ខណៈពេលចូលរួមកិច្ចប្រជុំកំពូល Fortune Most Powerful Women Summit តារាចម្រៀង Selena Gomez បានរំឭកដល់ដំបូន្មានដែល Taylor Swift ធ្លាប់ណែនាំខ្លួន ថាជាពាក្យមួយឃ្លាដែលនាងមិនដែលភ្លេច និងបាននាំនាងមកដល់សព្វថ្ងៃនេះ។

ទន្ទឹមគ្នានឹងកិច្ចពិភាក្សាអំពីការបង្កើតម៉ាក Rare Beauty ដែលជាយីហោគ្រឿងសម្អាងផ្ទាល់ខ្លួនរបស់ Selena Gomez តារាស្រីវ័យ ៣៣ឆ្នាំបាននិយាយដល់មិត្តសំណព្វចិត្ត Taylor Swift ថា៖ “នាងគឺជាមនុស្សដ៏ឆ្លាតបំផុតម្នាក់ដែលខ្ញុំធ្លាប់ស្គាល់។ នាងជារឹងមាំខ្លាំងណាស់ ហើយនាងតែងតែផ្តល់ដំបូន្មានដ៏អស្ចារ្យដល់ខ្ញុំ។ ខ្ញុំមិនដឹងថា ខ្ញុំបានធ្វើអ្វីដើម្បីតបស្នងទៅនាងវិញខ្លះទេ ក្រៅពីការដែលនៅជិតនាងក្នុងនាមជាមិត្តម្នាក់របស់នាង”។
រំឭកដល់ពាក្យណែនាំដែលនាងទទួលស្គាល់ថាជាដំបូន្មានដ៏អស្ចារ្យនោះ ម្ចាស់បទ Love You Like a Love Song បានបង្ហើបថា មិត្តរូបនេះធ្លាប់ប្រាប់ខ្លួនថា “បើសិនជាអ្នកជាមនុស្សដែលឆ្លាតបំផុតនៅកន្លែងដែលអ្នកកំពុងនៅ មានន័យថា អ្នកនៅខុសកន្លែងហើយ”។
ជាក់ស្ដែង ប្រយោគខាងលើនេះ បានបង្កប់អត្ថន័យឱ្យមនុស្សបន្តអភិវឌ្ឍខ្លួនឯងជារឿយៗ ខណៈ Selena Gomez បានរៀបរាប់ដូចគ្នាថា ប្រយោគនេះបានស្ថិតនៅក្នុងការចងចាំរបស់នាងរហូតមក និងជាមូលហេតុមួយដែលធ្វើឱ្យនាងនៅតែបន្តរៀនសូត្រ ក៏ដូចជាស្វែងរកឱកាសថ្មីៗសម្រាប់ខ្លួនឯងជានិច្ច។

គួរឱ្យដឹងផងដែរថា មិត្តភាពរវាងអ្នកទាំងពីរបានចាប់ផ្ដើមឡើងនៅក្នុងឆ្នាំ ២០០៨ នៅពេលតារាស្រីទាំងពីរមានទំនាក់ទំនងស្នេហាជាមួយនឹងបងប្អូនប្រុសត្រកូល Jonas។ ពោលគឺ Selena Gomez បានទាក់ទងជាមួយ Nick Jonas ឯ Taylor Swift បានទាក់ទងជាមួយនឹង Joe Jonas។
ក្រោយពីជីវិតគូរបស់អ្នកទាំង ៤ បានមកដល់ទីបញ្ចាប់ Selena Gomez ក៏ធ្លាប់បានចែករំលែកដែលថា ពួកនាងទាំងពីរតែងប្រាប់គ្នាទៅវិញទៅមកថា រឿងដ៏ល្អបំផុតដែលពួកនាងទទួលបានពីការបែកបាក់នោះគឺមិត្តភាព ១៦ឆ្នាំ ដែលពួកនាងតែងតែនៅជិតគ្នាមិនថាពេលសប្បាយ ឬពេលកើតទុក្ខនោះទេ៕

























Account
Security
Favourite Content