ក្រុមចម្រៀង Seventeen បានទទួលពានរង្វាន់ធំនៅ MAMA ជាលើកដំបូងក្នុងរយៈពេល ៩ ឆ្នាំចាប់តាំងពីDebut នៅឯកម្មវិធីដែលធ្វើឡើងនៅពហុកីឡដ្ឋាន Tokyo Dome ក្នុងប្រទេសជប៉ុនថ្ងៃទី ២៩ ខែវិច្ឆិកា។

ពានរង្វាន់ធំចុងក្រោយ “អាល់ប៊ុមប្រចាំឆ្នាំ” ត្រូវបានប្រគល់ទៅដល់ដៃ Seventeen សម្រាប់អាល់ប៊ុមតូចទី ១០ របស់ពួកគេ ‘FML’ ដែលបានបំបែកកំណត់ត្រាលក់ដាច់រហូតដល់ ៥លានឈុតក្នុងរយៈពេលដ៏ខ្លី។
ថ្វីត្បិតតែបាត់មុខពីការសម្ដែងដោយសាររបួសជង្គង់ ប៉ុន្តែមេក្រុម S.Coups បានបង្ហាញវត្តមានយ៉ាងភ្ញាក់ផ្អើលឡើងទទួលពាន និងបាននិយាយថ្លែងអំណរគុណថា៖ “ខ្ញុំតែងតែគិតថាតើ Seventeen អាចទទួលបានពានរង្វាន់នេះម្តងទេក្នុងអាជីពរបស់ពួកយើង? អរគុណដល់ CARATs ដែលធ្វើឱ្យពួកយើងអាចបន្តកិច្ចសន្យា និងទទួលបានពានរង្វាន់នេះ”។

Hoshi បានបន្ថែមថា៖ “យើងបានបង្ហាញខ្លួនដំបូងក្នុងឆ្នាំ ២០១៥ ហើយបានចូលរួមកម្មវិធី MAMA លើកដំបូងនៅឆ្នាំនោះ។ ពេលនោះ ពួកយើងត្រលប់មកវិញដោយគ្មានពានរង្វាន់អ្វីទាំងអស់ ប៉ុន្តែបន្ទាប់ពីប្រាំបួនឆ្នាំមក ខ្ញុំពិតជារីករាយណាស់ដែលបានទទួលពានរង្វាន់អាល់ប៊ុមប្រចាំឆ្នាំ។ សូមផ្ញើភាពជោគជ័យនេះដល់ CARATs ទាំងអស់គ្នា សូមអរគុណ”។
បន្ទាប់មក Woozi បានចែករំលែកអារម្មណ៍របស់ខ្លួនថា៖ “ខ្ញុំមានអារម្មណ៍ថាយើងចំណាយពេលយូរណាស់ទម្រាំមកដល់ទីនេះ។ យើងជាក្រុមដែលទទួលបានការរិះគន់ច្រើនតាំងពីដើមមក។ គ្រប់គ្នានិយាយថាក្រុមនេះមិនដំណើរការទេព្រោះសមាជិកច្រើនពេក។ នៅក្នុងបេះដូងរបស់ខ្ញុំ ខ្ញុំចង់អរគុណ CARATs សម្រាប់ការផ្តល់រង្វាន់ដល់ពួកយើងក្នុងពេលនេះ។ ខ្ញុំសន្យាថា SEVENTEEN នឹងបន្តខិតខំប្រឹងប្រែង និងក្លាយជាក្រុមដ៏ល្អប្រសើរ ដោយផ្តល់នូវបទចម្រៀងល្អៗរហូតដល់ទីបញ្ចប់”។

ជាចុងក្រោយ Seungkwan ក៏បានថ្លែងអំណរគុណអ្នកគាំទ្រព្រមទាំងបានលើកឡើងពីមិត្តជិតស្និទ្ធរបស់ខ្លួនគឺ Moon Bin សមាជិកក្រុម ASTRO ជាមួយអារម្មណ៍ក្ដុកក្ដួលថា៖ “ខ្ញុំមិនច្បាស់ថាគួរនិយាយបែបនេះឬអត់ ប៉ុន្តែក្នុងឆ្នាំដ៏ច្របូកច្របល់នេះ ខ្ញុំចង់ថ្លែងអំណរគុណចំពោះមិត្តរបស់ខ្ញុំ Bin ដែលតែងស្រលាញ់ និងគាំទ្រក្រុមពួកយើងរហូត សូមអរគុណ”។
សារដ៏រំជួលចិត្តរបស់ពួកគេត្រូវបានបញ្ចប់អមដោយសំឡេងទះដៃពីទស្សនិកជន រួមទាំងសិល្បករផ្សេងទៀតដែលមានវត្តមាន ខណៈដែលគ្រប់គ្នាចងចាំដោយក្តីអាឡោះអាល័យចំពោះមិត្តភាពដ៏ល្អរវាងសមាជិក Seventeen ជាមួយសមាជិកក្រុម ASTRO ទាំងពីររូប ៕



























Account
Security
Favourite Content