តារាចម្រៀងកូរ៉េ S.Coups ដែលមេក្រុម SEVENTEEN បានបង្កឱ្យមានការសង្ស័យជុំវិញជម្លោះដែលអាចកើតមានជាមួយបងប្រុសរបស់ខ្លួន បន្ទាប់ពីតារាប្រុសរូបនេះបានទទូចអ្នកគាំទ្រកុំឱ្យទៅហាងកាហ្វេរបស់បងប្រុសលោក។

កាលពីថ្ងៃទី ២៧ ខែកញ្ញា S.Coups បានសរសេរសារចំៗនៅលើវេទិកាអ្នកគាំទ្រ Weverse ថា “ខ្ញុំតែងតែចៀសវាងនិយាយរឿងមិនសប្បាយចិត្តព្រោះមានដំណឹងល្អច្រើនណាស់ថ្មីៗនេះ ហើយយើងមានគម្រោង Unit ថ្មីចេញមកទៀត ប៉ុន្តែមានបញ្ហាជាច្រើនរវាងខ្ញុំ និងបងប្រុសខ្ញុំ។ ខ្ញុំមិនអាចបញ្ឈប់ Carats (អ្នកគាំទ្រ SEVENTEEN) មិនឱ្យទៅហាងកាហ្វេបានទេប្រសិនបើពួកគេចូលចិត្ត ប៉ុន្តែខ្ញុំមិនចង់ឱ្យគ្រប់គ្នាចាយប្រាក់នៅទីនោះឡើយ” ។
លោកបានបន្តថា “ប្រសិនបើមាន Carats នៅក្បែរអ្នក សូមជួយផ្សព្វផ្សាយផង”។
ការបង្ហោះនេះត្រូវបានមើលឃើញជាសំណើដ៏កម្រ និងដោយផ្ទាល់ពីសិល្បករដែលហាក់ដូចជាមានបំណងទប់ស្កាត់អ្នកគាំទ្រពីការភ្ជាប់ឈ្មោះរបស់លោកទៅនឹងអាជីវកម្មរបស់បងប្រុសលោក។ នេះមិនមែនជាលើកទីមួយទេ ដែល S.Coups ចេញសេចក្តីថ្លែងការណ៍បែបនេះ។ កាលពីថ្ងៃទី ១៧ ខែកញ្ញា លោកបានសរសេរថា “ខ្ញុំឧស្សាហ៍ឃើញវីដេអូពីហាងកាហ្វេ ប៉ុន្តែវាមិនពាក់ព័ន្ធជាមួយខ្ញុំទេ។ សូមប្រាប់ Carat ផ្សេងទៀតឱ្យបានដឹង។ ខ្ញុំដឹងថាមានមនុស្សជាច្រើនតាមដាន និងទៅទីនោះ”។

ការលើកឡើងនេះបានជំរុញឱ្យមានការជជែកវែកញែកយ៉ាងរហ័សក្នុងចំណោមអ្នកគាំទ្រតាមអ៊ីនធឺណិត។ អ្នកខ្លះយល់ឃើញថា S.Coups ចង់បន្ធូរបន្ថយសម្ពាធលើអ្នកគាំទ្រ ឬជាសញ្ញានៃការគោរពឯកជនភាពរបស់បងប្រុសលោក ជាជាងការកេងចំណេញដោយឋានៈជាតារារបស់លោក។
យ៉ាងណាក៏ដោយ អ្នកខ្លះទៀតយល់ថាសារនោះជាភស្តុតាងច្បាស់លាស់នៃភាពតានតឹងក្នុងគ្រួសារ។ បន្ថែមពីលើការសង្ស័យនោះ ឃ្លីបថ្មីៗពីកម្មវិធី “Salon Drip 2” ត្រូវបានផ្សព្វផ្សាយ ដែលក្នុងនោះ S.Coups បាននិយាយដោយបើកចំហអំពីទំនាក់ទំនងដ៏តឹងតែងរបស់លោកជាមួយបងប្អូនបង្កើត។
ក្នុងវគ្គនោះ S.Coups បានឆ្លើយចំៗពេលសួរពីបងប្រុសរបស់ខ្លួន។ លោកបាននិយាយថា “ខ្ញុំមិនចង់ឃើញគាត់ទេ។ បងប្អូនបង្កើតអាចសប្បាយចិត្តជាងនៅពេលពួកគេនៅឆ្ងាយពីគ្នា។ យើងនិយាយគ្នាតាមទូរស័ព្ទដែរនៅពេលខ្លះ” ។
ក្រឡេកមកការងារសិល្បៈវិញ S.Coups គ្រោងនឹងចេញអាល់ប៊ុមខ្នាតតូចដំបូងរបស់ខ្លួនដែលជាផ្នែកមួយនៃក្រុម Unit ថ្មីជាមួយមិត្តរួមក្រុម Mingyu ៕

























Account
Security
Favourite Content