
យោងតាមសារព័ត៌មានហុងកុង HK01 តារាស្រីរូបនេះបានបន្ដឱ្យដឹងថាក្រោយចំណាយពេលថតអស់រយៈពេល ១០ ថ្ងៃមកនេះ នាងពិតជាមានអារម្មណ៍ហត់នឿយដោយសារក្នុងរឿងនេះនាងបានដើរតួជាមេធាវីដែលតម្រូវឱ្យទន្ទេញពាក្យ និងភាសាច្បាប់ជាច្រើន ដូច្នេះហើយទើបនាងខំប្រឹងយ៉ាងខ្លាំងដើម្បីសម្ដែងឱ្យបានល្អ។
បើក្រឡេកមកមើលពីជីវិតផ្ទាល់ខ្លួនវិញ ខណៈកំពុងឈរជើងលើទីផ្សារខ្សែភាពយន្ដនៅប្រទេសចិន Alice Chan ក៏បានបន្ថែមថាមួយរយៈចុងក្រោយគឺនាងមិនសូវបានចំណាយពេលនៅផ្ទះឡើយ ដូច្នេះក្នុងនាមជាភរិយាម្នាក់កិច្ចការទីមួយនៅពេលនាងត្រលប់ទៅដល់គឺត្រូវធ្វើកិច្ចការផ្ទះឱ្យបានលឿនបំផុតដែលជាចំណែកមួយធ្វើឱ្យនាងមានភាពហត់នឿយថែមមួយកម្រិតទៀតដែរ។ ការចែករំលែកបែបនេះគឺដោយសារតែស្វាមីរបស់នាងមមាញឹកនឹងការងារខ្លាំងបូករួមនឹងមិនសូវប៉ិនប្រសប់ក្នុងការរៀបចំផ្ទះ ទើបធ្វើឱ្យផ្ទះមានភាពរញ៉េរញ៉ៃ។
គួរបញ្ជាក់ផងដែរថាខ្សែភាពយន្ដដែលពណ៌នាអំពីវិស័យច្បាប់ “Lady Justice of Themis” មួយនេះត្រូវបានគេរំពឹងថាមានការចូលរួមសម្ដែងដោយតារាស្រីជើងចាស់ Charmaine Sheh. Patrick Tam, Benz Hui, Joman Chiang, Mark Ma, Kalok Chow និង Joey Thye ផងដែរ៕