អតីតសមាជិកក្រុមចម្រៀង K-pop NCT ឈ្មោះ Moon Tae-il ដែលត្រូវបានស្គាល់ច្រើនតាមរយៈឈ្មោះខ្លី Taeil បានសារភាពចំពោះការចោទប្រកាន់លើរូបលោកពាក់ព័ន្ធករណីរំលោភបូក ក្នុងកំលុងពេលសវនាការលើកដំបូងកាលពីថ្ងៃពុធ ថ្ងៃទី ១៨ ខែមិថុនា។


តារាប្រុសវ័យ ៣១ ឆ្នាំរូបនេះត្រូវបានតុលាការចោទប្រកាន់ក្នុងករណីរំលោភបូក កាលពីថ្ងៃទី ២៨ ខែកុម្ភៈឆ្នាំ២០២៥នេះ បន្ទាប់ពីមានរបាយការណ៍ថាលោកនិងបុរសពីរនាក់ទៀតបានរំលោភផ្លូវភេទលើអ្នកទេសចរដែលស្ថិតក្នុងស្ថានភាពស្រវឹងកាលពីខែមិថុនា ឆ្នាំ ២០២៤ ។
កំលុងពេលសវនាការលើកដំបូង តំណាងអយ្យការបានទាមទារឱ្យផ្តន្ទាទោសដាក់ពន្ធនាគាររយៈពេលប្រាំពីរឆ្នាំសម្រាប់បុរសទាំងបីនាក់ ដោយសំអាងថា សកម្មភាពនៃឧក្រិដ្ឋកម្មនេះគឺ “ធ្ងន់ធ្ងរបំផុត” ។
រដ្ឋអាជ្ញាបានថ្លែងថា៖ «បន្ទាប់ពីប្រព្រឹត្តបទល្មើស ជនជាប់ចោទថែមទាំងបានពិភាក្សាអំពីការបញ្ជូនជនរងគ្រោះចេញតាមរថយន្តតាក់ស៊ីទៅកាន់ទីតាំងផ្សេងពីកន្លែងប្រព្រឹត្តបទល្មើសថែមទៀត។ ពួកគេមានចេតនារារាំងជនរងគ្រោះមិនឱ្យចងចាំទីតាំងឧក្រិដ្ឋកម្ម ឬរារាំងការតាមដានរបស់ប៉ូលិស»។
ក្នុងសវនាការនេះ Taeil បានស្នើសុំការបន្ធូរបន្ថយទោស ដោយបាននិយាយថា៖ “ខ្ញុំសូមអភ័យទោសជាខ្លាំងចំពោះអ្នកគ្រប់គ្នាដែលខកចិត្តចំពោះខ្ញុំ… ប្រសិនបើមានការយោគយល់អធ្យាស្រ័យ ខ្ញុំនឹងចាត់ទុកវាជាឱកាសចុងក្រោយរបស់ខ្ញុំក្នុងជីវិត ហើយនឹងប្រឹងប្រែងឱ្យអស់ពីសមត្ថភាពដើម្បីរួមចំណែកដល់សង្គមតាមគ្រប់មធ្យោបាយដែលខ្ញុំអាចធ្វើបាន”។ តារាប្រុសរូបនេះបាននិយាយទៀតថាបន្ទាប់ពីការបញ្ចប់កិច្ចសន្យារបស់ខ្លួនជាមួយ SM Entertainment ក្នុងខែតុលា ឆ្នាំ ២០២៤ លោកបានធ្វើការក្រៅម៉ោងនៅភោជនីយដ្ឋានមិត្តរបស់លោកដើម្បីចិញ្ចឹមជីវិត។
យ៉ាងណាមិញ មតិសាធារណៈជាច្រើនលើកឡើងថាការដាក់ទោស ៧ ឆ្នាំនេះគឺតិចពេកផងបើធៀបនឹងទង្វើរបស់លោកនិងគ្នីគ្នា។
សូមបញ្ជាក់ថា សវនាការកាត់ទោសជនល្មើសទាំងបីនាក់ត្រូវកំណត់ទៅថ្ងៃទី១០ ខែកក្កដា ៕



























Account
Security
Favourite Content