បុរសម្នាក់ដែលបានចោទប្រកាន់ Song Ha-yoon ពីបទធ្វើបាបខ្លួនកាលពីជាង ២០ឆ្នាំមុន បានប្រកាសដាក់ពាក្យបណ្ដឹងទៅលើតារាសម្តែងស្រីរូបនេះ ទាមទារប្រាក់សំណងចំនួន ១០ពាន់លានវ៉ុន ឬប្រមាណ ៧.៣ លានដុល្លារអាមេរិក។ នេះបើផ្អែកតាមការចុះផ្សាយរបស់សារព័ត៌មាន The Korea Times ។

នៅថ្ងៃទី២៥ ខែសីហា នេះ បុគ្គលដែលមាននាមត្រកូលថា Oh បានបង្ហោះសារលើគណនីទំនាក់ទំនងសង្គមថា៖ “ខ្ញុំមិនដែលមានបំណងធ្វើឱ្យរឿងនេះ ក្លាយជាការលាតត្រដាង ឬជម្លោះទេ។ ខ្ញុំបានស្នើដំណោះសា្រយទៅឱ្យ Song Ha-yoon ដើម្បីដោះស្រាយបញ្ហាដោយសេចក្តីថ្លៃថ្នូរ ប៉ុន្តែគេមិនទទួលសំណើនេះឡើយ។ ឥឡូវ ខ្ញុំនឹងសហការជាមួយអ្នកស៊ើបអង្កេត និងដាក់ពាក្យបណ្តឹង”។
បុគ្គលដែលមានសញ្ជាតិ និងកំពុងរស់នៅក្នុងសហរដ្ឋអាមេរិករូបនេះ បានបន្ថែមថា លោកបានរ៉ាប់រងថ្លៃធ្វើដំណើរទៅកាន់ប្រទេសកូរ៉េខាងត្បូង រួមទាំងថ្លៃសំបុត្រយន្តហោះ កន្លែងស្នាក់នៅ និងការធ្វើដំណើរដោយខ្លួនឯង ហើយលោកនឹងប្ដឹងទាមទារប្រាក់សំណងចំនួន ១០ពាន់លានវ៉ុន ឬប្រមាណ ៧.៣ លានដុល្លារអាមេរិក ដើម្បីប៉ះប៉ូវផលប៉ះពាល់លើសុខភាពផ្លូចិត្ត ការបរិហារកេរ្តិ៍ និងពាក្យបណ្ដឹងដែលតារាស្រីបានចោទខ្លួនដោយមិនមានមូលដ្ឋានពិតជាដើម។

ផ្អែកតាមប្រភពដដែល ដើមហេតុនៃបញ្ហាចម្រូងចម្រាសនេះ បានចាប់ផ្ដើមកាលពីខែមេសា ឆ្នាំ២០២៤ ដោយ លោក Oh បានអះអាងថា នៅពេលរៀនថ្នាក់វិទ្យាល័យ ពោលគឺខែសីហា ឆ្នាំ២០០៤ Song Ha-yoon ធ្លាប់ធ្វើបាបខ្លួនអស់រយៈពេល ៩០នាទី។
ក្រោយមក នៅខែកក្កដា ឆ្នាំនេះ តំណាងផ្លូវវច្បាប់របស់ Song Ha-yoon បានចេញសេចក្តីថ្លែងការណ៍ជាផ្លូវការមួយ ដោយបានបញ្ជាក់ថា កូនក្ដីរបស់ខ្លួន កំពុងតែដាក់ពាក្យបណ្ដឹងទៅលើលោក Oh ពីបទបរិហារកេរ្តិ៍ ដោយនិយាយថា ទង្វើនេះបានធ្វើឱ្យប៉ះពាល់ទាំងផ្លូវចិត្ត និងកេរ្តិ៍ឈ្មោះរបស់នាងដែលខំកសាងមកអស់ពេល ២២ឆ្នាំ៕























Account
Security
Favourite Content