កាលពីថ្ងៃទី១៧ ខែមិថុនានេះ Sabrina Carpenter បានប្រាប់ទៅកាន់សារព័ត៌មាន Rolling Stone អំពីគោលបំណងចង់ហាមឃាត់មិនឱ្យអ្នកគាំទ្រយកទូរស័ព្ទចូលទៅក្នុងកម្មវិធីប្រគំតន្ត្រីរបស់នាង ព្រោះចិត្តមួយចង់ឱ្យអ្នកគាំទ្រចំណាយពេលរីករាយនឹងជីវិត ឯមួយវិញទៀត មិនចង់ឱ្យអ្នកគាំទ្រឃើញស្បែកមុខពិត។

Sabrina Carpenter បាននិយាយថា វាជារឿងធម្មតាសម្រាប់ខ្លួនទេ ពេលឃើញអ្នកគាំទ្រចង់រក្សាទុកអនុស្សាវរីយ៍នៅក្នុងទូរស័ព្ទដៃ ហើយបច្ចុប្បន្ននេះ ពេលដែលស្បែកមុខនាងនៅទន់រលោងនៅឡើយ វាប្រាកដជាគ្មានបញ្ហាអ្វីឡើយ។
ក៏ប៉ុន្តែតារាស្រីវ័យ ២៦ឆ្នាំ បាននិយាយលេងសើចថា៖ “វាអាស្រ័យទៅលើរយៈពេលដែលខ្ញុំចង់បន្តធ្វើការងារនេះ និងអាយុរបស់ខ្ញុំដែរ ព្រោះខ្ញុំមិនចង់ឱ្យអ្នកគាំទ្រថតពង្រីក ឃើញស្បែកមុខខ្ញុំ នៅពេលខ្ញុំអាយុ ៨០ឆ្នាំនោះទេ”។

យ៉ាងណាមិញគំនិតនេះ បានកើតឡើងនៅពេលដែលតារាចម្រៀងអាមេរិករូបនេះ បានទៅទស្សនាកម្មវិធីប្រគំតន្ត្រីមួយឯ Las Vegas ដោយនាងបានរៀបរាប់ថា៖ “គំនិតនេះអាចនឹងធ្វើឱ្យអ្នកគាំទ្ររបស់ខ្ញុំខឹង តែដោយសារខ្ញុំបានទៅមើលកម្មវិធីប្រគំតន្រ្តីរបស់ Silk Sonic ហើយគេហាមមិនឱ្យយកទូរស័ព្ទចូល”។
“ខ្ញុំមិនដែលទទួលបានបទពិសោធន៍ល្អពេលចូលរួមកម្មវិធីប្រគំតន្រ្តីកម្រិតនេះ ពីមុនមកទេ។ អារម្មណ៍ខ្ញុំដូចឆ្លងពេលវេលាទៅទសវត្សរ៍ឆ្នាំ ៧០អ៊ីចឹង។ គ្រប់គ្នាច្រៀង រាំ ហើយសើចដាក់គ្នា។ វាពិតជាពិសេសមែនទែន” តារាចម្រៀងមានស្នាដៃច្រើនក្នុងវិស័យភាពយន្ត រៀបរាប់ដូច្នេះ។

ជាក់ស្ដែង បើសិនជាការគិតនេះក្លាយជាការពិត Sabrina Carpenter មិនមែនជាសិល្បកររូបដំបូងនោះទេ តែកន្លងមក តារាដូចជា Bob Dylan, Adele និង Madonna បានធ្វើរឿងនេះរួចទៅហើយ។
គួរឱ្យដឹងផងដែរថា បន្ទាប់ពី Sabrina Carpenter ទទួលជោគជ័យនឹងអាល់ប៊ុម Short n’ Sweet កាលពីឆ្នាំមុន បទ Manchild ទើបចេញថ្មីក៏ទទួលបានតំណែងលេខ ១នៅលើ Billboard Hot 100 ដែរ។ បន្ថែមពីនេះ តារាស្រីសំឡេងស្រទន់ ក៏គ្រោងនឹងចេញអាល់ប៊ុម Man’s Best Friend នៅថ្ងៃទី ២៩ ខែសីហាខាងមុខនេះដូចគ្នា៕

























Account
Security
Favourite Content