កញ្ញា ស៊ូ ស្រីនីត ជយលាភីលំដាប់រងទី៣ នៃកម្មវិធី Miss Grand Cambodia 2023 ថ្មីៗនេះ បានប្រាប់ឱ្យអ្នកសារព័ត៌មានសិល្បៈក្នុងស្រុកដឹងថា នាងនឹងត្រឡប់មកប្រកួតប្រជែងកម្មវិធី Miss Grand Cambodia ម្តងទៀតនៅឆ្នាំខាងមុខ ប៉ុន្តែពេលនេះមិនទាន់អាចកំណត់ថាឆ្នាំណាឱ្យប្រាកដនោះឡើយ។


កូនស្រីអ្នកកំពង់ធំរូបនេះឱ្យដឹងបន្តថា ព្រោះនាងស្រលាញ់វិស័យនេះ ទើបចញ្ចឹមចិត្តចង់វិលត្រឡប់មកប្រកួតប្រជែងម្តងទៀត ហើយការដែលមិនច្បាស់ឆ្នាំ ក៏ព្រោះនាងត្រូវការពេលវេលា ដើម្បីហ្វឹកហាត់ពង្រឹងសមត្ថភាពរបស់ខ្លួនឯង ឱ្យជាក់ច្បាស់ថា នាងមានសមត្ថភាពអាចដណ្តើមយកមកុដបាន នោះនាងនឹងត្រឡប់មកវិញម្តងទៀត។
បវរកញ្ញាកម្ពស់ ១,៧៧ ម៉ែត្រ នេះ ទទួលស្គាល់ថា ពេលនេះនាងនៅមានចំណុចខ្វះខាតច្រើន ដូច្នេះនាងមានគម្រោងរៀនដើរ Catwalk ឱ្យកាន់តែល្អ និងពង្រឹងផ្នែកភាសា ក៏ដូចជារៀនភាសាថៃបន្ថែមផងដែរ។

ទោះជាយ៉ាងនេះក្តី ស្រីនីត មិនអាក់អន់ស្រពន់ចិត្តចំពោះជយលាភីលំដាប់រងទី៣ នេះឡើយ ផ្ទុយទៅវិញនាងមានតែសប្បាយចិត្ត ព្រោះកម្មវិធី Miss Grand Cambodia បានជួយផ្លាស់ប្តូរជីវិតនាងច្រើនណាស់ ពោលគឺពីមុននាងជាក្មេងស្រីសាមញ្ញ ចូលចិត្តនៅតែផ្ទះមិនហ៊ានជួបមុខនរណា តែពេលនេះនាងអាចឈរនៅឆាកដ៏ធំ បង្ហាញភាពក្លាហានក្នុងការបញ្ចេញសមត្ថភាពរហូតបានក្លាយជា 3rd Runner up Miss Grand Cambodia 2023។ នាងពិតជាសប្បាយចិត្តចំពោះសមិទ្ធផលដែលទទួលបាននៅពេលនេះខ្លាំងណាស់។
ឆ្លៀតឱកាសថ្ងៃនេះ ជាថ្ងៃខួបគម្រប់ ២៣ ឆ្នាំ ស៊ូ ស្រីនីត បានរំលឹកគុណដល់មនុស្សសំខាន់ជាច្រើនដែលបានជួយជ្រោមជ្រែងឱ្យនាងដើរមកដល់ចំណុចនេះ៕
























Account
Security
Favourite Content