តារាចម្រៀងខេប៉ុបល្បី Rain និងភរិយា ត្រូវបានគេចាត់ទុកជាគូស្នេហ៍ផ្អែមល្ហែមមួយក្នុងវិស័យសិល្បៈកូរ៉េ។ រៀបការប្រមាណជា ៧ ឆ្នាំទៅហើយ អ្នកទាំងពីរនៅតែមានភាពផ្អែមល្ហែមធ្វើឲ្យអ្នកគាំទ្រជាច្រើនច្រណែន។ ជារឿយ Rain តែងនិយាយរំឮកពីភរិយារបស់ខ្លួន និងសរសើរពីអត្ដចរិតនាង។
ថ្មីៗនេះ តារាប្រុសវ័យ ៤១ ឆ្នាំរូបនេះបានបង្ហាញខ្លួនក្នុងកម្មវិធី “Thursday Night With Cho Hyun-Ah” និងបាននិយាយពីភរិយាសំណព្វចិត្ដរបស់ខ្លួនម្ដងទៀត។ តារាប្រុសរូបនេះបានឆ្លៀតនិយាយពីជីវិតគ្រួសាររបស់ខ្លួនផងដែរ។ តួឯកប្រុសរឿង «បំណុលផ្ទះជំពាក់ស្នេហ៍» បានលើកឡើងថា មិនដែលធ្លាប់គិតចង់រៀបការឡើយ។ លោកគ្មានគោលបំណងរៀបការជាមួយនរណាម្នាក់ឡើយ។ ប៉ុន្ដែនៅពេលជួបភរិយារបស់លោក Kim TaeHee អ្វីគ្រប់យ៉ាងក៏ប្រែប្រួល វាដូចជានិស្ស័យ។


Rain បន្ដថា មែនទែនទៅ លោកមិនមែនជាប្រភេទបុរស ដែល Kim Tae hee ពេញចិត្ដឡើយ ហើយតារាសម្ដែងស្រី Kim Tae hee ក៏មិនមែនជាប្រភេទមនុស្សស្រីដែលលោកពេញចិត្ដដែរ។ ប៉ុន្ដែនៅពេលបានជួបភរិយានៅកន្លែងថតពាណិជ្ជកម្ម ម្ចាស់បទ «LA SONG» ក៏ចាប់ផ្ដើមចាប់អារម្មណ៍ជាមួយនាង។
តារាប្រុសរូបនេះបន្ដទៀតថា មានពេលវេលាមួយដែលលោកលង់ស្រឡាញ់នាងខ្លាំងមែនទែន និងស្រឡាញ់ដកចិត្ដលែងរួច។ អំឡុងពេលសម្រាកពីការថតពាណិជ្ជកម្ម គ្រប់គ្នាទៅយកអាហារដើម្បីហូប។ លោកក៏ទៅយកដូចគ្នា អ្វីដែលលោកភ្ញាក់ផ្អើល លោកឃើញភរិយារបស់លោក យកអាហារយ៉ាងច្រើន ដែលអាហារទាំងនោះច្រើនជាងរបស់លោក ២ ទៅ ៣ ដង។ លោកមិននឹកស្មាន នាងញ៉ាំអាហារច្រើនបែបនេះសោះ។ ការពិតទៅ អាហារទាំងនោះ គឺនាងជួយយកឲ្យអ្នកគ្រប់គ្រងរបស់នាង។ ពេលនោះ លោកមានអារម្មណ៍ថា នាងជានារីដ៏ល្អ និងជានារីដែលព្រះប្រទានឲ្យ លោកពិតជាចង់រៀបការជាមួយនាង។



ជាចុងក្រោយ Rain ក៏បាននិយាយពីបទពិសោធជីវិតគូផងដែរ ប្រសិនបើចង់ឲ្យរស់នៅជាមួយគ្នាយូរ ត្រូវរកមនុស្សដែលយើងស្រឡាញ់ខ្លាំង ចេញពីចិត្ដ និងទទួលយកគ្រប់ចំណុច នោះទើបស្នេហារឹងមាំ គង់វង្សយូរអង្វែង៕

























Account
Security
Favourite Content