ថ្ងៃទី១២ ខែកញ្ញា ឆ្នាំ២០២៤ គឺជាថ្ងៃកំណើត ៣០ ឆ្នាំរបស់ RM ឬ Kim Namjoon ប្រធានកំពូលក្រុមចម្រៀងបុរស BTS ដែលទទួលបានការជូនពរ និងអបអរយ៉ាងច្រើនពីក្រុមអ្នកគាំទ្រជុំវិញពិភពលោក។

មិនត្រឹមតែអ្នកគាំទ្ររបស់លោកនោះទេ សូម្បីតែខ្លួនលោកផ្ទាល់ក៏បានអបអរថ្ងៃកំណើតរបស់ខ្លួនដោយបរិច្ចាគទឹកប្រាក់ ១០០ លានវ៉ុន ឬប្រហែលជាង ៧៤ ០០០ ដុល្លារអាមេរិកដល់មូលនិធិអតីតយុទ្ធជនផងដែរ។ ទឹកប្រាក់នៃការឧបត្ថម្ភរបស់លោកបានក្លាយជាផ្នែកមួយនៃគំនិតផ្ដួចផ្ដើម “ក្ដីស្រមៃរបស់អតីតយុទ្ធជន” ដែលរៀបចំឡើងដោយក្រសួងកិច្ចការអតីតយុទ្ធជនកូរ៉េផងដែរ។ ជាពិសេសអំណោយរបស់លោកនឹងត្រូវបានប្រើប្រាស់សម្រាប់ផ្ដល់កិត្តិយស និងគាំទ្រដល់អតីតយុទ្ធជនដែលមានគុណសម្បត្តិព្រមទាំងក្រុមគ្រួសារ។


តាមរយៈក្រុមហ៊ុន Big Hit Music RM បានឱ្យដឹងថាសម្រាប់លោកផ្ទាល់ពិតជាបានយល់ដឹងអំពីការលះបង់របស់បុគ្គលជាច្រើនចំពោះប្រទេសជាតិនាពេលបច្ចុប្បន្ន។ ដូច្នេះនៅពេលនេះ លោកសង្ឃឹមថាការចូលរួមចំណែកដ៏តូចមួយនេះនឹងអាចជួយទៅដល់វីរបុរសទាំងអស់ដែលបានលះបង់ខ្លួនដើម្បីបម្រើជាតិមាតុភូមិ និងខិតខំប្រឹងប្រែងរក្សាសន្ដិភាព។ លើសពីនេះ ការឧបត្ថម្ភលើកនេះក៏សង្កត់ធ្ងន់ទៅលើការដឹងគុណចំពោះវីរបុរសទាំងអស់ ថែមទាំងទទួលស្គាល់ថាពួកគេគឺជាអ្នកតំណាងដែលសាកសមនឹងទទួលបានគាំទ្រយ៉ាងពិតប្រាកដ។ស្របពេលនោះ លោកក៏មិនភ្លេចអរគុណទៅដល់អ្នកគាំទ្ររបស់សម្រាប់ក្ដីស្រឡាញ់ និងការជូនពរចំពោះលោកដែរ។
គួរបញ្ជាក់ផងដែរ RM តែងតែអបអរថ្ងៃកំណើតរបស់លោកតាមរយៈការធ្វើសកម្មភាពសប្បុរសធម៌ជានិច្ច បើទោះជាពេលនេះលោកកំពុងនៅជាប់កាតព្វកិច្ចក្នុងជួរកងទ័ពនោះទេ។ ជាក់ស្ដែងកាលពីឆ្នាំមុន លោកបានក្លាយជាផ្នែកមួយដែលគាំទ្រទៅដល់សមាគមកោសល្យវិច្ច័យកូរ៉េ ដោយលើកឡើងពីសារៈសំខាន់នៃការបណ្តុះបណ្តាលវិជ្ជាជីវៈ។ ក្នុងឆ្នាំ ២០២១ និង ២០២២ លោកក៏បានបរិច្ចាកទៅមូលនិធិសម្រាប់បេតិកភណ្ឌវប្បធម៌នៅក្រៅប្រទេស ដើម្បីជួយក្នុងការអភិរក្សបេតិកភណ្ឌវប្បធម៌ទៀតផង៕























Account
Security
Favourite Content