កាលពីចុងសប្តាហ៍កន្លងទៅ ផលិតកម្ម LD Entertainment បានសម្ពោធចាក់បញ្ចាំងភាពយន្តថ្មី ចំណងជើង «ប៉ាកូរចង់បានប្រពន្ធ» ជារឿងស៊េរីបន្តពី «លោកប៉ាមហា កូរ» ដែលធ្លាប់ទទួលបានការគាំទ្រយ៉ាងខ្លាំងក្លាកាលពេលកន្លងមក។


«ប៉ាកូរចង់បានប្រពន្ធ» ជាសាច់រឿងបន្តពីរឿង «លោកប៉ាមហាកូរ» ប៉ុន្តែ ដើម្បីឱ្យរឿងកាន់តែមានគុណភាពល្អសម្រាប់អ្នកទស្សនា ផលិតកម្មបានដាក់បញ្ចូលតួអង្គសំខាន់ ៗជាច្រើន រួមទាំង ស៊ីន យូប៊ីន និង លឹម ជាឡាយ ជាដើម មកជួយញ៉ាំងឱ្យសាច់រឿងនេះរឹតតែទាក់ទាញខ្លាំង។ នេះបើតាមការឱ្យដឹងពីលោក លៀក លីណា អ្នកគ្រប់គ្រង និងចាត់ការទូទៅក្នុងផលិតកម្ម LD Entertainment។
លោកបន្តថា ការបន្តផលិតរឿងវគ្គ២ បាន គឺទាល់តែយើងជោគជ័យលើការផលិតវគ្គ១ សិន ហើយការផលិតវគ្គ២ ដាច់ខាតគឺត្រូវតែល្អជាងវគ្គ១ ពោលនោះគឺបានន័យថា ផលិតកម្មត្រូវតែប្រឹងពង្រឹងគុណភាពរឿងឱ្យកាន់តែល្អសម្រាប់អ្នកទស្សនា។ ដូច្នេះ លោកមានក្តីរំពឹងខ្លាំងលើរឿង «ប៉ាកូរចង់បានប្រពន្ធ» នឹងអាចផ្ទុះកាន់តែខ្លាំងជាងវគ្គ១ទៅទៀត។


ក្រឡេកទៅមើល កំពូលតារាស្រី ស៊ីន យូប៊ីន ដែលត្រូវសម្តែងប៉ះខ្ចីចាស់ក្នុងវិស័យភាពយន្ត លោក ទេព រិន្ទដារ៉ូ ឯណោះវិញ ក៏បានលើកឡើងថា រឿងនេះពិតជាគួរឱ្យចាប់អារម្មណ៍ខ្លាំងមែនទែន ពិសេសអ្នកសេដមិនគួរខកខានទស្សនារឿងនេះឡើយ ព្រោះគ្រាន់តែអានសាច់រឿង យូប៊ីន ធានាថា លោកអ្នកនឹងសើចរឹងថ្គាមជាក់ជាមិនខាន។
ស្រីស្អាត យូប៊ីន បង្ហើបឱ្យដឹងថា ទស្សនិកជននឹងបានឃើញលោក រ៉ូ ក្នុងរូបភាពថ្មីមួយបែបទៀតដែលលោកអ្នកមិនធ្លាប់ឃើញពីមុនមកនោះឡើយ ព្រោះកំពូលតារាសម្ដែងប្រុសជើងចាស់រូបនោះ បានផ្លាស់ប្តូរខ្លួនឯងស្ទើរតែ ៣៦០ ដឺក្រេតែម្តង។ រឹតតែពិសេស គឺ ទេព រិន្ទដារ៉ូ មានគម្រោងការ និងក្បូរក្បាច់ញ៉ែច្រើនណាស់ ដែលនឹងធ្វើឱ្យលោកអ្នកផ្ទុះសំណើចក្អាកក្អាយ សូម្បីថ្ងៃសម្ភោធចាក់បញ្ចាំង ហ្វេនៗនាំគ្នាសើចឡើងគាំងតែម្តង។




សូមជម្រាបថា រឿង «ប៉ាកូរចង់បានប្រពន្ធ» មានការចូលរួមសម្តែងដោយ លោក ទេព រិន្ទដារ៉ូ , កញ្ញា ស៊ីន យូប៊ីន , កញ្ញា ហេង ចន្ថា , លោក លឹម ជាឡាយ , ប្រុស ខួច , លោក អ៊ុំ សុវណ្ណគីរី និងតារាសម្តែងប្រុសស្រីជាច្រើនរូបទៀត។ «ប៉ាកូរចង់បានប្រពន្ធ» ចាប់ចាក់បញ្ចាំងនៅគ្រប់រោងភាពយន្ត ពីថ្ងៃទី ០៧ ខែកញ្ញា ឆ្នាំ ២០២៣ តទៅ៕


























Account
Security
Favourite Content