ប៉ុន្មានសប្ដាហ៍ក្រោយនេះ Suga សមាជិក BTS កំពុងតែស្ថិតនៅក្នុងដំណាក់កាលនៃការដំណើរការរឿងក្ដី ក្រោយលោកបានបើកបរម៉ូតូអាគុយ ឬ electric scooter ក្នុងស្ថានភាពស្រវឹងទៅផ្ទះរបស់លោកដែលមានទីតាំងនៅសង្កាត់ Yongsan ទីក្រុងសេអ៊ូល។ បច្ចុប្បន្នលោកក៏បានបង្ហាញការសហការដើម្បីបំភ្លឺទៅលើករណីនេះផងដែរ។

យ៉ាងណាមិញក្រោយកើតហេតុ Suga បានបង្ហោះសារសុំទោសទៅដល់សាធារណជន ជាពិសេសអ្នកគាំទ្រដែលលោកបានប្រព្រឹត្តកំហុសមួយនេះ។ លុះដល់ថ្ងៃទី២៥ ខែសីហា លោកក៏បានបង្ហោះសារសុំទោសជាថ្មីម្ដងទៀតដែលលោកបានធ្វើឱ្យអ្នកគាំទ្រខកចិត្តថែមទាំងបានធ្វើឱ្យប៉ះពាល់ទៅកេរ្ដិ៍ឈ្មោះ BTS ទៀតផង។ ប៉ុន្តែក្រោយមកភ្លាមៗអ្នកគាំទ្រជុំវិញពិភពលោកបានរួមគ្នាបញ្ចេញមតិ និងបង្ហាញការលើកទឹកចិត្តជាបន្ដបន្ទាប់យ៉ាងកក់ក្ដៅ។



មិនត្រឹមតែអ្នកគាំទ្រប៉ុណ្ណោះទេ ក្នុងចំណោមនេះ PSY ក៏បានសម្ដែងការគាំទ្រដល់ Suga កំលុងពេលដែលលោកបញ្ចប់ការប្រគំតន្រ្ដី “Summer Swag” ឆ្នាំ ២០២៤ នៅកីឡដ្ឋាន Suwon World Cup។ នៅពេលដែលលោករៀបចំសម្ដែងបទ “That That” PSY បានឆ្លៀតពេលនោះសម្ដែងការថ្លែងអំណរគុណចំពោះ Suga សម្រាប់ការបង្កើត និងចូលរួមច្រៀងបទចម្រៀងដ៏ល្បីល្បាញមួយនេះជាមួយនឹងលោក។


ពាក្យពេចន៍ថ្លែងអំណរគុណចេញពីចិត្តរបស់លោកពិតជាត្រូវបានអ្នកគាំទ្រជាច្រើនទទួលស្គាល់ និងកោតសរសើរយ៉ាងច្រើនដោយមិនត្រឹមតែការសហការគ្នាផលិតបទចម្រៀងទេ ប៉ុន្តែជាមិត្តភាពល្អសូម្បីតែក្នុងកាលៈទេសៈដ៏លំបាកមួយនេះ។ ជាងនេះទៅទៀត ក្នុងនេះក៏មាន EL CAPITXN, Lee Min-jin, Miu Sakamoto, តារាសម្ដែង Park Sohee តារាសម្ដែង Alicia Hannah Kim និងតារាល្បីៗជាច្រើននាក់ទៀតបានផ្ញើការគាំទ្រចំពោះ Suga តាមរយៈបណ្ដាញសង្គមក្នុងពេលវេលាក៏តឹងតែងនេះផងដែរ។
គួររំឭកថា Suga ត្រូវបានស៊ើបអង្កេតលើកដំបូងកាលពីថ្ងៃទី ៦ ខែសីហា បន្ទាប់ពីបានបើកបរទាំងស្រវឹងនៅជិតផ្ទះរបស់ខ្លួនក្នុងសង្កាត់ Yongsan កណ្តាលក្រុងសេអ៊ូល។ ទីភ្នាក់ងាររបស់គេគឺផលិតកម្ម BigHit Music ក៏រងការរិះគន់យ៉ាងខ្លាំងដែរថាបានព្យាយាមលាក់បាំងព័ត៌មានពីករណីនេះខណៈដែលដំបូងឡើយបានផ្សព្វផ្សាយព័ត៌មានមិនច្បាស់លាស់នាំធ្វើឱ្យមានការភាន់ច្រឡំថាយានយន្ត Scooter ដែល Suga ជិះគឺជាប្រភេទ Scooter តូចៗគ្មានកែបអង្គុយ ប៉ុន្តែការពិតគឺជាម៉ូតូអគ្គិសនីដែលមានកែបអង្គុយ និងជាប្រភេទយានយន្តដែលត្រូវផ្ដន្ទាទោសក្នុងករណីបើកបរក្រោមស្ថានភាពស្រវឹង។
ផ្អែកតាមសេចក្ដីរាយការណ៍របស់ប៉ូលីស កម្រិតជាតិអាល់កុលក្នុងឈាមរបស់ Suga នៅពេលត្រូវចាប់បានគឺមានចំនួន 0.22 ភាគរយ ជាកម្រិតខ្ពស់គ្រប់គ្រាន់សម្រាប់ការដកហូតប័ណ្ណបើកបរ ខណៈការផ្ដន្ទាទោសត្រូវអនុវត្តចាប់ពីកម្រិត 0.08 ភាគរយ ៕



























Account
Security
Favourite Content