ដូចប្រិយមិត្តមួយចំនួនបានដឹងស្រាប់ហើយថា តារាសម្ដែងប្រុសចិន Kris Wu បានជាប់ពាក់ព័ន្ធរឿង បៀតបៀនផ្លូវភេទលើក្មេងស្រីមិនទាន់គ្រប់អាយុកាលពីឆ្នាំ ២០២១។ រឿងនេះដែរធ្វើឱ្យអាជីពសិល្បៈរបស់លោកដួលរំលំទៅទាំងស្រុងមិនអាចស្រោចស្រង់បាន ថែមទាំងត្រូវជាប់ពន្ធនាគារថែមទៀត។ ជាមួយគ្នាដែរ សូម្បីតែរឿងដែលលោកចូលរួមថតក៏ត្រូវជាប់គាំងមិនអាចចាក់ផ្សាយបាន និងប្រឈមមុខខាតរាប់សិបលានដុល្លារអាមេរិក។

មុនផ្ទុះរឿងអាស្រូវ តារាប្រុស Kris Wu បានចូលរួមសម្ដែងក្នុងរឿងភាគខ្នាតធំមួយរបស់ក្រុមហ៊ុន Tencent ដែលមានចំណងជើងថា “The Golden Hairpin”។ រឿងនេះត្រូវបានរាយការណ៍ថាជារឿងភាគចិនដែលចំណាយប្រាក់អស់ច្រើនក្នុងការផលិតរហូតដល់ជាង ៤២ លានដុល្លារអាមេរិក។ រឿងនេះដែរត្រូវបានផលិតយ៉ាងយកចិត្តទុកដាក់ និងចំណាយពេលថតរហូតដល់ជាង ៨ ខែឯណោះ។
រឿងនេះដែរមានគម្រោងចាក់ផ្សាយក្នុងឆ្នាំ ២០២១ និងត្រូវបានគេចាត់ទុកថាជារឿងចាយទុនអស់ច្រើនខ្លាំងមួយក្នុងការផលិតក្នុងឆ្នាំ ២០២០ ផងដែរ ប៉ុន្ដែក្រោយមកក៏មិនអាចចេញផ្សាយបានដោយសារតែតួឯកប្រុសជាប់មានរឿងអាស្រូវ។


បើតាមប្រភពព័ត៌មានចិន Sohu បានឱ្យដឹងថា ក្រុមការងាររឿងភាគមានបំណងប្រើបច្ចេកវិទ្យា AI ដើម្បីផ្លាស់ប្ដូរទម្រង់មុខតួប្រុសដើម្បីមានឱកាសចាក់ផ្សាយ។ ដោយបានទំនាក់ទំនងទៅតារាប្រុសល្បី Lin GengXin ដែលជាតួឯកប្រុសឱ្យរឿង “Princess Agents” មកជំនួសធ្វើជាតួឯក និងប្រើប្រាស់ទម្រង់មុខលោកជំនួស Kris វិញ។ ប៉ុន្ដែលោកបានបដិសេធមិនចូលរួមធ្វើការក្នុងរឿងភាគនេះឡើយ។

ក្រៅពីនេះ ក្រុមការងារមានគម្រោងកាត់ឈុតតួប្រុសចេញទាំងអស់ និងប្ដូររឿងនេះទៅផ្ដោតលើដំណើរជីវិតតួស្រីតែម្ដង ដោយគ្មានតួប្រុស។ បើតាមប្រភពផ្ទៃក្នុងបានឱ្យដឹងទៀតថា តារាស្រី Yang Zi ដែលជាតួឯកស្រីក្នុងរឿងនេះ បានទៅថតឈុតមួយចំនួនសាឡើងវិញដោយមិនយកប្រាក់ដើម្បីផ្លាស់ប្ដូរវគ្គមួយចំនួន និងអាចចាក់ផ្សាយវិញ។

រឿងភាគ “The Golden Hairpin” ដើមឡើយត្រូវបានរាយការណ៍ថាមាន ៦០ ភាគ ប៉ុន្ដែអាចនឹងកាត់មកសល់ត្រឹម ៤០ ភាគវិញ ដោយសារតែការកាត់ឈុតផ្សេងៗ ក្នុងរឿងចេញ ប៉ុន្ដែមិនទាន់ដឹងនូវឡើយទេថាវាសនារបស់រឿងភាគមួយនេះអាចចាក់ផ្សាយបានជាសាធារណៈបានឬអត់ ដោយសារតែអស់រយៈពេលជិត ៣ ឆ្នាំទៅហើយនៅតែមិនទាន់មានដំណឹងអាចចាក់ផ្សាយបាន៕
























Account
Security
Favourite Content