តារាចម្រៀងកូរ៉េខាងត្បូង Rosé, G-Dragon និង J-Hope នឹងបង្ហាញវត្តមាននៅលើឆាកប្រគំតន្រ្តី Le Gala des Pièces Jaunes ក្នុងទីក្រុងប៉ារីស នៅថ្ងៃទី២៣ ខែមករា ខាងមុខនេះ រួមគ្នាជាមួយនឹងតារាល្បីៗលំដាប់ពិភពលោកដទៃទៀត។
ព្រឹត្តការណ៍កម្មវិធីប្រគំតន្រ្តីសប្បុរសនេះ គឺធ្វើឡើងក្នុងគោលបំណងដើម្បីរៃអង្គាសជំនួយជួយដល់មន្ទីរពេទ្យសម្រាប់កុមារ និងយុវវ័យ ដោយមានការចូលរួមពីតារាល្បីឈ្មោះដូចជា Katy Perry, John Legend, Burna Boy និង Gims ជាដើម។
ដោយឡែក ការចូលរួមរបស់តារាខេប៉ុបទាំង ៣រូបនេះ ក៏បានទាក់ទាញចំណាប់អារម្មណ៍អ្នកគាំទ្រឱ្យរង់ចាំមើលការប្រគំតន្ត្រីនេះមិនតិចទេ ព្រោះជាក់ស្ដែង ម្នាក់ៗទើបតែមានស្នាដៃល្បីៗកាលពីឆ្នាំកន្លងទៅ។ តួយ៉ាង Rosé ទើបតែបញ្ចេញស្នាដៃអាល់ប៊ុមទោលដំបូងកាលពីចុងឆ្នាំ២០២៤នេះ ដោយមានបទចម្រៀង APT. ជាបទដែលទទួលបានប្រជាប្រិយភាពលេចធ្លោរជាងគេក្នុងចំណោមបទចម្រៀងទាំង១២ ពីអាល់ប៊ុម rosie។ ការឡើងសម្ដែងនៅលើឆាក Le Gala des Pièces Jaunes នៅឆ្នាំ រាប់ជាឆ្នាំទី២សម្រាប់តារាស្រីវ័យ២៦ឆ្នាំ ដោយកាលពីឆ្នាំ២០២៣ នាងធ្លាប់បានឡើងសម្ដែងម្ដងជាមួយនឹងមិត្តរួមក្រុម BLACKPINK។
សម្រាប់ G-Dragon វិញ តារាវ័យ ៣៦ឆ្នាំរូបនេះក៏ទើបតែបានបញ្ចេញស្នាដៃចម្រៀងថ្មីកាលពីឆ្នាំ២០២៤ ក្រោយខកខានអស់ពេល ៧ឆ្នាំ រួមមានបទទោល Power និងបទ Home sweet home ដែលជាស្នាដៃរួមគ្នាជាមួយនឹងមិត្តរួមក្រុម BIGBANG ដូចជា Taeyang និង Daesung។ បន្ថែមពីនេះ ស្ដេចខេប៉ុបរូបខាងលើក៏បានឡើងសម្ដែងជាថ្មី នៅលើឆាកប្រគំតន្រ្តីធំៗដូចជា MAMA Awards 2024 ជាដើម។
ចំណែកសមាជិកពីក្រុមចម្រៀងបុរស BTS វិញ ដ្បិតមិនទាន់មានស្នាដៃថ្មីបញ្ចេញមកក៏ពិតមែន ក៏ប៉ុន្តែតាំងតែបញ្ចប់ភារកិច្ចក្នុងជួរយោធាភ្លាម J-Hope ក៏ចាប់ផ្ដើមចូលស្ទូឌីយោផលិតស្នាដៃថ្មីភ្លាម ដោយរំពឹងថានឹងអាចបញ្ចេញចម្រៀងថ្មីសម្រាប់ Army ក្នុងពេលឆាប់ៗ។ ទន្ទឹមគ្នានេះ អ្នកគាំទ្រកំពុងរង់ចាំមើលថា J-Hope នឹងច្រៀងបទថ្មីរបស់ខ្លួនដែរឬអត់ នៅក្នុងការចូលរួមកម្មវិធីប្រគំតន្រ្តីសប្បុរសនេះ៕